Agpegpeggad Dagiti Orkidia?
Mannakibagay dagiti orkidia. Agtuboda iti daga, kadagiti kayo, wenno uray pay kadagiti kabatuan. Ngem namakdaar ti International Union for Conservation of Nature and Natural Resources (IUCN) nga adu a kita dagitoy nangayed a mula ti mabalin a saan nga agbiag iti gagangay a pagtubtubuanda no agtultuloy a madadael ti aglawlaw a pagtubtubuanda. “Ti pannakabalbaliw ti kadawyan a pagtubtubuanda kaipapananna a dagiti insekto a nasken iti polinasionda maungawen wenno umakarda iti sabali a lugar,” kuna ni Wendi Strahm iti IUCN. “No mapasamak dayta,” kunana pay, “saanen a makapagpaadu ti orkidia.”
Mapattapatta a 20 a porsiento kadagiti lima a milion nga orkidia a mailaklako iti sangalubongan iti tinawen ti maal-ala iti gagangay a pagtubtubuanda. Daytoy, kuna ti IUCN, bianganna ti pannakaitalimeng daytoy napintas a mula. Isu nga irekomendar ti IUCN a dagidiay agtarigagay a gumun-od kadagiti orkidia gatangenda koma dagitoy kadagidiay mapadakkel kadagiti greenhouse imbes a paruten latta dagitoy manipud iti gagangay a pagtubtubuanda.
Adda di kumurang a 20,000 a kita ti orkidia nga ammo ti tao. Dadduma kadagiti mula ti agtayag laeng iti 0.6 a sentimetro; dadduma ti lanot a tumubo agingga iti kaatiddog a 30 a metro. Kaaduan a kita ti orkidia ti agbiag iti nabara, tropikal a luglugar a kanayon nga agtudo. Ngem agpannurayda iti sensitibo a kinatimbeng ti nakaparsuaan tapno agbiagda.
Nakalkaldaang ta ti kinaignorante ken kinaawan annad ti tao ti agtultuloy a mangdadael iti aglawlaw, isu a mamagpeggad iti umad-adu a mulmula, agraman ti orkidia. Ngem mabiiten nga agpatingga daytoy. Iti baro a lubong nga inkari ti Dios, agbiagton ti tao a maitunos iti nakaparsuaan. Iti dayta a tiempo matungpalton dagiti sasao ti salmista: “Ti tay-ak agrag-o koma ken amin nga adda kenkuana; iti kasta amin dagiti kaykayo ti bakir agkantadanto gapu iti rag-o.”—Salmo 96:12.
[Picture Credit Line iti panid 31]
Jardinería Juan Bourguignon
[Picture Credit Line iti panid 31]
Jardinería Juan Bourguignon