Dagiti Agbalbaliw a Kababalin Mamataudda iti Baro a Salsaludsod
“SEKSUAL A PANAGBALBALIW,” “nalabes a panaggartem iti sekso,” “agbalbaliw a moral.” Dagita a termino iwaragawagda ti agbalbaliw a seksual a kababalin, nangnangruna idi ngalay ti dekada 1960 ken kalpasanna. Adu ti nangaklon iti replan a “libre a panagdenna,” a mangiladawan iti estilo ti panagbiag a dagiti indibidual impuerada ti panagkasar ken ti kinabirhen.
Ti manipesto ti autor a ni Ernest Hemingway a, “No naimbag ti riknam kalpasanna naimbag a kababalin dayta, ket no dakes ti riknam kalpasanna imoral dayta,” ti manggupgop iti kababalin dagidiay a maallukoy kadagiti kari ti seksual a wayawaya ken pannakapnek. Ti panangakseptar itoy a pilosopia ikalinteganna dagiti apagkanito a seksual a relasion ti lalaki ken babai iti sumagmamano a pareha, isu a nageksperimentuanda ti seksualidadda. Ti seksual a “pannakapnek” awan limitasionna. Ti kontraseptibo a pildoras, a nayam-ammo iti dayta met la a dekada, pinakarona pay ti di malaplapdan a panageksperimento iti sekso.
Nupay kasta, ti AIDS ken dadduma pay nga iyakar ti sekso a saksakit ti impatawid daytoy narugit nga estilo ti panagbiag. Kimmapuyen ti seksual a kababalin ti nalulok a kaputotan. Sumagmamano a tawenen ti napalabas, imparang ti magasin a Time ti paulo ti damdamag a “Sekso iti Dekada 1980—Nalpasen ti Panagbalbaliw.” Daytoy a proklamasion naibatay a nangnangruna iti agraraira nga iyakar ti sekso a saksakit a nangapektaren iti adu nga Americano. Agingga ita, addan nakaam-amak a bilang a gistay 30 milion a kaso ti AIDS iti intero a lubong!
Ti panagamak iti iyakar ti sekso a saksakit ti nakagapu iti panagbalbaliw ti panangmatmat ti adu iti apagkanito a seksual a relasion. Kinuna ti 1992 a ruar ti US, maysa a magasin maipapan iti panaglinglingay, a mangipadpadamag iti surbey ti gobierno: “Agarup 6.8 milion nga agwaywayas a babbai ti nangbalbaliw iti seksual a kababalinda gapu iti panagamak iti AIDS ken dagiti dadduma nga iyakar ti sekso a saksakit.” Sigun iti artikulo, nabatad ti mensahe: “Saan nga ang-angaw ti sekso. Agpeggadka no makipasetka.”
Kasano nga inapektaran dagitoy a nariribuk a dekada ti panangmatmat iti seksual a relasion? Adda kadi naadal a leksion iti naan-anay a di mapengdan a libre a panagdenna kadagiti kallabes a dekada ken dagiti agpaypayso a nakaam-amak a sakit nga iyakar ti sekso iti dekada 1980? Ti kadi pannakaisuro ti sekso kadagiti eskuelaan publiko tinulonganna dagiti agtutubo a lallaki ken babbai a mangparmek a sibaballigi iti pagayatanda iti sekso? Ania ti kasayaatan a pamay-an a mangsaranget iti karit ti agbalbaliw a panangmatmat iti pagayatan iti sekso itatta?