Manipud Kadagiti Agbasbasa

Vasco da Gama Nagustuak unay ti artikulo a “Naisangsangayan a Panagdaliasat ni Vasco da Gama.” (Marso 22, 1999) Nayilustrar a naimbag dayta ken makaisuro. Nadakamatyo nga iti panaglayagna adda tallo a babassit a barkona, ngem kinapudnona, adda uppat. Kunayo met a nagsubli ni Da Gama idiay Lisbon idi Setiembre 8, 1499. Nupay kasta, nakadanon iti arinunos ti Agosto.

P. N., Kenya

Pudno nga uppat ti barko ni Da Gama idi rugianna ti aglayag. Nupay kasta, ti paset ti panaglayag a nadeskribir iti introduksion napasamak kalpasan a nadadael ti maikapat a barko. No maipapan iti petsa ti isasangpetna idiay Lisbon, kuna ti kaaduan a reperensia a dayta ket iti rugrugi ti Setiembre. Makapainteres ta kuna ti “Portugal and the Discoveries”: “Dimteng ni Vasco da Gama idi maika-29 ti Agosto wenno iti asideg dayta a petsa, nga inawat ti Ari buyogen ti amin a maiparbeng a seremonia idi Setiembre 8.” Nalabit daytoy ti mamagtunos iti kasla pagdumaanda.​—ED.

Crossword Puzzle Kayatko ti agsurat kadakayo maipapan kadagiti crossword puzzle ti Agriingkayo! Pagay-ayatak dagitoy agsipud ta pagtalinaedenda nga aktibo ti utekko, ket iti edad a 78, kasapulan a ti maysa mapagtalinaedna nga aktibo ti panunotna. No basaentayo ti Biblia, saan a gagangay nga agsepen ti utektayo ti kasta a detalyado nga impormasion kas ti naidatag kadagiti puzzle. Ngarud, iwaywayaak a kitaen amin dagiti naisitar a kasuratan. Pagyamanan iti daytoy a benneg.

J. W., Estados Unidos

Comenius Mangisursuroak iti maysa a grupo dagiti nataengan nga agbasa. Ti nagsayaat nga artikuloyo a “Ni Comenius​—Ti Namunganayan ti Moderno nga Edukasion” (Mayo 8, 1999) tinulongannak a mangtarus no apay a marigatan dagiti dadduma a makasursuro. Dakkelto ti maitulong ti impormasion iti kakuyogna a kahon a napauluan, “Dadduma a Prinsipio ni John Comenius iti Panangisuro.”

N. A. F., Brazil

Pagyamanan iti makaisuro nga artikulo. Ad-adu ti naadalko maipapan ken Comenius manipud iti uppat a panid ti Agriingkayo! ngem iti sangapulo a lecture kabayatan ti panagadalko iti unibersidad.

H. P., Alemania

Biblia Dagiti Katutubo nga Americano Idi nabasak ti artikulo a “Dagiti Katutubo nga Americano ken ti Biblia” (Mayo 8, 1999), nangnangruna a natukay ti interesko iti panangtukoyyo iti John Eliot’s Bible a para kadagiti Massachusett Indian. Nakitami ken lakayko ti maysa a kopia dayta a Biblia iti ibibisitami iti Huntington Library, idiay San Marino, California. Nakaukrad idi iti libro a Salmo, ket adu a daras a makita ti nagan a Jehova. Anian a ragsakmi idi a makitami ti nagan ti Dios iti daytoy Biblia idi maika-17 a siglo!

B. J., Estados Unidos

Panangged ti Ubbing Pagyamanan iti serye a “Panangged ti Ubbing​—Asidegen ti Panagpatinggana!” (Mayo 22, 1999) Idi damok a makita ti akkubna, kinunak iti bagik nga awan pakainaigan dagiti artikulo iti pagiliak. Ngem idi rinugiak a basaen, diakon maisardeng. Ti kinaagpaysuanna, simgarak. Nabiit pay a gimmatangak iti dinait ti ima a teddy bear a nalaklaka nga amang ngem no naaramid koma dayta ditoy Japan. Anian a nakalkaldaang a panunoten nga iti likudan ti kinalakana, adda dagiti nalabit awanan puso a panangtrato kadagiti naganus pay nga ubbing.

S. O., Japan

Timbang Agtawenak iti sangapulo. Pagyamanan iti artikulo nga “Agimtuod Dagiti Agtutubo . . . Kasano a Maparmekko ti Nakaro a Pannakaseknanko iti Kadagsenko?” (Mayo 22, 1999) Sangkapanunotko a sobra ti kadagsenko. Babaen ti panangbasak iti daytoy nga artikulo, natarusak a saan a ti pigura ti maysa a tao ti kapatgan a banag. Napatpateg dagiti kababalin ti maysa.

M. S., Russia