Panangmatmat iti Lubong
Nangina a Depekto
Nabang-aran dagiti inheniero ti computer ta sibaballigi a nalasatan ti kaaduan a sistema ti computer ti 1999 agingga 2000. Impakpakauna ti sumagmamano nga analista nga adu a programa iti computer ti kellaat a madadael ken mangpataud iti amin a klase ti panagpalia agsipud ta dida malasin ti nagdumaan ti 1900 ken 2000 gapu iti pamay-an ti pannakaiprograma a nangikkat iti dua nga umuna a numero ti petsa iti tawen. (Kitaenyo ti Pebrero 8, 1999, a ruar ti Agriingkayo!, panid 21-3.) Tapno malapdan daytoy, inkagumaan dagiti programmer a tinarimaan dagiti sistema nga adda depektoda sakbay ti kritikal a petsa. Mano ti nagasto? Sigun iti maysa nga artikulo iti Pranses a periodiko a Le Monde, pinattapatta ti maysa a grupo dagiti managpuonan a “300 aginggat’ 600 a bilion a doliar ti nagasto iti intero a lubong.” Naggasto ti Estados Unidos iti 100 a bilion a doliar; ket ti Francia, 20 a bilion a doliar. No idilig, naggasto dagiti aliado a puersa “iti 46 aginggat’ 60 a bilion a doliar” iti Gubat sadi Gulpo. Nupay kasta, “maulit-ulit laeng ti pakasaritaan ti tao . . . nga addaan iti agsasaruno a baro a parikut iti nainaig-computer a numero,” kuna ti The Wall Street Journal. Naimbag ta “awan kadagitoy ti manamnama a nakarkaro ngem iti naaramidan ti Depekto iti Tawen 2000.”
Parparikut Kadagiti Password
Dagiti nalipatan a password ti nakalugian dagiti negosio idiay E.U. iti minilion a doliar iti kada tawen gapu kadagiti napukaw a produksion ken ti kasapulan a panangipaay iti teknikal a tulong. “Iti duapulo a tawen a napalabas, dagiti numero laeng ti Social Security ken nalabit maysa wenno dua a numero ti telepono ti masapul a tandaanan ti tattao,” kuna ti The New York Times. Ngem ita, gagangayen para iti adu ti agaramat kadagiti password tapno malukatanda dagiti file iti computer ken serbisio iti E-mail idiay panggedan. Kinapudnona, nakairuamanen dagiti tattao ti maaddaan iti pinullo a password, access code, ken personal identification number. Maysa nga administrador iti network ti naipadamag a kanayon nga agusar iti 129 a password. Gapuna, dagiti scanner a makailasin iti lamma ti ramay ken dadduma pay a mangsalaknib a produkto ti kabaruan a teknolohia ti isuksukaten ti dadduma a kompania kadagiti sistemada a naibasar iti password.
Panagpungtot ken ti Pusom
“Dagiti nalaka nga agpungtot a tattao [ket] dandani mamitlo a daras a nalaklaka a maatakeda iti puso ngem dagiti nabannayat nga agpungtot,” kuna ti maysa a damag iti periodiko a Globe and Mail. Dandani 13,000 a tattao ti nakipaset iti innem a tawen a panangusig iti risgo a panagsakit ti puso. Awan ti sakit ti puso dagiti amin a nakipaset idi nangrugi ti panagadal. Adda agsasaganad a nayimtuod iti tunggal tao sada namarkaan iti mangipasimudaag no nabannayatda nga agpungtot, kalkalainganna ti panagpungtotda, wenno nalakada nga agpungtot. Kalpasan ti innem a tawen, naatake iti puso ti 256. Impalgak ti panagadal a mabalin a maatake iti puso ti 35 a porsiento kadagiti namarkaan a kalkalainganna ti panagpungtotda. Kuna ti nangidaulo iti daytoy a panagadal a ni Dr. Janice Williams iti University of North Carolina: “Ti panagpungtot ket posible nga agtungpal iti pannakaatake ti puso, nangnangruna kadagiti lallaki ken babbai nga agedad iti 40 agingga iti 60 a normal ti presion ti darada.” Gapuna, isingasing dagiti managsirarak nga agpanunot dagiti nalaka nga agpungtot a tattao kadagiti pamuspusan tapno makontrolda ti panagpulkokda.
