‘Saan Koma a Kastoy ti Lubongtayo’
Nangala iti dakkel nga atension ti panagregget a mangkanselar iti kombension dagiti Saksi ni Jehova idiay Moscow idi napan nga Agosto. (Kitaenyo ti panid 27 ken 28 para kadagiti detalye.) Kastoy ti inreport ni Andrei Zolotov Jr., iti The Moscow Times idi Agosto 21, 1999: “Kinuna ni Vladimir Kozyrev, diputado a direktor ti sports complex, nga umanamong ti administrasion iti pannakaangay ti kombension dagiti Saksi ni Jehova. Kinunana a dina ammo no naggapuan ti bilin [a mangkanselar iti dayta].”
Iti surat a naipablaak iti The Moscow Times maysa a lawas kalpasanna, inapresiar ti maysa a managbasa ti pagiwarnak gapu iti panangipablaakna iti “pudno nga awan dasdasiganna” nga artikulo ket kinunana a “maikari a talaga [daytoy] iti atension dagiti managbasa.” Kastoy ti napaliiwna: “Ti salaysayyo maipapan iti adu a rigat dagiti Saksi ni Jehova a nagsagana para iti tinawen a kombensionda [ibutaktakna ti] di nainkalintegan a pannakatrato[da].”
Sa kinuna ti nagsurat a dagiti Saksi ni Jehova “ket agdindinamag iti lubong (agraman idiay Russia ita) . . . Agdindinamagda kas nasayaat, nasingpet, ken napakumbaba a tattao a nalaka a pakilangenan, a dida piliten ti asinoman ken mannakikappiada iti sabsabali aniaman ti relihionda, uray Orthodox Christian, Muslim wenno Budista. Awan kadakuada ti mapasuksokan, mammartek wenno adikto iti droga, ket simple laeng ti makagapu: Iti amin nga aramiden wenno sawenda, ikagkagumaanda ti agpaiwanwan kadagiti naibasar-Biblia a pammatida. No la koma ta ikagumaan uray kaskasano ti amin a tattao iti lubong ti agbiag maitunos iti Biblia kas ar-aramiden dagiti Saksi ni Jehova, sigurado a saan koma a kastoy a naranggas ti lubongtayo.”
Dagiti autoridad a nangusig ken aktual a nakilangen kadagiti Saksi ni Jehova patalgedanda ti nadakamat a pannakailadawan. Ti kakasta nga autoridad, kas pagarigan, ti nangipaay iti pammalubos kadagiti Saksi a mangbangon iti nagpintas a baro nga Assembly Hall idiay St. Petersburg, Russia. Iti pannakaidedikarna idi Setiembre 18, napusek ti pasdek iti 2,257 a tattao a sirarag-o a nagobserbar, ken kanayonan a 2,228 a nagimdeng iti programa kadagiti Kingdom Hall idiay St. Petersburg ken idiay sanga nga opisina dagiti Saksi ni Jehova iti kabangibang a Solnechnoye.