Manipud Managbasatayo
Sangalubongan a Minuyongan Agyamanak kadakayo kadagiti nagpintas pannakaisuratna a serye ti “Sangalubongan a Minuyongan—Arapaap Wenno Pumayso iti Masakbayan?” (Abril 8, 1997) Wen, dagiti minuyongan ken kolor maapektaranda ti salun-attayo ken paragsakendatayo. Nagustuak ti paset a napauluan “Ti Dalan nga Agawid iti Paraiso.” Makaparegta unay dagidiay a sumagmamano a sasao—kas iti awis nga agkunkuna a “Daytoy ti dalan.” Nagragsakto ketdin ti agtrabaho iti agmalmalem a tumulong a mamagbalin iti daga kas paraiso! Tangay magustuak ti agpinta, ag-drawing, ken dadduma pay a paglaingan, magustuak met amin a retrato ken ladawan kadagiti magasin.
V. R., Australia
Kayatkay a komendaran kadagiti artikulo. Nagustuak amin ida. Dandani 80 ti tawenko ket magustuak pay laeng ti agtrabaho iti arubayak. Nupay di mangabak iti umuna a premio dagiti sabong ken natengko no maisalipda la koma, ngem talaga a magustuak ti agyan iti ruar ken aghardin. Manipud idi nabasak dagiti artikulo, ad-adda a naawatak no apay a kayat dagiti tattao ti agtrabaho kadagiti minuyongan.
R. R., Estados Unidos
Salbaren ti Panagasawa? Idi nabasak ti artikulo a “Masalbar pay Kadi ti Panagasawa Kalpasan ti Di-Kinamatalek?” (Abril 8, 1997), panagkunak ket sinuratannak ni Jehova. Inyebkasna ti eksakto a napasarak ken nariknak. Di nagmatalek ni lakayko, ngem sipapasnek a nagbabawi. Kas dinakamat ti artikulo, nariknak a kaslattay nabagyoak. Inkeddengko a pakawanek, ngem no dadduma kabainko ti rikriknak. Tinulongannak ti artikulo a mangtarus a dagiti reaksionko ket gagangay ken nainkalintegan laeng. Binendisionan unay ni Jehova dagiti panagreggetmi, ket nasalbar ti panagasawami.
L. P., Francia
Nupay din masalbar ti panagasawak, agpayso a bendision daytoy nga artikulo agsipud ta dineskribirna ti eksakto a nariknak. Talaga a ti napasarak ket kaasping ti amin a nailanad iti artikulo. Adda ammok a dadduma pay a nagunggonaan iti dayta. Adut’ marigatan a mangtarus iti rikna a napasarak, isu a dakkelto a tulong daytoy nga artikulo a mangilawlawag kadakuada.
M. C., Ireland
Siam a tawenen a naikasarak iti di manamati a di matalek nga asawa. Ngem idi nabasak dagiti parapo iti sidong ti subtema a “Masalbar pay Kadi ti Panagasawa?” simmayaat ti riknak. Kayat ni lakayko a di marakrak ti panagasawami ngem makikabkabbalay pay laeng iti babaina. Isu a maragsakanak ta nagupedkon ti panagasawami. Ita masapul a mangrugiak manen ken agbalin nga agsolsolo nga ina.
M. S. B., Trinidad
Pagyamanan iti nagpintas ken sensitibo nga artikulo. Nagsayaat nga iyaplikar ti balakad iti panangammo no naballiginto ti panagsinnublianan. Kanayon idi a determinadoak a no di agmatalek ni lakayko, pulos a diakto mapakawan. Naamirisko a saan a kanayon a dayta ti umiso a sungbat. Nakababain a daytoy ket nabatad nga agraraira a parikut, ngem agyamanak kadagiti Nainkasuratan a pannakaawat no kasanomi a tulongan ti bagimi. Ti panagpannurayko ken ni Jehova ti timmulong kaniak idi nakarot’ panagleddaangko ken tinulongannak a bumileg a mamakawan, tangay ni lakayko ket sipapasnek nga agbabbabawi idi (ken uray ita).
S. N., Estados Unidos
Dagiti Tuleng Idaydayawda ni Jehova Bayat a basbasaek ti artikulo a “Dagiti Tuleng Idaydayawda ni Jehova” (Abril 8, 1997), nagtukenak a nangmingming iti retrato ti amin a timmabuno. Anian a makapabileg iti pammati a makita ti nagadu a kakabsat nga agsensenias tapno maidaydayawda ni Jehova! Namin-adu a nakaluaak bayat nga apresiarek unay ti regta, determinasion, ken dedikasionda. Pagyamanan kadagita nga artikulo.
R. H., Estados Unidos