Manipud Managbasatayo
Sakit ti Bekkel Ti artikulo a “‘Temporario Laeng Dayta!’—Ti Biagko nga Addaan Sakit iti Bekkel” (Nobiembre 22, 1996) nagballigi a nangparegta kadakam ken ni lakayko nangnangruna iti nakarikrikut a kasasaad. Kas iti nagsurat iti artikulo, nangrugin ni lakayko a nagpa-peritoneal dialysis, ket nakarigrigat dayta. No dadduma, maupaykam unay. Ngem dakkel a liwliwa ti artikuloyo, a nangipalagip kadakami a ti panagsakit iti bekkel ket temporario laeng ken asidegen a pukawen ti Pagarian ti Dios, agraman amin a dadduma pay nga an-annayen.
V. Q., Italia
Timrem ti luak idi nabasak ti maipapan iti tao nga ipatpategna unay ti pamilia ken panagdaydayawna agpapan pay iti nabayagen a panagsakitna. Nasalun-atak, agedad iti 18 nga amin-tiempo a managebanghelio, ket maamirisko no kasano kasansan a laglag-anek laeng ti salun-atko. Talaga a makaparegta a basaen ti pammati ken kababalin ni Lee Cordaway.
J. S., Estados Unidos
Idi 1992, iti edad a 11, naammuak nga adda sakit ti bekkelko, nga idi agangay ket nakaperdian ti bekkelko. Kasapulan a mapanak agpa-dialysis. Maragsakanak ta inlawlawagyo a naimbag ti proseso agsipud ta kanayon a kayat a maammuan dagiti tattao no kasanot’ panagandarna. Pinaregtanak ken kasta met dagiti gagayyemko a mangbasa nga addanto tiempo nga awanen ti kasasaad a sarsarangtek ita.
A. H., Estados Unidos
Kasla adda nagbara iti karabukobko idi nabasak ti artikulo maipapan ken ni Lee Cordaway. Nagrigat a patien a natayen! Kayatmi nga agassawa nga iyebkas ti ayatmi iti patpatgenna nga asawa ken pamiliana. Ti kapasadanna ti nangipaamiris kaniak a bassiusit laeng dagiti parikutko no iyar-arig kadagiti parikutna. Anian a maipatpateg, matalek a Kristiano! Ti ulidanna ti nangparegta kaniak.
F. H., Estados Unidos
Nupay sangapulo laeng ti tawenko ken awanan sakit, magustuak dagita a makaparegta nga artikulo. Kayatko koma a mabasa ni Lee Cordaway daytoy a surat, ngem ammok a saan a mabalin agingga a mapagungar idiay Paraiso.
E. T., Estados Unidos
Dagiti Peregrino Kayatko nga ibaga kadakayo nga inapresiarko unay ti artikuloyo a “Dagiti Peregrino ken ti Panagporsegida Para iti Wayawaya.” (Nobiembre 22, 1996) Diak naadal idiay eskuelaan ti agpayso a pakasaritaan dagiti Peregrino. Ngem nagadut’ naadalkon kadagiti artikuloyo!
S. B., Estados Unidos
Alternative Rock Agtawenak iti 18, ket nagsayaat ti pannakaisurat ti artikulo nga “Agimtuod Dagiti Agtutubo . . . ‘Alternative Rock’—Agpaay Kadi Kaniak?” (Nobiembre 22, 1996) Magustuak ti alternative rock, isu nga impagarupko no ti artikulo insultuennak. Ngem idi nalpasko a binasa, bin-ig a panangapresiar ti nariknak. Malmaldaangak, ket naamirisko a ti pilpiliek a musika ti mabalin a mangpakaro iti leddaangko wenno tumulong kaniak a mangdaer iti dayta. Magustuak ti panangyimtuod ti artikulo iti, ‘Apay a dikay mangbirok iti musika a mangparagsak kadakayo?’ Pagyamanan iti daytoy makaparegta ken praktikal a balakad.
J. D., Estados Unidos
Nakaskasdaaw ta umiso ken di mangidumduma ti nailanad nga impormasion. Natakuatak a makaallukoy ti sumagmamano itoy a musika. Pagyamanan iti panangpakdaaryo a diyo kinondenar ti intero a kategoria ti musika.
S. C., Estados Unidos
Dagiti Sarsarita Maipapan Kadagiti Animal Magustuak dagiti artikulo nga ipabpablaakyo maipapan kadagiti animal. Tangay diak pay nadamdamag ti maipapan iti platypus, ti artikulo a “Ti Misterioso a Platypus” (Disiembre 8, 1996) pinagsiddaawnak! Iti isu met la a ruar, napikapik met ti pusok iti artikulo maipapan iti makaay-ayo a panagginnayyem ti animal ken tattao a napauluan “Nalagip Daytoy a Kudu.” Nagsayaatto ketdin inton dagiti tattao ayaten ken pagraemandan dagiti animal!
F. A., Brazil