Manipud Olympia Agingga iti Sydney
ADU ti mangibilang iti Olympic Games a kapatgan a pagsasalipan dagiti atleta iti lubong. “Awanen ti sabali nga isport a mangatrakar iti kasta unay nga atension,” kuna ti The World Book Encyclopedia. “Sumagmamano a milion a tattao ti agbuya kadagiti ay-ayam, ken ginasut a milion iti intero a lubong ti mangbuya kadagitoy iti telebision.”
Ababa a Pakasaritaan
Nangrugi ti Olympic Games rinibribu a tawenen ti napalabas. Gapu ta patien dagiti nagkauna a Griego a maay-ayo ti kararua dagiti natay kadagiti paay-ayam, nangangayda kadagiti nasional a piesta a pakairamanan ti relihion ken ti paay-ayam. Nairaman kadagitoy ti Isthmian, Nemean, Olympic, ken Pythian games. Kadagitoy, naidaydayaw unay ti Olympics, ta dagitoy indaydayawda ni Zeus, nga imbilang dagiti Griego nga ari dagiti didios.
Sigun iti ebidensia, ti immuna nga Olympics impabuyana laeng ti maymaysa a salip, ti salip a pannagna. Ngem idi agangay, inramandan ti dadduma a salip, kas iti salip dagiti karuahe ken nainget a panangsubok iti kinaandur. Adu a bisita a naggapu iti amin a lugar ti immay nagbuya iti okasion. Tapno masigurado ti kinatalgedda, adda tulagan a nangiparit iti gubat iti sumagmamano a tiempo agpadpada sakbay ken kalpasan dagiti ay-ayam.
Idi nagturay ti Roma, nangrugin a naglumen ti Olympics. Kinapudnona, medio linais ti adu a Romano ti panagay-ayam, malaksid ni Emperador Nero. Nakiraman kadagiti ay-ayam idi 67 K.P. ket nangabak iti amin nga ay-ayam a nakisalipanna. Kasla pinangabak ti dadduma a nakisalip tapno saanda a mapagpungtot! Aniaman ti kasasaad, naisardeng ti Olympics idi 394 K.P.
Pannakaisubli ti Olympics
Ag-15 a siglo kalpasanna, ti nakabakab dagiti arkeologo nga Aleman iti tanap ti kadaanan nga Olympia insublina manen ti panaginteres kadagiti ay-ayam. Kalpasanna, insingasing ti 29-anyos a Pranses a ni Baron Pierre de Coubertin ti panangisubli iti okasion. Isu nga idi 1896, naangay ti immuna a moderno nga Olympic Games idiay Atenas. Nanipud iti dayta a tawen, maang-angayen ti Olympics iti kada uppat a tawen, malaksid kadagiti manmano a kasasaad.
Itatta, adu ti magagaran a mangur-uray kadagiti panagay-ayam. Ita a tawen, maangay dagitoy idiay Sydney, Australia, manipud Setiembre 15 agingga iti Oktubre 1. Mairaman ti 28 nga ay-ayam, 292 a salip, ken 635 a sesion, a pakiramanan ti nasurok a 10,300 nga atleta.
Nupay kasta, kadagiti kallabes a tawen, nagbalinen a kontrobersial ti Olympics. Adu a tattao ti agkuna pay ketdi a madaddadaelen dagiti kalat ti Olympics. Ti panangsukimat kadagiti nalimed a mapaspasamak adut’ ibutaktakna ken makariribuk.
[Picture Credit Line iti panid 3]
Scala/Art Resource, NY