Ti Panangmatmat ti Biblia
Rumbeng Kadi a ti Zodiak ti Mangimpluensia iti Biagmo?
“ADU NGA AGTUTUBO KEN NATAENGAN TI AGSAPSAPUL ITI SIGNO TI GASATDA KADAGITI BITUEN.”—POPE JOHN PAUL II.
SIGUN iti maysa a surbey, 1 iti kada 4 nga Americano ti agusar iti astrolohia no agdesisionda. Saan laeng nga iti dayta a paset ti lubong a mapagkonsultaan dagiti astrolohikal a signo. Dandani iti intero a lubong, ti zodiak ket mapagkonsultaan para iti pammagbaga maipapan kadagiti pinansial a banag, plano iti panagbiahe, panagbalbaliw ti karera, petsa ti panagkasar, ken namilitariaan nga estratehia. Kunada pay a maisuro ti maysa a signo iti zodiak no siasino dagiti manamnama nga agassawa ken maipalgakna pay no siasino dagiti agassawa a dinto agkatunosan. Manipud Daya agingga iti Laud, minilion ti naallukoyen ti astrolohia. Ngem ania ti nagtaudan ti zodiak?
Historikal a Nalikudan
Matunton ti nadumaduma a kita ti zodiak kadagiti pagaammo a kadaanan a sibilisasion. Uray ti Biblia, dakamatenna ‘dagiti konstelasion ti zodiak.’ (2 Ar-ari 23:5, NW) Nabatad nga iti zodiak ti nagkonsultaan dagiti Hindu agraman dagiti Tsino, Egipcio, Griego, ken dadduma pay a tattao idi un-unana. Nupay kasta, masarakan iti kadaanan a Babilonia dagiti kaunaan a pannakadakamat dagiti signo iti zodiak.
Pinatanor dagiti taga Babilonia ti astrolohia tapno maammuanda ti masakbayan. Bayat a napaliiw ti panaggaraw dagiti nailangitan a banag, naputar dagiti nagarbo a tsart ken diagrama. Manipud kadagitoy, naipadles dagiti aramid ti tattao ken paspasamak ditoy daga. Iti adu a kasasaad, naayaban nga umuna dagiti astrologo tapno mamalakadda sakbay a maaramid dagiti napolitikaan wenno namilitariaan a desision. Isu a dimmakkel ti impluensia ti maysa a grupo ti papadi a mangak-ako nga addaanda iti naisangsangayan a sirib ken nabilbileg ngem tao a pannakabalin. Kinapudnona, adda dagiti obserbatorio kadagiti nailangitan a banag iti amin a nangayed a templo sadi Babilonia.
Kadagiti moderno a panawen, agtultuloy nga addaan dagiti signo ti zodiak iti nabileg nga impluensia iti biag ti adu a tattao. Daytat’ pasaray a pagkonsultaan uray dagidiay di mamati iti horoscope tapno paglinglingayan wenno pagusiosuan laeng. Pudno a pimmayso ti sumagmamano a padles dagiti astrologo. Ngem kaipapananna kadi a makagunggona ti panagkonsulta kadagiti bituen? Kinapudnona, kasano ti panangmatmat dagiti immuna nga adipen ti Dios iti panaginteres iti astrolohia?
Dagiti Nalmeng a Peggad
Saan a kas kadagiti taga Babilonia, dagiti matalek a Judio saanda nga inannurot ti astrolohia—ket gapu iti naimbag a rason. Sibabatad a pinakdaaran ida ti Dios: “Awan koma ti masarakan kenka . . . nga asinoman a mangaramat iti panagpadles, maysa a managsalamangka wenno asinoman nga agsapul kadagiti partaan wenno maysa a mangkukulam, wenno maysa a mangkayaw iti sabsabali babaen ti pagilabeg wenno asinoman nga umuman iti mannakiuman iti espiritu wenno maysa a propesional a managipadles kadagiti pasamak wenno asinoman nga agimtuod iti natay. Ta isuamin nga agar-aramid kadagitoy a banag ket nakarimrimon ken Jehova.”a—Deuteronomio 18:10-12, NW.
