Ti Panangmatmat ti Biblia

Kasano ti Rumbeng a Panangmatmat Dagiti Kristiano iti Misa?

UMANAMONG dagiti napeklan a Katoliko ken Pope John Paul II, a sigun iti The New York Times, nabiit pay a “pinasingkedanna manen nga ibilang ti iglesia a basol no langanan ti maysa a Katoliko ti makimisa.” Ania ti Misa? Agtunos kadi ti iglesia ken ti Biblia iti dayta a tema?

Iti libro a Things Catholics Are Asked About, depinaren ti Katoliko a padi a ni Martin J. Scott ti Misa a kas iti sumaganad: “Ti Misa isut’ saan a buklen ti dara a pannakaisakripisio ti Bagi ken Dara ni Kristo. Ti Kalbario idi isut’ nadara a pannakaisakripisio ni Kristo. Kangrunaanna, ti Misa ket isu met la a sakripisio a kas iti krus. Awan piguratibo nga ebkas, pangyaspingan, wenno panaglablabes.” Kinunana pay: “Ti Misa ti makuna a mangipababa ti Anak ti Dios kadagiti altartayo, tapno Isut’ maidaton iti Kinadiosna.”

Nainkasuratan Aya ti Misa?

Patien dagiti napasnek a Katoliko a ti Misa ket pannursuro a Nainkasuratan. Kas ebidensia, ipatuldoda ti sasao ni Jesus kabayatan ti gagangay a maawagan a Maudi a Pangrabii. Bayat nga imbunongna ti tinapay ken arak kadagiti apostolna, kinuna ni Jesus idi tinukoyna ti tinapay: “Daytoy isu ti bagik.” Idi tinukoyna ti arak, kinunana: “Daytoy isu ti darak.” (Mateo 26:26-28)a Patien dagiti Katoliko nga idi imbagana dagitoy a sasao, aktual a pinagbalin ni Jesus ti bagi ken darana kas tinapay ken arak. Nupay kasta, mamakdaar ti New Catholic Encyclopedia (1967): “Ditay rumbeng nga agpannuray unay iti kinaliteral ti sasao a ‘Daytoy isu ti bagik’ wenno ‘Daytoy isu ti darak.’ . . . Ta kadagiti sasao a kas ‘ti panagani isu ti panungpalan ti lubong’ (Mt 13.39) wenno ‘Siak ti pudno a puon ti ubas’ (Jn 15.1) [ti verbo a “to be” iti Ingles] kaipapananna laeng ti panangiladawan wenno panangirepresentar.” No kasta, admitiren uray daytoy opisial nga encyclopedia a dagiti sasao iti Mateo 26:26-28 dina paneknekan a nagbalin kas literal a bagi ken dara ni Jesus ti tinapay ken ti arak idi Maudi a Pangrabii.

Nalabit malagip ti maysa a naminsan kinuna idi ni Jesus: “Siak ti tinapay a sibibiag a bimmaba manipud langit. . . . Ti mangan iti lasagko, ken uminum iti darak, adda biagna nga agnanayon.” (Juan 6:51, 54) Dadduma kadagidiay dumdumngeg idi ken Jesus impagarupda a literal ti imbagana isu a naklaatda. (Juan 6:60) Ngem nalabit mayimtuodtayo, Talaga kadi a pinagbalin ni Jesus ti lasagna kas tinapay iti daydi nga okasion? Saan a pulos! Piguratibo idi ti sasawenna. Indiligna ti bagina iti tinapay agsipud ta babaen ti datonna isut’ makaipaay iti biag iti sangatauan. Silalawag nga ipamatmat ti Juan 6:35, 40 a ti pannangan ken panaginum ket maaramid babaen ti panamati ken Jesu-Kristo.

Tangay ti Misa ket maysa a kangrunaan a seremonia ti Iglesia Katolika, nalabit namnamaen ti maysa a suportaran dagiti Kasuratan dayta. Dida suportaran. Inlawlawag ti The Catholic Encyclopedia (1913 nga edision) no apay: “Ti kangrunaan a nagtaudan ti doktrinami . . . isut’ tradision, a nanipud pay nagkauna a tiempo indeklaranan ti kinabirtud ti panagpakaasi [panagkiddaw] iti Sakripisio ti Misa.” Wen, tradision, saan a ti Biblia, ti nakaibasaran ti Misa dagiti Romano Katoliko.

