Sangalubongan a Solusion—Posible Kadi?
UMANAMONG dagiti eksperto a ti tuberculosis (TB) ket sangalubongan a parikut a makasapul iti sangalubongan a solusion. Awan ti pagilian nga agsolsolo a makakontrol iti TB, tangay minilion a tattao ti bumallasiw kadagiti beddeng ti dadduma a nasion iti linawas.
Patien ti adu a ti panagtitinnulong dagiti nasion, kalikagumanna a tulongan dagiti nabaknang a nasion dagiti napanglaw a nasion, a kakaruan a sapliten ti TB. Kas kunaen ni Dr. Arata Kochi, “paginteresan koma dagiti nabaknang a pagilian a tulongan dagiti napanglaw a pagilian a manglaban iti tuberculosis, sakbay nga agsaknap iti pagilianda a mismo.”
Ngem dagiti baknang a nasion, a makumikom kadagiti ibilangda a maipangpangruna a banag ken parparikut, saanda a nagtignay a dagus a tumulong. Dadduma a napanglaw a pagilian a mismo ti masansan a mangbaybay-a iti panangaywan iti salun-at, nga ad-adu ketdi ti gastosenda iti armasda. Idi agtengnga ti 1996, 10 porsiento laeng kadagiti pasiente ti TB iti lubong ti maag-agasan babaen iti estratehia ti DOTS, nakabasbassit tapno malapdan ti ikakaro ti epidemia.
Kuna ti WHO: “Ti pannakaammo ken ti nalaka nga agas a pangagas iti TB addadan iti pinulpullo a tawen. Ti kasapulan ti lubong itan ket ti nabileg a panangikagumaan dagiti addaan pannakabalin, impluensia ken asi a tattao a mangipasigurado a dagitoy nga agas ket mausar a sieepektibo iti intero a lubong.”
Ti Maaramidto a Panangparmek
Manginanamatay kadi a buyogen ti panagtalek kadagiti tattao nga addaan pannakabalin ken impluensia a mangsolbar iti parikut? Insurat ti napaltiingan a salmista ti Biblia: “Dika agkammatalek kadagiti prinsipe, ken iti anak ti tao, a kenkuana awan ti tulong.” Siasino, ngarud, ti pagtalkantayo? Kuna pay ti kasuratan: “Nagasat (“Naragsak,” NW) daydiay adda kenkuana ti Dios ni Jacob a badangna, a ti inanamana adda ken Jehova a Diosna: Isu a nangaramid iti langit ken daga, ti baybay, ken amin nga adda kadakuada.”—Salmo 146:3, 5, 6.
Kas Diseniador ken Namarsua iti daga, ni Jehova a Dios addaan agpadpada iti pannakabalin ken sirib a mangipatingga iti sakit. Adda kadi asina? Babaen iti napaltiingan a mammadtona, ikari ni Jehova: “Mangipakitaakto iti asi [iti ilik], a kas ti panangipakita ti maysa a tao iti asi iti anakna nga agserserbi kenkuana.”—Malakias 3:17, NW.
Ti pangserra a kapitulo ti Biblia deskribirenna ti maysa a sirmata a naited ken apostol Juan. Nakitana “dagiti kayo ti biag a mangpatpataud iti sangapulo ket dua nga ap-apit a bunga, a mangipapaay kadagiti bungada iti tunggal bulan.” Dagitoy a simboliko a kaykayo ken ti bungbungada iladawanda ti nadibinuan a probision a mamagbalin iti natulnog a sangatauan nga agbiag nga agnanayon ditoy daga.—Apocalipsis 22:2.
Iti panangitultuloyna, insurat ni Juan: “Dagiti bulong dagiti kayo agpaayda iti pannakaagas dagiti nasion.” Dagiti simboliko a bulong iladawanda dagiti bendision a naggapu iti Dios nga agbanagto a pakaagasan ti sangatauan agpadpada iti naespirituan ken iti pisikal. Gapuna, masiguradotayo nga iti nalinteg a baro a lubong nga iturayan ti Dios, ti TB maparmekton a naan-anay ken iti agnanayon.—Apocalipsis 21:3, 4.
[Ladawan iti panid 8, 9]
Ikari ti Dios ti agnanayon a pannakaagas ti sangatauan