Manipud Managbasatayo
Ipapatay iti Kona Pagyamanan iti benneg ti “Panangmatmat iti Lubong” a “Ti Panagsigarilio Mainaig iti Ipapatay iti Kona.” (Enero 22, 1997) Sapay koma ta usigen a naimbag ti tunggal ina dayta a benneg. Gistay napukawko ti baritok gapu iti SIDS (Sudden Infant Death Syndrome) agsipud ta nagsigarilioak latta kabayatan ti panagsikogko. Iti unos ti makatawen kalpasan ti insidente, masapul a makabitan iti monitor ti puso kada maturog tapno aguni ti monitor no nagsardengen ti pusona. Idi pay la koma a naam-ammok ni Jehova. Insardengko koma idin ti nagsigarilio, ket nalabit naliklikanmi koma nga agina daytoy a batibat.
A. C. A., Estados Unidos
Agsagsagaba iti Arthritis Kayatko nga iyebkas ti panagyamanko iti kapadasan ni Luretta Maass, a napauluan “Inton Nakapuyak, iti Kasta Nabilegak.” (Enero 22, 1997) Duapulo ket pito ti tawenko, ket agsagsagabaak met iti rheumatoid arthritis. Nupay ti ut-ot ket bang-aran ti therapy, pasaray masnaayan ken maupayak bassit agsipud ta kapilitan a sumardengak kas amin-tiempo a manangaskasaba gapu iti sakitko. Makaparegta ti determinasion ni Luretta Maass nga agserbi ken ni Jehova, agpapan pay iti sakitna. Diakto ipalubos a ti pannakaupay ti mangparmek kaniak; kayatko nga ad-adu pay ti maaramidak iti trabaho a panangasaba.
A. B., Italia
Nasurok a 30 a tawenen nga agsagsagaba ni nanangko iti rheumatoid arthritis. Nakalkaldaang ta manmano nga agsardeng ti ut-ot. Pagpannakkelko ni nanangko, tangay matabunnuanna ti gistay amin a gimong iti kongregasion. Iti panagtugawna iti wheelchair-na, makipaspaset iti Teokratiko nga Eskuelaan iti Panagministro ken kabaelanna pay laeng ti makipaset iti trabaho a panangasaba. Ket agpapan pay iti an-annayenna, pulos a di agreklamo.
S. M., Alemania
Layus Idi Panawen ni Noe Ti artikulo a “Ti Panangmatmat iti Biblia: Ti Layus—Pudno Wenno Sarsarita?” (Pebrero 8, 1997) agpayso a tinulongannak a mangusig a naimbag iti dayta a historikal a pasamak. Kas iti adu a sabsabali, naisuro kaniak ti maipapan iti Layus idi ubingak pay unay. Nupay kasta, pulos a diak impagarup a ti pakasaritaan ti Layus ket ibilang ti dadduma kas sarsarita laeng. Ti kinapudno nga indilig ni Jesus dagiti maudi nga aldaw iti kaaldawan ni Noe ipakitana nga agpayso daydi a Layus.
S. M., Estados Unidos
Panangdaer iti Trahedia Nabiit pay a napasarak ti adu a pakasuotan, agsasarunoda. Nagsuratak iti maysa a gayyem nga imbinsabinsak ti dadduma kadagitoy a pakasuotan sa kinotarko ti Salmo 126:5: “Dagiti agmula kadagiti lulua agapitdanto iti ragsak.” Agasenyo ti nariknak idi a kalpasan ti panagsuratko, naawatko ti Pebrero 8, 1997, a ruar nga addaan artikulo a “Panagmula iti Lulua, Panagapit iti Rag-o,” a naibasar iti dayta met la a kasuratan. Makapabileg unay iti pammati ti kapadasan ni Raymond Kirkup.
P. B., Jamaica
Panangaywan Dakkel a liwliwa kaniak dagiti serye ti “Panangaywan–Panangsaranget iti Karit” (Pebrero 8, 1997) iti karirigatan a panawen. Ti patpatgek nga ina, a matalek nga adipen ni Jehova iti adun a tawen, agsagsagaba iti makaidalit a sakit iti isip. Addaan met iti Parkinson’s disease ken nakaro nga arthritis. Maladingitan ken naklaatak iti napardas nga ikakapuyna. Kas ti kakaisuna a barona, nariknak ti rigat ti panangaywan kenkuana. Ngem mannakipagrikna unay ti nagsayaat nga artikulo! Dimteng kas pudno a sagut manipud ken ni Jehova. Pagyamanan unay iti daytoy naayat a panangandingayyo.
R. H., Inglatera