Mabalin a Maimbagan

“Naipasangotayo iti panagpili: Sumardeng nga aginum ken maimbagan, wenno ituloy ti aginum ken matay.”—Maim-imbagan nga alkoholiko.

PANUNOTENYO a kellaat a nariingkayo iti maysa a rabii ket naammuanyo a maur-uramen ti balayyo. Iti sumagmamano a kanito dimteng ti tulong, ket naiddepen kamaudiananna ti apuy. Mabalin kadi a basta agsublikayon iti uneg ket agpammarang nga awan ti napasamak? Saan la ketdi. Nadadael ti balay, ket masapul ti panangtarimaan sakbay a maitultuloy ti gagangay a kasasaad ti biag. Naipasango ti umasping a karit iti alkoholiko no mangrugin nga agpaimbag. Dinadael ti alkohol ti biagna, nalabit iti adu a tawtawen. Ita likliklikannan dayta. Kaiyariganna naiddepen ti “apuy,” ngem nasken dagiti kangrunaan a panagbalbaliw iti kababalin, estilo ti panagbiag, ken ugali tapno agtalinaed a saan nga aginum ti alkoholiko. Dagiti sumaganad a singasing matulonganda ti alkoholiko a maaddaan iti manayon a panagannad.

1. Ammuen ti Kabusor

Kuna ti Biblia a dagiti derrep ti lasag “isuda ti manggubat iti kararua.” (1 Pedro 2:11) Ti sao a Griego a naipatarus a “manggubat” literal a kaipapananna ti “panagserbi iti militar,” ket ipasimudaagna ti makadadael a pannakigubat.—Idiligyo iti Roma 7:23-25.

No kasano a dagiti naimbag a soldado mangipaayda iti tiempo a panangadal kadagiti taktika ti kabusor, ti alkoholiko masapul a sursuruanna ti bagina maipapan iti kasasaad ti alkoholismo ken no kasano a perdienna ti alkoholiko ken dagidiay nasinged kenkuana.a—Hebreo 5:14.

2. Baliwan ti Panagin-inum ken Panagpampanunot

“Ti panagteppel kaipapananna ti panangidian iti bote ken ti panagub-ubingan,” kuna ti maysa a mangngagas. Iti sabali a pannao, saan laeng a ti panagin-inum ti baliwan; masapul met a baliwan ti kinatao.

Nainsiriban a mamalakad ti Biblia: “Agbalbaliwkayo babaen ti panangpabaro iti isipyo.” (Roma 12:2) “Uksobenyo ti daan a personalidad agraman dagiti ar-aramidna.” (Colosas 3:9) No mabaliwan ti panagtignay ngem agtalinaed ti personalidad, basta umakar laeng ti alkoholiko iti sabali a pagpannurayan—wenno agsublinto iti dati.

3. Maaddaan iti Mannakaawat a Pagipudnuan

Kuna ti maysa a proverbio ti Biblia: “Ti suminsina birukenna ti tarigagayna met laeng; ket karungsotna ti amin a natarnaw a kinasirib.” (Proverbio 18:1) Uray pay no agteppel, ti alkoholiko nalaka a mangikalintegan. Ngarud, masapulna ti mannakaawat ngem natibker a pagipudnuan (a masansan a maawagan mangsaranay). Makagunggona no ti pagipudnuanna ket maysa met a maim-imbaganen nga alkoholiko a nagballigin a nangsaranget kadagiti karit iti panagteppel. (Idiligyo ti Proverbio 27:17.) Masapul a dayta a pagipudnuan ket raemenna ti relihiuso a pammati ti alkoholiko ken managsakripisio ken kankanayon a makaipaay iti pannaranay.—Proverbio 17:17.

4. Aganuskayo

Main-inot ti panagimbag. Masapul ti alkoholiko ti adu a tiempo a mangbalbaliw iti panagbiagna. Mabalin nga adda pinansial a pakarigatan, rigat iti trabaho, riribuk iti pagtaengan. No saan nga uminum ti alkohol dina kayat a sawen nga awanen dagiti parikut. Ti maim-imbagan nga alkoholiko mabalin nga agdanag iti damo bayat ti panangsarangetna iti biag nga awan ti arak a ‘pangrisotna iti parikut.’ No kasla din magebgeban dagiti pakadanagan, ti maim-imbagan nga alkoholiko masapul a lagipenna dagiti sasao ti salmista: “Iyallatiwmo ti awitmo ken Jehova, ket saranayennakanto. Dinanto ipalubos a magaraw ti nalinteg.”—Salmo 55:22.