Natibker ti takder dagiti adipen ti Dios maibusor iti astrolohia. Kas pagarigan, ni matalek nga Ari Josias “inikkatna manipud annongen . . . dagidiay mangpatpataud iti asuk a sakripisio ken Baal, iti init ken iti bulan ken kadagiti konstelasion ti zodiak.” Nadeskribir ti inaramid ni Josias nga “umiso kadagiti mata ni Jehova,” ket binendisionan ti Dios gapu iti dayta. (2 Ar-ari 22:2; 23:5, NW) Ngem nalabit mayimtuod ti dadduma, ‘Saan kadi a pumayso met ti dadduma kadagiti padles dagiti astrologo?’
Makapainteres ta iti Kristiano a Griego a Kasuratan, mabasatayo ti maipapan iti maysa a babai nga “ipapaayanna idi dagiti appona iti adu a magunggona babaen ti panangannurot iti arte ti panagpadles.” Nabatad a pimmayso ti dadduma kadagiti impadles daytoy a babai, tangay nagunggonaan dagiti appona manipud iti pannakabalinna. Ngem naggapuan ti abilidad ti babai a mangipadles kadagiti mapasamak iti masakbayan? Kuna ti Biblia nga isut’ adda iti sidong ti impluensia ti “espiritu, maysa a sairo iti panagpadles.”—Aramid 16:16.
Sigun iti Biblia, “ti intero a lubong adda iti pannakabalin daydiay nadangkes” a ni Satanas a Diablo. (1 Juan 5:19) Babaen ti panangimaniobrana kadagiti pasamak tapno pumayso ti sumagmamano a padles, naallukoyen ni Satanas ken dagiti sairo ti atension ti minilion.
Kinaagpaysona, ti astrolohia ti maysa kadagiti “pamuspusan ti Diablo,” nga us-usarenna a pangkontrol ken pangimpluensia iti tattao tapno serbianda ti panggepna. Isu a saan a nakaskasdaaw nga idagadag ti Biblia kadagiti Kristiano nga ‘agtakderda a sititibker’ maibusor kadagiti nasikap a panangallilaw ni Satanas—a pakairamanan ti astrolohia. (Efeso 6:11) Ngem kaipapanan kadi daytoy nga awanantayo iti aniaman a giya maipapan iti masanguanan?
Ti Biblia—Mapagtalkan a Giya
Napaneknekanen ti minilion a mapagtalkan a giya ti Biblia iti panagdesision. Kas imbaga ni salmista a David, “ti pammalagip ni Jehova mapagpiaran, mamagsirib iti daydiay awanan kapadasan.” (Salmo 19:7; 119:105, NW) Di kayat a sawen daytoy nga ibinsabinsa ti Biblia ti eksakto a rumbeng nga aramiden ti maysa a tao iti tunggal situasion. Ngem talaga nga aglaon ti Sao ti Dios kadagiti prinsipio a mangsanay iti pannakabalintayo nga agpanunot. Inton agangay, daytoy ti makatulong kadatayo a mangilasin iti naimbag ken dakes tapno matulongantayo nga agaramid kadagiti nainsiriban a desision.—Hebreo 5:14.
No kasta, adda naimbag a rason a di agkonsulta dagiti pudno a Kristiano kadagiti horoscope, uray pagpalpaliwaan wenno pagusiosuan laeng. Imbes ketdi, nainsiriban nga ipangagda dagiti pakdaar iti Sao ti Dios maibusor iti amin nga impluensia dagiti sairo, agraman dagiti saan unay a madlaw a pamay-anda. No ipalubosmo a ti Biblia ti mangimpluensia iti biagmo imbes a ti zodiak, masagrapmonto ti bendision ti Dios iti agnanayon.—Salmo 37:29, 38.
[Footnote]
a Saklawen ti panagpadles ti intero a panangammo, nangnangruna kadagiti mapasamak iti masakbayan, babaen ti pannakabalin ti okulto.
[Ladawan iti panid 26]
Zodiak dagiti taga Daya
[Ladawan iti panid 26]
Zodiak dagiti taga Laud