Alangonen ti Judicial Chamber ti Russia Dagiti Saksi ni Jehova

AWATEN dagiti Saksi ni Jehova dagiti damag maipapan kadakuada iti warnakan no mapagtalkan ti pannakaisagana dagita a damag. Kasta met a situtulok dagiti Saksi ni Jehova a mangted iti pudno nga impormasion maipapan kadakuada ken dagiti narelihiosuan a pammati ken aramidda. Nupay kasta, no adda maimaldit a palso wenno mamarpardaya nga artikulo maipapan kadakuada, agapelar no dadduma dagiti Saksi kadagiti autoridad iti gobierno tapno ikanawada dagiti narelihiosuan ken sibil a kalinteganda. Usigenyo ti nabiit pay a pagarigan.

Idi Agosto 1, 1997, iti insertna nga agpaay iti rehion ti St. Petersburg, nangipablaak ti Komsomolskaya pravda, maysa a nalatak a Ruso a periodiko iti artikulo a naan-anay a palso ti panangiladawanna kadagiti Saksi ni Jehova. Iti artikulo a napauluan “Sekta a Petersburg. Addanto Siudad-Templo Ditoy,” kinuna ni autor Oleg Zasorin a makadangran ti pammati dagiti Saksi ni Jehova ken labsingen dagiti aramidda ti Konstitusion ti Russia. Ti panangpadpadakes ket buklen kangrunaanna ti panangballikug kadagiti naibasar-Biblia a pammati dagiti Saksi maipapan, kas pagarigan, iti panangyalison iti dara ken relasion iti pamilia. Sa pinanaganan pay ti artikulo a “sekta” dagiti Saksi ni Jehova a kunkunana nga iti panangmatmat dagiti dadduma, isuda “ti kapeggadan kadagiti amin a sekta.”

Nagapelar ti Administrative Center of the Regional Religious Organization of Jehovah’s Witnesses idiay Russia iti Russian Federation Presidential Judicial Chamber for Media Disputes buyogen iti kiddaw a repasuenda dagiti sinaguday ti artikulo, nga ibilang dagiti Saksi ni Jehova a kas makaallilaw. Iti sesion ti Judicial Chamber idi Pebrero 12, 1998, dimmar-ay dagiti pannakabagi dagiti Saksi ni Jehova ket sinungbatanda ti adu a saludsod dagiti miembro ti husgado, agraman dagiti periodista ken abogado. Tapno mapaneknekan ti Judicial Chamber no ania nga agpayso ti pammati ken isursuro dagiti Saksi ni Jehova, inusigda a naimbag dagiti literatura nga impablaak dagiti Saksi ni Jehova, nangnangruna ti libro a Ti Sekreto ti Kinaragsak ti Pamilia.

Kinuna ni V. V. Borshchyov, deputy ti State Duma iti Russian Federation, a bin-ig a negatibo ti ipasimudaag ti ideya a “dagiti sekta.” Kinuna ni Mr. Borshchyov: “Napeggad unay [ti panangusar kadagita a] wayawaya ken nagnagan a mangumsi. Ti kinapudno laengen nga inakseptar ti Judicial Chamber ti panagapelar dagiti Saksi ni Jehova tapno maamirisda ket nakapatpateg. Masapul a mapasardeng ti panagdadarison ti kasta a rikrikna ken pananginsulto kadagiti nairehistro a narelihiosuan nga organisasion.”

Kalpasan ti panangusigda kadagiti amin nga ebidensia, kinuna ti Judicial Chamber a ti artikulo a nagparang iti Komsomolskaya pravda ket maiparit iti linteg ken dakes; natakuatanna pay a napno ti artikulo kadagiti kinaulbod ken awan ti nakaibasaranna. “Awan ti inlanad ti autor nga aniaman nga espesipiko a kinapudno . . . Ti autor iti publikasion ket nangiwaras kadagiti saosao a kas man la mapagtalkan a damag, a nangabusar kadagiti kalintegan dagiti periodista,” kinuna ti Judicial Chamber. Maikontra iti impadamag ti artikulo ti periodiko, natakuatan ti Judicial Chamber a dagiti Saksi ni Jehova ket managtulnog-linteg ken isursuroda kadagiti miembroda nga agbiagda a sitatalna a kadua ti pamilia ken gagayyemda a saanda a kapammatian.

Maysa nga oras kalpasan a nausig ti maudi a testimonia, impaulog ti Judicial Chamber ti desisionna:

“1. A mangbigbig iti pannakaipablaak ti artikulo a ‘Sekta a Petersburg. Addanto Siudad-Templo Ditoy’ kas mailabsing kadagiti ipakalikagum ti Article 4, 49, ken 51 ti Russian Federation Law ‘On the Mass Media.’

“2. A mangirekomendar a repasuen ti State Committee of the Russian Federation Responsible for Printed Matter ti kuestion a panangipaulog iti pakdaar iti editorial board ti periodiko a Komsomolskaya pravda.

“3. A mangipaulog iti pangtinggar ken periodista O. Zasorin.

“4. A mangirekomendar a mangiruar ti editorial board ti periodiko a Komsomolskaya pravda iti panagpadispensar gapu iti pannakaipablaak ti di mapagtalkan nga impormasion a nangumsi nga awan nangibasaranna iti narelihiosuan nga organisasion dagiti Saksi ni Jehova.”

Daytoy a desision ti Judicial Chamber ket maitunos kadagiti konklusion ti narelihiosuan nga eskolar ken kandidato para iti pilosopia a ni Sergei Ivanenko. Kalpasan ti naannad a panangadalna iti pammati dagiti Saksi ni Jehova ken pannakitimpuyogna kadakuada, nagsurat ti di-Saksi ni Jehova a ni Mr. Ivanenko iti artikulo a nagparang iti ruar ti Moscow Newsa a Pebrero 20-​26, 1997. Kinuna ni Mr. Ivanenko: “Naisalsalumina dagiti Saksi ni Jehova iti nabileg a pammatida nga agbiag a maitunos iti Biblia. . . . Para kadagiti Saksi ni Jehova, ti Biblia ti konstitusion, ti pagannurotan ken ti kangrunaan nga ebkas ti kinapudno. . . . Maibilang dagiti Saksi ni Jehova kas pagwadan kadagiti padada nga umili gapu iti debosionda iti kinapudno ti Biblia ken ti awan panagimbubukodan a kinatulokda a mangirupir iti pammatida.”

Ti desision ti Judicial Chamber ken dagiti komento ni Mr. Ivanenko ket mangpasingked manen a ti Nakristianuan a relihion dagiti Saksi ni Jehova ket saan a peggad iti kagimongan no di ket, pagimbagan dagiti amin a tattao a nalinteg ti pusoda. Dagiti Saksi ni Jehova ket kanayon a ‘sisasagana nga agikalintegan iti sanguanan ti tunggal maysa nga agkalikagum kadakuada iti rason maipaay iti namnama nga adda kadakuada, ngem aramidenda ti kasta buyogen ti naalumamay a karirikna ken nauneg a panagraem.’​—1 Pedro 3:15.

[Footnote]