5. Maaddaan kadagiti Nasayaat Panagpampanunotna a Kakadua

Rebbeng nga imtuoden ti alkoholiko ti bagina met laeng: ‘Dagiti kakaduak saranayenda kadi ti panagteppelko wenno kankanayon a pagsasaritaanda “dagidi nararagsak nga al-aldaw,” a mangiparikna kaniak nga adda mapalpalabesko?’ Kuna ti Proverbio 18:24: “Adda kakadua a mamagsisina iti maysa ken maysa, ngem adda gayyem a nadekdekket ngem kabsat.” Masapul iti pannakaawat tapno makita no asino dagiti pudno a gagayyem ken dagidiay makadangran a kakadua.

6. Liklikan ti Nalabes a Panagtalek

“Maragsakanak—diak pay kayaten ti uminum a pulos!” Ti alkoholiko nga agsao iti kastoy ket nalabes ti panangipapanna iti irarang-ayna ken tagtagibassitenna ti pannakabalin ti alkoholismo. Ti panagragsak iti pangrugian ti pannakaimbag, a maawagan nasapa unay a pananginanama, ket apagkanito laeng. “Ikagumaanyo ti natimbeng a panangmatmat,” irekomendar ti libro a Willpower’s Not Enough. “No awan dayta isarsarangyo ti bagiyo nga agsubli nga aginum, ket narigrigatyonto a parmeken.”—Idiligyo ti Proverbio 16:18.

7. Agannad kadagiti Maisukat a Pannakaadikto

Adut’ agsardeng nga uminum, ngem makapataudda iti saksakit iti pannangan wenno agbalinda a workaholics (nalabes panagtartrabahona), di magawidan a sugador, ken dadduma pay. ‘Aniat’ pagdaksanna? Saanak met nga umin-inum,’ mabalin nga agrason ti alkoholiko. Pudno, dadduma a pisikal a paglinglingayan mabalin a makagunggona. Ngem aniaman a taraon wenno aramid a mangbibineg iti rikriknayo, mangiturong laeng iti ulbod, apagkanito a pannakarikna iti kinatalged.

8. Makibagaykayo iti Baro nga Akem ti Pamilia

Adut’ alkoholiko a mangperdi iti panagimbagda no mangrugin a sumayaat dagiti bambanag! Apay? Gapu laeng ta ti panagteppel ket baro a kapadasan. Mabalin a marikna ti alkoholiko a maawis iti nakairuamanna nga estilo ti panagbiag. Mainayon pay, no saanen nga agin-inum ti alkoholiko, isut’ mamataud iti pannakabalbaliw ti pamilia. Ngarud, tunggal kameng ti pamilia masapul a baliwanna ti akemna. “Ti intero a manuskrito a suroten ti pamilia masapul a maibelleng ket masukatan iti baro,” kuna ti polieto a Recovery for the Whole Family. Gapuna, ti panagimbag ramanenna ti intero a pamilia.—1 Corinto 12:26.

9. Annadan ti Panagsubli

Ti nalabes a panagtalek, di nasayaat a kakadua, kapilitan a pangsandi, ken ti ad-adda a panangiputputong ti bagi mabalin a pakaigapuan ti panagsubli. Taginayonenyo ti kankanayon a pannakisarita iti pagipudnuanyo maipapan kadagita a pagannayasan.

Kuna ti maysa a maim-imbaganen nga alkoholiko: “Agsardeng amin nga alkoholiko nga aginum. Nagasat ti dadduma kadakami ta simmardengkami bayat a sibibiagkami pay.”

[Dagiti Footnote]

[Kahon iti panid 7]

No Nasken Unay ti Pannakaagas

Aniaman nga agas nga addaan alkohol mabalin a riingenna ti panagtarigagay ket gutugotenna ti maysa nga agsubli.

Insurat ni Dr. James W. Smith: “Gagangay laeng ti panagsubli ti pasiente kalpasan ti adu a tawen a panagtepteppel kas resulta ti panagtomarna iti cough syrup nga addaan iti alkohol.” Ti alkoholiko nalaka a magargari dagiti amin a pangpakalma. No nasken unay ti panagagas iti pangpakalma, ti alkoholiko masapul nga . . .

1.agkonsulta iti parmasiutika tapno maikeddeng dagiti pagpeggadan.

2.ipakaammona iti pagipudpudnuanna, ket no mabalin, isut’ awaganna sakbay ti panagtomarna.

3.irekordna ti tunggal panagtomarna.

4.isardengna ti panagtomar iti kabiitan a tiempo.

5.ibellengna amin a di natomar nga agas no naimbaganen ti sakit a nakairantaanna.