Mangukomka Kadi Babaen iti Itsura?
UKOMEN kadi ti libro babaen iti akkubna? Mabalin a maallilawka. Tapno maliklikam dayta, sukimatem nga umuna dagiti linaonna. Nayilustrar daytoy iti napasamak iti agdindinamag a karakter ti sariugma dagiti taga Turkey, a ni Nasreddin Hoja. (Ti kaipapanan ti Turkiano a sao nga hoja ket “mannursuro.”) Isut’ “nasigo ken ampapaok, masirib ken maag . . . Debosionado, ngem agkamali met.” Isu ti “di maparmek a biktima dagiti kinasagibar ti biag.”—Tales of the Hoja, ni John Noonan, Aramco World, Setiembre-Oktubre 1997.
Sagudayen ti maysa nga estoria ti maipapan iti panagbiahena a simmarungkar iti maysa nga opisial dagiti Ottoman ken makipangan kenkuana. “Tangay dina ammo ti mangay-ayo, dimsaag [ni Nasreddin] ken nagtuktok iti nagdakkelan a makinsango a ruangan. Idi nalukatan, nakitana a madaman ti padaya. Ngem sakbay a nayam-ammona ti bagina, sigugubsang nga imbaga ti nagpasken, kalpasan a nakitana a narugit ti kawesna gapu iti biahe, a saan a mapasangbay dagiti agpalpalimos.”
Pimmanaw ni Nasreddin, napan iti yan ti kadosna, ken “nagpelles iti kapintasan nga aruatna: nagpintas a seda a pagan-anay nga adda burbor nga arkosna, ken dakkel a seda a turbante. Iti kasta a kinangayed, nagsubli iti makinsango a ruangan ken nagtuktok manen.
“Naimpusuan itan nga inawat ti nagpasken . . . Indasaran dagiti adipen iti agkakaimas a taraon. Imbukbok ni Nasreddin Hoja ti sangamalukong a sopas iti maysa a bulsa ti pagan-anayna. Iti siddaaw ti dadduma pay a sangaili, insaluksokna dagiti gerret ti natuno a karne kadagiti karetket ti turbantena. Kalpasanna, iti imatang ti nagaligaget a nagpasken, indeppelna ti burbor ti pagan-anayna iti sangaplato a putahe a pilaf (narekaduan nga inapuy ken karne) sa tumanamitim iti, ‘Manganka, burbor, manganka!’
“‘Ania ti kayat a sawen daytoy?’ dinamag ti nagpasken.
“‘Patgek nga apok,’ insungbat ni Hoja, ‘Pakpakanek ti pagan-anayko. No mausig ti panangtratom kaniak, kaguduan nga oras ti napalabas, nalawag a dagiti pagan-anayko, saan a siak, ti gapu a pinasangbaynak!’”
Anian a masansan ti negatibo wenno positibo a panangukomtayo babaen iti itsura laeng! Idi impagarup ni mammadto Samuel a ti la ketdi manong ni David a ni Eliab ti pinili ni Jehova a sumaganad nga ari iti Israel, imbaga ni Jehova kenkuana: “Dika kitaen ti langana, wenno iti kangato ti kinatayagna, agsipud ta isu saanko nga awaten; ta ni Jehova saan a kumita a kas iti ikikita ti tao; ta ti tao kitaenna ti akinruar a panagparang, ngem ni Jehova kitaenna ti puso.” (1 Samuel 16:7) Wen, ukomen ni Jehova ti kasasaad ti puso, saan a ti itsura. Sika ngay?
[Ladawan iti panid 31]
Ni Samuel ket pinakdaaran ni Jehova a di paallilaw babaen iti itsura