Angol—Pagilasinan ti Panungpalan?
DAGITI kadi angol iti kaaldawantayo ipasimudaagda nga asidegen ti panungpalan ti lubong? Sakbay a sungbatantayo dayta a saludsod, usigentayo no ania ti kaipapanan ti ebkas a “ti panungpalan ti lubong.”
Patien ti adu a tattao a ti panungpalan ti lubong kaipapananna a dadaelento ti Dios ti daga ken amin a biag nga adda iti dayta. Nupay kasta, kuna ti Sao ti Dios a “binukelna [ti daga] tapno isu ti pagyanan.” (Isaias 45:18) Ti panggepna ket punnuen ti planeta kadagiti nasalun-at, naragsak a tattao nga agregget a makitunos kadagiti nalinteg a pagalagadanna. Isu a ti panungpalan ti lubong dina kaipapanan ti panungpalan ti daga ken amin dagiti agindeg kenkuana. Imbes ketdi, kaipapananna ti panungpalan ti agdama a sistema ken dagidiay adda iti dayta nga agkedked a mangaramid iti pagayatan ti Dios.
Daytoy impakita ni apostol Pedro, a nagsurat: “Nadadael ti lubong [idi kaaldawan ni Noe] idi nalayus iti danum.” Idi nadadael ti lubong idi tiempo ni Noe, dagiti nadangkes idi ti napukaw. Nagtalinaed ti daga ken kasta met ni nalinteg a Noe ken ti pamiliana. Kas sumaganad a kuna ni Pedro, agtignayto manen ti Dios iti masanguanan a mangyeg iti “pannakadadael dagiti di nadiosan a tattao.”—2 Pedro 3:6, 7.
Kankanayon a suportaran dagiti dadduma a teksto ti Biblia daytoy a pannakaawat. Kas pagarigan, kunaen ti Proverbio 2:21, 22: “Ti nalinteg agtalinaedto ditoy daga, ket ti napnuan-imbag agtaengto kenkuana. Ngem dagiti nadangkes, magudasdanto ditoy daga; ket dagiti nagulib, maparutdanto kenkuana.”—Kitaenyo met ti Salmo 37:9-11.
Dagiti Angol ken ti Panungpalan ti Lubong
Ngem kaanonto a mapasamak daytoy? Uppat kadagiti adalan ni Jesus ti nagsaludsod iti dayta kenkuana. Inimtuodda: “Anianto ti pagilasinan ti kaaddam ken ti panungpalan ti sistema ti bambanag [wenno, kas kunaen ti dadduma a patarus ti Biblia, “ti panungpalan ti lubong”]?” Simmungbat ni Jesus: “Ti nasion tumakderto a bumusor iti nasion ket ti pagarian bumusor iti pagarian, ket addanto dagiti kinakirang ti taraon ken dagiti ginggined iti nadumaduma a disso.” (Mateo 24:3, 7) Iti kapareho a salaysay idiay Lucas 21:10, 11, innayon pay ni Jesus: “Addanto . . . iti nadumaduma a disso, dagiti angol . . . , ket addanto dagiti nakabutbuteng a buya ken dagiti dadakkel a pagilasinan manipud langit.”
Paliiwenyo a saan nga imbaga ni Jesus a dagiti angol laeng ti mangipakita nga asidegen ti panungpalan. Imbes ketdi, inramanna pay dagiti dadakkel a gubat, ginggined, ken kinakirang ti taraon. Iti detalyado a padtona a masarakan iti Mateo 24 ken 25, Marcos 13, ken Lucas 21, impadto ni Jesus dagiti adu a sabali pay a bambanag a mapasamakto. Amin dagitoy aggigiddanda a mapasamak sakbay nga agtignay ti Dios a mangyeg iti panungpalan ti kinadakes ditoy daga. Napigsa ti pammaneknek nga agbibiagtayon iti dayta a tiempo.
Ti Umay a Paraiso
Ti masanguanan dina iyeg ti pannakatalipupos ti sangatauan, babaen man iti angol wenno babaen iti panangdadael ti Dios. Ikari ni Jehova a Dios a pagbalinenna daytoy a daga a paraiso. (Lucas 23:43) Mairaman iti dadduma pay a bambanag, pukawennanto dagiti sakit a mangsapsaplit iti sangatauan.
Maipanamnama daytoy kadatayo no utobentayo ti ministerio ni Jesu-Kristo, a nangiparangarang a naan-anay kadagiti galad ni Amana. Gapu ta inikkan ti nailangitan nga Amana iti pannakabalin, inagasan ni Jesus dagidiay pilay, pawad, bulsek, wenno umel. (Mateo 15:30, 31) Inagasanna met dagidiay agkukutel. (Lucas 17:12-14) Inagasanna ti babai nga agbulos ti darana, ti lalaki a nagango ti imana, ken ti lalaki nga agebbal. (Marcos 3:3-5; 5:25-29; Lucas 14:2-4) Pinaimbagna “dagiti tattao nga agkissiw ken paralitiko.” (Mateo 4:24) Iti tallo nga okasion pinagungarna pay dagiti natay!—Lucas 7:11-15; 8:49-56; Juan 11:38-44.
Dagitoy a namilagruan a panangagas ipakitada a mapagtalkan ti kari ti Dios nga iti aramidennanto iti masanguanan, “awanto ti agtaeng nga agkuna: ‘Masakitak.’” (Isaias 33:24, NW) Pulos a dinto rabsuten ti angol ti salun-at ken biag dagiti tattao. Anian a panagyamantayo ta ti naayat a Namarsua kadatayo addaan nga agpadpada iti kabaelan ken pagayatan a mangpukaw a naan-anay iti an-annayen ken sakit, iti agnanayon!—Apocalipsis 21:3, 4.
[Ladawan iti panid 9]
Inikkan ti Dios ni Jesus iti pannakabalin a mangagas kadagiti masakit
[Ladawan iti panid 10]
Iti umay a naindagaan a Paraiso, pukawento ni Jehova ti an-annayen ken sakit