Dagiti Annak iti Masanguanan?
Tawen 2050. Iti klinika a mangtamtaming iti panagsikog, sigagagar a buybuyaen ni Melissa ti iskrin ti computer. Agpampanunot. Ngamin, narikut a banag ti panangpili iti kayatmo nga anak, banag a rumbeng a di mayap-apura. Ipakita ti iskrin ti ladawan ti nakaisem a balasitang a pinanagananen ni Melissa ken ti misterna a ni Curtis iti Alice. Adu ti ibaga ti ladawan ken ti naimaldit nga impormasion iti babana maipapan iti tao a pagbalinanto ni Alice, agpadpada iti pisikal ken mental.
Di pay naipasngay ni Alice. Ti balasitang iti masakbayan ket sikog pay laeng a sitatalged a naidulin iti -200 a degree Celsius a kadua ti adu a dadduma pay a sikog iti asideg a kuarto. Na-scan wenno naaramid a ladawan a mabuya iti computer ti pakabuklan ti kasasaad ti gene ti tunggal sikog sa naiserrek iti computer tapno matulongan dagiti nagannak a mangpili no ania kadagitoy ti maimula iti aanakan ni Melissa.
Tangay babai ti kayat da Melissa ken Curtis nga anak, impuerada dagiti lallaki a sikog. Insaruno dagiti nagannak a sinukimat dagiti kalidad ti nabati pay a sikog kas iti manamnama a salun-at, langa, ken ugali dagitoy. Kamaudiananna, nagpilin da Melissa ken Curtis. Siam a bulan kalpasanna, maragsakanda idi naipasngay ti balasang a pinilida—ti talaga a sibibiagen a ni Alice.
DAYTOY nga estoria ket napaababa a naggapu iti salaysay ni Lee Silver, maysa a propesor ti molecular biology idiay Princeton University, New Jersey, E.U.A. Dayta ti pagarupenna a mabalin a mapasamak kadagiti sumarsaruno a dekada. Imbasarna dagiti kapanunotanna iti maar-aramiden a panagsirarak ken teknolohia. Mabalinen a sukimaten dagiti sikog ti tao tapno mailasin ti dadduma a sakit a maigapu iti gene. Ket nasurok a 20 a tawen a maar-aramiden dayta nanipud idi naipasngay ti kaunaan a maladaga a napatanor babaen ti test-tube. Gapu ta nabukel dayta iti petri dish (pagpatanoran iti bakteria), isu ti kaunaan a tao a nabukel iti ruar ti aanakan ti inana.
Gapu ta Alice ti impanagan ni Dr. Silver iti ubing, nalabit ipalagipna kadatayo ti nalatak a sarsarita nga Alice in Wonderland. Kinapudnona, ti masanguanan a segseggaan ti adu ket maysa a nakaskasdaaw a daga. Kastoy ti kinuna ti maysa nga editorial iti mararaem a magasin a Nature: “Ti rumangrang-ay a pannakabalin ti molecular genetics ipanamnamana a kabaelantayto a balbaliwan ti klase dagiti tattao a kas kadatayo.”
Iti sumaganad nga artikulo, amirisentayo ti dadduma a nagrang-ayan ti biotechnology, nga ipamaysatayo a nangnangruna ti namnama a “maparang-ay” ti sangatauan. Ti kadi maar-aramid kadagiti laboratorio itatta apektarandanto ti biagmo wenno ti biag dagiti annakmo? Adu ti mamati a kasta.