Ti Panagayattayo iti Minuyongan
TARIGAGAYANYO kadi ti kinatalinaay iti maysa a napintas a minuyongan kas pagkamangan manipud kinaariwawa ken agap-apura a kasasaad ti panagbiag? Pagay-ayatyo kadi dagiti naulimek a parke nga addaan nalalawa a karuotan, sabsabong, nalinong a kaykayo, ken libtong iti aglawlaw a pagpiknikan ti pamiliayo wenno pagpasiaranyo a kadua ti maysa a gayyem? Wen, anian a makapagin-awa, makapabang-ar, nakataltalna, ken makapaimbag pay ketdi ti minuyongan!
Nupay nalabit a gapu iti kurang a tiempo, agkedked ti dadduma a mangtaripato iti maysa a minuyongan, maragsakantayo amin kadagiti maris, banglo, uni, ken prutas iti minuyongan. Ni Thomas Jefferson—maysa nga arkitekto, sientipiko, abogado, imbentor, ken nagpresidente iti E.U.—pagay-ayatna idi ti minuyongan. Nagsurat: “Awanen ti trabaho a makaparagsak unay kaniak a kas iti panangsukay iti daga. . . . Debosionadoak pay laeng iti minuyongan. Ngem nupay lakayakon, agdadamoak pay laeng a hardinero.”
Adut’ mamati iti kapanunotanna. Minilion a bisita ti tinawen nga agdudupudop kadagiti nalatak a minuyongan iti lubong—ti Kew Gardens (ti Royal Botanic Gardens), idiay Inglatera; dagiti minuyongan iti Kyoto, Japan; dagiti minuyongan iti Palasio iti Versailles, idiay Francia; ti Longwood Gardens, iti Pennsylvania, E.U.A., tapno dakamaten ti sumagmamano. Adu a pagilian ti addaan met kadagiti lugar iti siudad a nakaisaadan dagiti balay, iti igid dagiti naintaran kaykayo a kalsada, a napalikmutan iti babassit a kayo, kaykayo, ken ti nadumaduma ti kolorda a sabsabong—kas iti bassit a paraiso.
Dagiti Minuyongan Mapasayaatda ti Salun-at
Napaliiwen a no kanayon a makilangen ti tao iti lubong ti nakaparsuaan, nasaysayaat ti salun-atda, nupay ti pannakilangenda ket babaen laeng ti pannakakitada iti tawa kadagiti sabsabong, kaykayo, babassit a kayo, ken tumatayab. Daytoy ti nakatignayan ti maysa nga ospital iti New York City a mangaramid iti maysa a minuyongan iti atepna. Daytat’ “naabrasa a siraragsak,” kinuna ti maysa nga opisial ti ospital. “Daytat’ mangpasayaat iti kababalin agpadpada ti pasiente ken dagiti kameng ti ospital. . . . Makitami nga aduan dayta kadagiti makaagas a posibilidad.” Kinapudnona, ipakita dagiti panagadal a magunggonaan dagiti tattao iti pisikal, mental, ken emosional no agpennek dagiti sentidoda iti nakaparsuaan.
Kasta met a marikna ti maysa a tao nga agannayas iti naespirituan a nasingsingedda iti Dios no addada iti tengnga dagiti mangnibinibi a gapuananna. Mabalin a tuntonen daytoy nga aspeto ti minuyongan iti damo unay a minuyongan ditoy daga, a sadiay ti Minuyongan iti Eden ti damo a nakipatangan ti Dios iti tao.—Genesis 2:15-17; 3:8.
Sapasap ti panagayat iti minuyongan. Ket nakapatpateg daytoy, kas makitatayto. Sakbay a salaysayenmi daytoy a paset, nupay kasta, awisendakayo a “lumasat” iti sumagmamano a minuyongan ti historia tapno maawatanyo ti kasta unay a panagtarigagay ti puso ti amin a tattao iti Paraiso.