Ti Arte ti Panangdekorasion iti Baston
Babaen ti koresponsal ti Agriingkayo! idiay Britania
“KANAYON a masdaawak a mangammo nga adda nalalawa a paset iti British Isles a dida ammo ti aniaman no ibagam a ti pagesmam ket ti panangdekorasion iti baston,” kuna ti maysa a batidon iti dayta nga arte.
Ammo ti kaaduan ti baston wenno sarukod ti pastor. Ti panangdekorasion iti baston balbaliwanna dagitoy nga ordinario nga alikamen kas naisangsangayan a gapuanan ti arte. Iti adun a siglo, natakkuatan dagiti pastor ken trabahador iti farm a daytoy a makaay-ayo a gapuanan kalikagumanna ti kasta unay a kinalaing—ken adu nga anus. Ngem aniat’ nairaman iti panangdekorasion iti baston?
Panangpili iti Kayo
Ti umuna a pamay-an ket ti panangpili iti kayo. Mabalin nga usaren ti aniaman a kayo—kayo man ti blackthorn, mansanas, wenno peras—nga umiso ti proporsionna. Masansan a mapili ti holly gapu iti napatak ken napipintas a bugkalna. Ngem ti kayo ti hazel ti kaykayat ti adu a mangdekorasion iti baston. No dadduma ti maysa a puon ket addaan saringit nga agtubo iti kalalainganna nga anggulo iti maysa a sanga wenno ramut. Gapu itoy, mabalin a sukogen ti intero a baston—ulo ken pinakagurongna—manipud iti maysa a paset ti kayo.
Kaano ti kasayaatan a panangputed iti pinakagurongna? Kadawyanna, no magangon ken awanen ti tutot ti kayo, nupay ikalintegan ti adu a manangdekorasion iti baston a ti kasayaatan a tiempo ket madagdagus—sakbay nga adda sabali pay a makasarak iti dayta! Uray kaanoman, apaman a mapnek ti mangdekorasion iti baston a naputednan ti maitutop a material, masapul a grasaan wenno pinturaanna ti nagputdan, tapno malapdan ti panagbirri ti kayo. Kalpasanna, rumbeng a mapatangkenan ti kayo, maysa a proseso nga agkasapulan iti dua a tawen wenno nasursurok. Iti dayta la a tiempo a marugianen ti mangdekorasion iti baston ti agkitikit.
Panangkitikit iti Ulo
No awan ti natural a putan, wenno ulo ti baston, mabalin a mangaramid ti mangdekorasion babaen ti panangusarna iti sara ti baka, karnero, wenno kalding. Kas ti pinakagurongna, ti sara rumbeng a mapatangkenan, kadawyanna iti makatawen. Kalpasanna, babaen ti panangusarna iti torno, ti mangdekorasion iti baston sukogenna ti sara iti kayatna a disenio. Iti napalabas nga adun a tawen, usaren dagiti pastor ti apuy ti mammanday, agburburek a danum, beggang, wenno uray pay ti bara ti kandela tapno lumap-it ti sara. Iti kasta, nakasagananton a mapartuat sigun iti imahinasion ken laing ti pastor. Kas pagarigan, mabalinna a kitikiten ti putan tapno agbalin a kas iti aso a collie, billit, brown trout, ulo ti pheasant, wenno bassit nga animal.
Bayat a makitikit ti sara, metikuloso a tamingen ti mangdekorasion iti baston dagiti babassit a pasetna. Kas pagarigan, no mangkitikit iti arigna trout, ti ipus ken dagiti pigar ket maukit babaen ti nabara a landok ken ti nagsirkulo a punson a mausar a pangsukog iti tunggal siksik. Dagiti mata ket maaramid manipud iti sara ti nangisit a nuang. Mausar ti tinta, imbes a pinta, a pangkolor iti bagi. Mamin-adu a matintaan, ket mabalin a makapakettang ti panangtinta iti nasileng a rabawna. Ti panangbarnis iti sara ti maudi nga aramiden tapno mataginayon ti kolorna.
Gapuanan ti Arte
Maisilpo ti sara iti pinakagurong babaen ti asero a tornilio, lansa, wenno kayo a klabeha. Kalpasanna, ti mangdekorasion iti baston sisisigo a rasrasanna ti inaramidna a gapuanan ti arte babaen iti napino nga steel wool. Kalpasanna, pasilengenna dayta ken barnisanna ti pinakagurong. “Tapno makaaramidka iti trout, masukogmo dagiti pigar, kdpy., ken maaramid dagiti siksik iti bagi ti trout, kasapulan ti agarup 100 nga oras a mangkolor ken mangbarnis a naimbag tapno mangabakak iti maysa a salip,” insurat ti maysa nga aduanen kapadasan a manangdekorasion iti baston.
Talaga a makapakettang a trabaho ti panangdekorasion iti baston. Ngem ti resultana ket pudno a gapuanan ti arte, ket naisalip payen dagiti dadduma. Iti aniaman a kasasaad, ti manangdekorasion iti baston matmatanna ti trabahona kas mangipalagip iti nataltalinaay idi a tiempo, a pangsumra kadagiti pakasikoran ken rigat ti moderno a panagbiag.