Talaga Aya a Dakes Unay?

KAS nakitatayon, gapu iti Internet, ti pornograpia ket naglakan a mabuya dagiti adulto ken ubbing. Rumbeng aya a maseknanka? Talaga aya a dakes ti pornograpia?

Pagarupen ti dadduma nga awan pagdaksan ti apagbiit laeng a panagbuya iti pornograpia. Nupay kasta, maisupadi ti ipakita dagiti mapaspasamak. Amirisem ti agassawa a kasla pagwadan ti panagasawada. Natalgedda iti pinansial, ken pagay-ayatda ti agbiahe. Impagarup ti gagayyemda a nasinged, nadungngo, ken napasnekda, ket iti adu a pamay-an, agpayso dayta.

Ngem rimsua dagiti parikut idi rinugian ti lalaki ti nagbuya iti pornograpia. Nagsurat ti babai iti nalatak a kolumnista a mamalbalakad, ket insalaysay ti madanagan nga asawa dagiti pakaseknanna: “Idi damo a binusbos ni lakayko ti adu a tiempo iti computer agingga iti tengnga ti rabii ken iti parbangon, imbagana kaniak nga ‘agsuksukimat.’ Maysa a parbangon, simrekak iti kuarto a dina napakpakadaan ket nasukalak nga agbuybuya iti [pornograpia] . . . Imbagana a panagusiuso laeng dayta. Idi minatmatak a naimbag ti buybuyaenna, makapasubkar dayta. Nabainan ket inkarina nga isardengnan, ket pinatik ti imbagana. Kankanayon nga isut’ mararaem​—lalaki a mangtungpal iti saona.”

Iti damo, adu ti mairaman iti pornograpia gapu iti panagusiuso, kas iti daytoy a lalaki. Agusarda iti Internet no adalemen ti rabii wenno iti parbangon tapno saanda a masukalan. No masukalanda, masansan nga aglibakda, kas ti inaramid daytoy a lalaki. Nainkalintegan kadi a kunaen ti maysa a tao a saan a dakes ti maysa a “pagesman” a manggutugot iti maysa a “lalaki a mangtungpal iti saona” nga aglibas iti tengnga ti rabii ken aglibak iti ay-ayatenna?

Ti kasta nga ugali mabalin nga agtungpal iti grabe a personal a parikut ken parikut ti pamilia. Inadmitir ti dadduma a ti panagbuya iti pornograpia linapdanna ida a maaddaan iti nasinged a relasion iti sabsabali. Dida kayat ti makilangen iti sabsabali bayat a pennekenda ti derrepda iti pornograpia. Agar-arapaap ti tattao no agbuyada iti pornograpia. Ti panagarapaap di makapatanor iti nabileg a relasion iti maysa a tao wenno makaipaay kenkuana iti abilidad nga agbiag iti agpaypayso a lubong. Talaga kadi a saan a napeggad ti pagpalpaliwaan a mangisina iti tattao kadagidiay maseknan unay kadakuada?

No dadduma, dagiti tattao nga agbuya wenno agbasa iti pornograpiko a material marigatanda pay a mangtagiragsak iti normal a seksual a pannakidenna iti asawada. Tapno maawatam no apay, amirisem ti orihinal a panggep ti Dios kadagiti agassawa. Siaayat nga inikkanna dagiti agassawa iti kabaelan a siraragsak a mangyebkas iti panaginnayatda babaen ti nadayaw a seksual a panagdenna. Ipakita ti Proverbio 5:18, 19 a nairanta dagitoy a pagragsakan: “Pagrag-oam ti asawa ti kinaagtutubom . . . dagiti barukongna pennekendaka koma a kankanayon; ket makayawanka koma nga agnanayon iti ayatna.”

Mapaliiwmo a ti ayat ti nakaibatayan ti seksual a panagdenna. Mangpatpatanor aya iti nabara a singgalut ti ayat ken kinasinged ti lalaki nga agbuybuya iti pornograpia? Saan, kaaduanna, penpenkenna laeng ti bukodna a seksual a tarigagay. Ti kasado a lalaki nga agbuya iti pornograpia nalabit rugiannan a matmatan ti asawana a maysa laeng nga alikamen​—daydiay adda nga agpaay laeng a pagragsakanna. Saan a kastoy ti dignidad ken dayaw a pinanggep ti Namarsua nga ipaay dagiti lallaki kadagiti babbai. (1 Pedro 3:7) Makaay-ayo kadi ti ugali a mangdadael iti kasingedan nga aspeto ti panagasawa?

Maysa pay, ti maibilang a panagusiuso laeng mabalin nga agtungpal iti pannakaigamer. Kuna ti maysa a mannurat: “No kasano a dagiti adikto ti droga kasapulanda ti nasamsamay a droga tapno ‘maragsakanda,’ kasta met dagiti agbuybuya iti pornograpia kasapulanda ti naal-alas pay a mabuya tapno ad-adda a maganasanda.”

Nalawag a kasta ti napasamak iti asawa a lalaki a nadakamat itay iti daytoy nga artikulo. Maysa a rabii, sumagmamano a bulan kalpasan nga inkarina nga isardengnan ti agbuya iti pornograpia, nagawid ni baketna ket nasukalanna ti asawana iti sanguanan ti computer. Nakita ti babai iti langa ni lakayna nga adda dakes a mapaspasamak. “[Isut’] agnernerbios ken maup-upay,” kinuna ti babai. “Miningmingak ti computer, ket sigurado, buybuyaenna ti nakaal-alas unay a pabuya. Imbaga ti lalaki a napasnek idi inkarina a sumardengen, ngem basta dina maisardeng dayta.”

Gapu iti pagdaksan ti pornograpia ken nalaka a mabuya, nainkalintegan a maseknanka. Kasano a masalaknibam ti bagim ken dagiti annakmo? Ti maudi nga artikulo daytoy a serye amirisenna dagiti sungbat dayta a saludsod.

[Ladawan iti panid 6]

Makadadael iti moral ti pornograpia