Ti Panangmatmat ti Biblia

No Kasano a Daeran ti Kinaawan Namnama

GAGANGAY ti kalkalainganna laeng a kinaawan namnama iti amin a tattao. Ngem para iti dadduma, nagkaro ti kinaawan namnamada ta kaykayatdan ti matay ngem ti agbiag pay.

Ipakita ti Biblia nga uray dagiti matalek nga adipen ti Dios ket saan a maipuera kadagiti parikut ken rigat a mangiturong iti kinaawan namnama. Usigenyo kas pagarigan da Elias ken Job​—agpadada a nangtagiragsak iti nasayaat a pannakirelasion iti Dios. Kalpasan nga inkanawa ni Elias ti biagna manipud iti nadangkes a ni Reyna Jezebel, ‘dinawatna [ken Jehova] nga isu matay koma.’ (1 Ar-ari 19:1-4) Agsasaruno a trahedia ti napasaran ti nalinteg a lalaki a ni Job, agraman ti nakaar-ariek a sakit ken ti ipapatay ti sangapulo nga annakna. (Job 1:13-19; 2:7, 8) Ti kinaawan namnamana ti gapu a naibagana: “Kaykayatko ti matay ngem ti agsagaba.” (Job 7:15, The New English Bible) Nalawag a nagsaem idi ti sinagaba dagitoy a matalek a tattao ti Dios.

Para iti dadduma iti kaaldawantayo, ti kinaawan namnama ket mabalin a gapu kadagiti nasaem nga epekto ti panaglakay wenno panagbaket, ti ipapatay ti katakunaynay, wenno nakaro a rigat iti pinansial. Ti kanayon a danag, agpaut nga epekto ti nakas-ang a kapadasan, wenno dagiti parikut iti pamilia ti mangiparikna iti dadduma nga arigna aglanglangoyda iti tengnga ti taaw, ket tunggal allon ti ad-adda a mangparigat iti itatakdangda. Kinuna ti maysa a lalaki: “Mariknam nga awan serserbim​—kas man la awan ti maikawa apaman a nataykan. No dadduma, saanmon a maibturan ti kinalidaymo.”

Iti dadduma a kasasaad, ti simmayaat a kasasaad ti mangbang-ar iti daytoy nakaro a pakarigatan. Ngem kasano ngay no saan nga agbalbaliw dagiti kasasaadtayo? Kasanonatayo a matulongan ti Biblia a mangdaer iti kinaawan namnama?

Makatulong ti Biblia

Adda abilidad ken pannakabalin ni Jehova a nangpabileg kada Elias ken Job kadagiti pakarigatanda. (1 Ar-ari 19:10-12; Job 42:1-6) Anian a makaliwliwa a maammuantayo dayta kadagitoy nga aldaw! Kuna ti Biblia: “Ti Dios maysa a kamang ken pigsa maipaay kadatayo, maysa a saranay a sisasagana a masarakan bayat dagiti riribuk.” (Salmo 46:1; 55:22, NW) Nupay kasla nakaron ti kinaawan namnamatayo, ikari ni Jehova a “kanayon nga iggamannatayo a siiirut babaen ti makannawan nga imana ti kinalinteg.” (Isaias 41:10, NW) Kasanotayo a masagrap daytoy a pannaranay?

Ilawlawag ti Biblia a babaen ti kararag ‘ti talna ti Dios a mangringbaw iti amin a panunot aywanannanto dagiti pusotayo ken dagiti pannakabalin ti isiptayo babaen ken Kristo Jesus.’ (Filipos 4:6, 7) Gapu iti rigattayo, mabalin a kasla awanen ti solusion ti problematayo. Ngem no ‘reggetantayo ti agkararag,’ maaywanan ni Jehova dagiti puso ken panunottayo, nga ipaayannatayo iti bileg a kasapulan tapno makapagibturtayo.​—Roma 12:12; Isaias 40:28-31; 2 Corinto 1:3, 4; Filipos 4:13.

Magunggonaantayo babaen ti panagbalintayo nga espesipiko kadagiti kararagtayo. Nupay mabalin a narigat nga iyebkas ti pampanunotentayo, ditay koma bumdeng nga iyebkas ken Jehova ti riknatayo ken ti maawatantayo a pakaigapuan ti parikuttayo. Masapul nga umararawtayo kenkuana a pabilgennatayo iti kada aldaw. Adda pammatalgedtayo: “Ti tarigagay dagidiay agbuteng kenkuana aramidennanto [ni Jehova], ken ti panagpatulongda denggennanto, ket isalakannanto ida.”​—Salmo 145:19, NW.

Malaksid iti panagkararag, masapul a saantayo nga agputputong. (Proverbio 18:1) Napabileg ti dadduma babaen ti panangusar iti panawen ken pigsada a tumulong kadagiti sabsabali. (Proverbio 19:17; Lucas 6:38) Usigenyo ti maysa a babai nga agnagan Maria,a a saan laeng a nakidangadang iti kanser no di ket natayan iti walo a miembro ti pamilia iti las-ud laeng ti makatawen. Masapul idi a piliten ni Maria ti bumangon ken itultuloyna ti nakairuamanna nga aramiden. Dandani inaldaw a rimmuar tapno suruanna ti dadduma maipapan iti Biblia, ken regular a timmabuno kadagiti Nakristianuan a gimong. No agawid, sumken manen ti nakaro a kinaliday ni Maria. Ngem babaen ti panangpanunotna no kasano a matulonganna ti dadduma, nakapagibtur ni Maria.

Ngem kasano ngay no marigatantayo nga agkararag wenno ditay kabaelan ti lumung-aw a datdatayo? No kasta, masapul nga agpatulongtayo. Paregtaennatayo ti Biblia nga agpatulongtayo kadagiti “lallakay iti kongregasion.” (Santiago 5:13-16) Kinuna ti maysa a lalaki a nabayagen nga addaan iti nakaro a panagleddaang: “No dadduma, makatulong ti pannakisarita iti pagtalkam a tao tapno mabang-aran ti panunot ken agkalma ti riknam, tapno agbalin a nalimbong ti panunotmo.” (Proverbio 17:17) Siempre, no ti napaut ken nakaro a kinaawan namnama ket mangipasimudaag iti maysa a sakit, mabalin a kasapulan met ti tulong dagiti propesional.b​—Mateo 9:12.

Nupay awan dagiti nalaka a solusion, ditay koma tagibassiten ti abilidad ti Dios a tumulong kadatayo a mangdaer kadagiti problematayo. (2 Corinto 4:8) Makatulong iti panagbalintayo manen a nabileg ti panagregget nga agkararag, saan a panagputputong, ken panagkiddawtayo iti mapagtalkan a tulong. Ikari ti Biblia a naan-anay a pagpatinggaenton ti Dios ti amin a pakaigapuan ti nakaro a kinaawan namnamatayo. Determinado dagiti Kristiano nga agpannuray kenkuana bayat nga ur-urayenda ti aldaw inton dagitoy “immun-una a banag saandanto a maipalagip.”​—Isaias 65:17, NW; Apocalipsis 21:4.

[Dagiti Footnote]