Kasano man ti kinapasnek ti pannakasurot ti maysa a tradision, saan a makaay-ayo iti Dios no maikontra dayta iti Biblia. Binabalaw ni Jesus dagiti panguluen ti relihion idi kaaldawanna: “Pinukawyo ti kapapaayan ti bilin ti Dios gapu iti kadawyanyo.” (Mateo 15:6) Tangay impateg ni Jesus ti Sao ti Dios, usigentayo ti pannursuro maipapan iti Misa sigun iti lawag ti Nasantuan a Kasuratan.

Pannakaidaton ni Kristo​—Kasano Kasansan?

Isursuro ti Iglesia Katolika a kada maaramid ti Misa, maidaton ni Jesus, nupay ikalinteganna nga isut’ saan nga aktual a matay ket awanan dara ti daton. Umanamong kadi ti Biblia iti daytoy a panangmatmat? Usigenyo ti Hebreo 10:12, 14: “Idi indatonna [ni Jesus] ti maymaysa a daton gapu kadagiti basbasol a maipaay iti agnanayonen, nagtugaw iti makanawan ti Dios. Ta gapu iti maymaysa laeng a daton inaramidna nga awan pagkurkurangan dagiti mapagsanto a maipaay iti agnanayon.”

Nupay kasta, mabalin a kastoy ti isupiat ti maysa a napasnek a Katoliko: ‘Saan kadi a masapul a masansan nga idaton ni Jesus ti bagina? Agbasoltay amin iti mamin-adu a daras.’ Ti sungbat ti Biblia ket naisurat iti Hebreo 9:25, 26: ‘Saan met a masapul nga idaton [ni Kristo] ti bagina iti mamin-adu. . . . Naminpinsan laeng iti panungpalan . . . isu naiparangarang a maipaay iti panangpukaw ti basol gapu iti pannakaidaton ti bagina met laeng.’ Usigenyo a naimbag daytoy: Ni Kristo ‘saan a masapul nga idatonna a masansan ti bagina.’ Idiay Roma 5:19, ilawlawag ni apostol Pablo no apay: “Gapu iti isusukir ti maysa a tao [ni Adan], dagiti adu naibilangda a managbasol, kasta met gapu iti panagtulnog ti maysa [ni Jesus], dagiti adu maibilangdanto a nalinteg.” Mataytayo amin gapu iti naminsan nga isusukir ni Adan; ti namimpinsan a panangsubbot ni Jesus ti nakaibasaran ti pannakapakawan dagiti basoltay amin a mamati iti dayta a daton tapno mapakawan dagiti basoltayo ita ken tapno matagiragsaktayo ti agnanayon a biag iti masanguanan.

Ania ti nakaidumaanna no naidaton ni Jesus a namimpinsan wenno masansan a maidaton? Panangipakita dayta iti panangapresiar iti kinapateg ti daton ni Jesus. Dayta ti kadakkelan pay laeng a naisagut​—sagut a nakapatpateg, naan-anay, a rumbeng a din maulit.

Talaga a maikari a malaglagip ti daton ni Jesus. Ngem adda nagdumaan ti pananglaglagip iti maysa a pasamak ken ti panangulit iti dayta. Kas pagarigan, ti agassawa a mangselebrar iti anibersario ti kasarda mabalin a malagipda daydi aldaw ti panagkasarda, a dida aktual nga uliten ti seremonia. Kada tawen, laglagipen dagiti Saksi ni Jehova ti anibersario ti ipapatay ni Jesus, nga aramidenda dayta iti wagas nga imbilin ni Jesus​—‘a panglaglagip,’ saan a panangidaton, kenkuana. (Lucas 22:19) Sa iti intero a makatawen, ikagkagumaan dagitoy a Kristiano a sukayen ti nadekket a pannakirelasionda ken Jehova a Dios baeten ken Jesu-Kristo babaen ti panangitunosda iti biagda, ar-aramidda, ken patpatienda iti Sagrado a Kasuratan.

Masansan a ti panangaramid iti dayta kaipapananna ti panangbalbaliwda iti panagpampanunotda. Ngem pagragsakan dagiti Saksi ti pannakaammoda a masagrapda ti bendision no sisusungdo a suportaranda ti Sao ti Dios imbes a ti natauan a tradision. Ket no mamatida iti naidaton a dara ni Jesus, a naibukbok a namimpinsan ken agpaay iti amin iti dandani dua ribu a tawenen ti napalabas, daytat’ mangdalusto kadakuada iti amin a basol.​—1 Juan 1:8, 9.

[Footnote]

[Ladawan iti panid 26]

Ti Misa ni Sn. Giles (detalye)

[Credit Line]

Erich Lessing/Art Resource, NY