Adda Alkoholiko iti Pamilia

“Ti alkoholismo iramanna dagiti alkoholiko . . . Nupay adda maysa laeng nga alkoholiko iti pamilia, agsagaba ti intero a pamilia gapu iti alkoholismo.”—Dr. Vernon E. Johnson.

NAKAIDDA ti lima ti tawenna a ni Alice, a nakaut-ut-ot ti sakana. Nasemento ti sakana gaput’ pannakabullona dua nga aldawen ti napalabas. Ngem nakair-irut ti pannakasementona, ket lumlumtegen ti sakana gapu iti kinairutna. Indawat ni Alice nga isut’ ipan dagiti dadakkelna iti doktor, ngem di pay naunawan ti amana gapu iti pannakabartekna, ket mariribukan ti inana no ania ti umun-una nga asikasuenna.

Iti las-ud ti sumagmamano nga aldaw, nabibinegen ti saka ni Alice. Idi nagtedteden ti nangisit a danum iti tangan ti sakana, dagiti dadakkelna ti dagus a nangipanen kenkuana iti ospital. Idi naikkat ti semento, natalimudaw ti maysa a nars idi nakitana ti saka. Nasken a maputed ti saka ni Alice gapu iti gangrena.

Alkoholismo ken ti Pagpannurayanna

Saan laeng a ti pannakapukaw ti maysa a saka ti nakalkaldaang itoy a pasamak. Maysa nga alkoholiko ti ama ni Alice. Gapu ta kasta, awan pannakipagriknana ken dina matulongan ti balasangna idi isut’ makasapul unay kenkuana. “Sapulen ti alkoholismo ti panangiyud-udi ti alkoholiko iti pamiliana—kalpasan ti alkohol ken dagiti amin a kalikagumanna,” kuna ti manangbalakad a ni Toby Rice Drews.

Ti ngay ina ni Alice? Adda met pagpannurayanna, saan nga iti alkohol, no di ket iti asawana nga alkoholiko. Gagangay a ti saan nga alkoholiko nga asawa naan-anay nga ikagkagumaanna a pasardengen ti panagin-inum ti alkoholiko wenno mangibtur iti di mapakpakadaan nga ugalina.a Naigamer iti parikut ti alkoholiko ta agpannuray met laeng iti ug-ugali ti alkoholiko—nupay saan nga aginum. Gapu itoy, dagiti tao a kas iti ina ni Alice masansan a maawaganda pagpannurayan.

Agpadpada ti alkoholiko ken ti pagpannurayanna a tengtenglen ti maysa a banag wenno ti maysa a tao a saan a ti bagida a mismo. Agpadpadada a binulsek ti panangiliblibakda nga adda personal a parikutda. Agpadpadada a di makatulong kadagiti annakda. Agpadpadada a maup-upay, ta no kasano a di matengngel ti alkoholiko ti panagin-inumna, ti pagpannurayanna dina met matengngel ti alkoholiko, ket awan kadakuada a dua ti makatengn

gel iti epekto ti alkoholismo kadagiti annakda.

Ngem adda tulong agpaay iti alkoholiko ken iti pamiliana. Maamiristo daytoy kadagiti sumaganad nga artikulo.

[Footnote]