Manipud Kadagiti Agbasbasa

Narelihiosuan a Wayawaya Sumagmamanon a dekada nga agbasbasaak iti Agriingkayo!, ket nakapagsuratak tapno iyebkasko ti panangapresiarko iti serye a “Ti Narelihiosuan a Wayawayayo​—Agpegpeggad Kadi?” (Enero 8, 1999) Datin nga ammok nga adda narelihiosuan a panangidumduma idiay Europa kabayatan ti maaw-awagan a Dark Ages ket nagballigi ti Iglesia Katolika a nangkontrol kadagiti autoridad tapno malapdan dagiti tattao a mangalagad iti wayawaya ti konsiensia ken relihionda. Ita ta naammuak ti mapaspasamak idiay Francia, im-imtuodek ti bagik, ‘Apay a daddadaelen daytoy a pagilian ti naganna babaen ti panangipaidamna kadagiti naipatalgeden a narelihiosuan a wayawaya?’ Pangngaasiyo ta pakaammuanyo ti minilion nga agbasbasa iti pagbanagan daytoy a situasion. Agtalekak a mangipakitanto ti Francia iti panagpanuynoy ken nasayaat nga ehemplo iti dadduma pay a pagilian.

C. C., Puerto Rico

Panangpadakkel iti Pito a Babbaro Pagyamanan iti kapadasan da Bert ken Margaret Dickman a naisalaysay iti Enero 8, 1999 a ruar. Talaga a pinaregtanakami a mangpadakkel iti tallo nga annakmi iti wagas a mangtedto kadakuada iti nasayaat a naespirituan a tawid. Nagustuan met dagiti annakmi ti artikulo. Mangngegmi no kua nga agpipinnalagipda maipapan iti makaisuro a kapadasan ni Doug a dina naramanan ti bingayna a cake! Pagyamanan iti panangipablaakyo kadagita a makaparegta a kapadasan.

S. J., India

Nasantuan nga Espiritu Kayatko ti agyaman kadakayo iti nagsayaat nga artikulo a “Ti Panangmatmat ti Biblia: Ania ti Nasantuan nga Espiritu ti Dios?” (Enero 8, 1999) Nupay maysaak a Saksi ni Jehova iti sumagmamanon a tawen, kanayon a kayatko a maammuan ti ad-adu pay maipapan ken Jehova a Dios. Nagsayaat ti panangsungbat daytoy nga artikulo iti paulo a saludsod ken naglaka a maawatan. Bayat nga umun-uneg ti pannakaawatko ken Jehova ken kadagiti pinarsuana, umun-uneg ti panagayatko kenkuana.

Y. B., Russia

Balitok Binasak ti artikuloyo a “Balitok​—Ti Misteriona.” (Setiembre 22, 1998) Kinunayo a natakuatan dagiti Aliado a buyot ti adu a balitok kadagiti pagasinan ti Kaiseroda, idiay Alemania, kalpasan ti isusuko ti Alemania idi 1945. Kinapudnona, sinakup dagiti Aliado a buyot ti pagasinan tallo a lawas sakbay ti panagpatingga ti gubat.

J. S., Alemania

Pagyamanan iti daytoy a pananglawlawag. Agpayso a nasakup dagiti pagasinan ti Kaiseroda idi Abril 4, 1945, nasurok a makabulan sakbay ti isusuko ti Alemania idi Mayo 8, 1945.​—ED.

Aginnaddayo a Panaginnarem Nagabay unayen ti isasangpet kaniak ti artikulo nga “Agimtuod Dagiti Agtutubo . . . Kasano a Mataginayonko ti Aginnaddayo a Panaginnarem?” (Enero 22, 1999) Agnanaedak ditoy Estados Unidos ket nakisinnuratak iti maysa a baro a taga Latin America. Ita pay laeng a napadasak ti nakarigrigat a kasasaad. Talaga a saanmo a maam-ammo ti maysa babaen ti panagsinnurat, uray no ikagumaam ti agbalin a napudno. Tangay aginnaddayokayo unay, agannayaskayo nga agpantasia. Iti kasasaadmi, agsupadi ti kulturami. Idi nagupeden ti relasionmi, panagriknak ket awanen ti serserbi ti biagko. Babaen ti tulong ti naayat, manangsaranay a pamiliak, nadaerak daytoy a kapadasan.

S. H., Estados Unidos

Makisinsinnuratak iti maysa a balasang a naam-ammok iti internasional a kombension dagiti Saksi ni Jehova. Nagrigat nga ilawlawag dagiti kapanunotam iti sabali a tao no agsupadi ti kultura ken lenguaheyo a dua. Isu a rinugiakon nga adalen ti lenguahena. Nagsayaat ti singasing a mangusar iti tape recorder. Pagyamanan unay.

A. S., Alemania

Naam-ammok ti maysa a sister a taga Oriente iti maysa nga internasional a kombension idiay Estados Unidos. Diak sigurado no kasanok nga itultuloy ti makisinnurat kenkuana. Inkararagkon dayta, ket sumagmamano nga aldaw kalpasanna, naawatko daytoy nagsayaat nga artikulo. Nabasak ken inulitkon a binasa. Sinungbatanna amin a saludsodko.

G. R., Italia