Manipud Managbasatayo
Ubbing ken Gubat Maladladingitanak unay a nangbasa kadagiti serye a “No Ania ti Aramiden ti Gubat Kadagiti Ubbing.” (Oktubre 22, 1997) Maysaak met nga anak ti gubat. Kabayatan ti Gubat Sangalubongan II, uppat ket kagudua a tawen ti binusbosko kadagiti kampo konsentrasion dagiti Hapones idiay Ngawi ken Bandung. Idi sangapulon ti tawenko, naisinaak iti pamiliak ket nagtrabahoak iti pito nga aldaw iti kada lawas iti kainaran ti tropiko—a makurkurangan iti taraon ken agsagsagaba iti beriberi ken disenteria. Ngem saan unay a nakaro dagiti napasarak no idilig iti di mailadawan a kinaulpit a mapaspasaran ita dagiti minilion nga ubbing. Sapay koma ta saankami a maupay iti panangipalubos ni Jehova iti tiempo para kadagiti tattao iti intero a lubong, agraman kadagiti ubbing iti gubat, a maammuanda ti makaliwliwa a karkarina.
R. B., Estados Unidos
Sangabanga a Taba Malidlidayak unay ken maasianak iti bagik. Makatawenen ti napalabas sipud idi inkeddeng ni lakayko a dina kayat nga asawa ti maysa a Kristiano, ket pinapanawnakami nga agina iti nagpintas a balay nga imbagana idi a ginatangna para kaniak. Pimmanglawak. Kasla awanen namnama ti biagko, ket nagpatulongak ken Jehova. Bueno, nakasursuroak iti artikulo a “Leksion Manipud Sangabanga a Taba.” (Oktubre 22, 1997) Impalagipna a mapnekakon iti pagtaraon ken pagkawes ket iyun-unak dagiti interes ti Pagarian.
K. P., Estados Unidos
Parikut Kadagiti Kakabsat Dimteng ti artikulo nga “Agimtuod Dagiti Agtutubo . . . Apay a ti Kabsatko ti Kanayon a Maas-asikaso?” (Oktubre 22, 1997) idi kasapulanmi unay dayta. Tinulongannakami a makaamiris a saan a kanayon a dakes ti saan a pareho a pannakatrato. Ammomi itan nga adda naimbag a rason dagiti nagannak kadakami iti panangipaayda iti ad-adu nga atension kadagiti kakabsatmi. Talaga nga anamonganmi ti artikulo.
B. K., H. K., ken G. U. O., Nigeria
Kinaarimbangaw Sumagmamanon a tawen nga agtartrabahoak iti dakkel a paktoria, ket sagsagabaen ti sumagmamano kadakami nga agkakatrabahuan dagiti epekto ti kinaarimbangaw sadiay. Intugotko ti Nobiembre 8, 1997 a ruar idiay pagtrabahuan (“Arimbangaw—Kakaruan a Mamagpeggad Kadatayo?”), ket inkeddeng dagiti mangimanmanehar a mangaramidda kadagiti kasapulan a panagannad a mangsalaknib iti salun-at amin dagiti trabahador.
R. P., Italia
Marurrurodak iti sumagmamanon a tawen gapu iti kinaarimbangaw ti kaarrubak. Adda negosiona nga agandar agingga nga adalemen ti rabii. No dadduma, makapungtotak unay. Ngem napabilegak a nakaammo nga adda dagiti Kristiano a kakabsat a mabikbiktima met ti arimbangaw ngem dadaerenda babaen iti panagteppel.
T. O., Japan
Adda kaarrubak a mangburburibor kaniak babaen iti bigbigat a panagteleponona. Dagitoy nga artikulo ti nangted kaniak kadagiti nagsayaat a singasing no kasano a tamingek daytoy a banag iti nainggayyeman, Nakristianuan a pamay-an.
J. R., Inglatera
Ni Magellan Talaga nga apresiarek ken tinagiragsakko ti artikulo maipapan ken ni Ferdinand Magellan a napauluan “Ti Lalaki a Nangtakkuat iti Lubong.” (Nobiembre 8, 1997) Idi simmangpet ti artikulo, ad-adalenmi ti maipapan kenkuana iti klasemi kas adda iti maikalima a grado. Ad-adu ti naammuak maipapan kenkuana iti artikulo ngem ti naammuak iti libromi iti social studies. Intedko iti maestrak ti personal a kopiak iti magasin, ket nagustuanna dayta! Sumagmamano nga aldaw kalpasanna, innalak met laeng ti magasin, ket adda nairagpin iti dayta a surat nga agyamyaman manen kaniak.
B. V., Estados Unidos
Nagsayaat a darepdepen no kasano a naparmek ti maysa a determinado a lalaki a kas ken Ferdinand Magellan ti ibubusor ken nadumaduma a pakarigatan tapno maaramidanna ti maysa kadagiti katan-okan a gapuanan iti historia. Pagyamanan iti panagsuratyo iti makapainteres unay a tema.
M. E., Italia