Kabaruan a Damag iti Panagsigarilio
“Kalpasan ti maysa a siglo ti kapautna a pannakaadikto iti panagsigarilio, likliklikanen ti lubong ti panagsigarilio,” kuna ti Worldwatch Issue Alert. Nanipud 1990 agingga iti 1999, bimmassit ti bilang dagiti nagatang a sigarilio iti 11 a porsiento iti intero a lubong. Dandani dua a dekadan nga agtultuloy daytoy nga ibabassit ti bilang idiay Estados Unidos. Iti dayta a pagilian, basbassit iti 42 a porsiento ti bilang ti sinigarilio ti tattao idi 1999 ngem idi 1980. Dakamaten ti report a bimmassit daytoy a bilang gapu kadagiti kampania kontra panagsigarilio, iyaadu ti makaammon kadagiti peggad a nainaig iti panagsigarilio, ken ti panagngina ti presio. Maysa pay, “bimmassit iti 19 a porsiento ti bilang dagiti sinigarilio ti tunggal tao idiay Francia nanipud iti kaaduan a bilang idi 1985, 8 a porsiento idiay China nanipud idi 1990, ken 4 a porsiento idiay Japan nanipud idi 1992,” kuna ti report.
Sakit a Di Ikankano Dagiti Awanan Insurance
Impakita ti nabiit pay a panagadal idiay Estados Unidos nga ad-adda a di ikankano dagiti tattao nga awanan iti medikal nga insurance dagiti pagilasinan nga adda sakitda ken dida unay kayat ti agpadoktor, kuna ti agipadpadamag a Reuters. Ti panagadal, a damo a naipablaak iti Archives of Internal Medicine, ket naibasar iti impormasion a naala ti National Center for Health Statistics. Sigun iti panagsirarak, uray no adda dagiti pagilasinan a nakaron ti sakitda, kas iti nakudrep a panagkita wenno kaadda ti bukol iti suso, di unay kayat dagidiay awanan iti health insurance ti agpadoktor ngem kadagidiay addaan iti insurance. Kinuna ti report: “Di mayanatup dayta, tangay bayat a paspasingkedan ti pagiliantayo ti ‘Pakagupgopan Dagiti Kangrunaan a Kalintegan ti Pasiente,’ ditay pay nakaaramid iti kalintegan nga agbalin a pasiente.”
Zoo Idi Edad Media Idiay London
Natakuatan kadagiti nakabakab iti uneg ti nalatak a Tower of London dagiti baro a detalye ti “kulongan ken pagsanayan iti nakaad-adu nga animal idi edad media,” kuna ti The Sunday Times ti London. Sigun kadagiti managsirarak, adda ebidensia a 100 a nagduduma a kita ti animal, agraman dagiti rhino, antilop, tigre, abestrus, uleg, ken buaya, ti dati a matartaraken iti uneg ti agdama itan a West Tower. Medio nabayagen nga ammo dagiti eksperto ti kaadda ti zoo, ngem dagiti baro a panagsirarak kadagiti artsibo ti agtuturay ken ti pamiliada, unibersidad, ken relihion, agraman ti impormasion a naala iti nakabakab, ti nangilawlawag iti sumagmamano a punto. Ti kulongan ken pagsanayan dagiti animal ket impaaramid ni Ari John idi agarup 1210 ken naiserra idi 1835 idi nangrugi ti London Zoo idiay Regent’s Park. Isu a nayakar ti sumagmamano kadagiti animal iti baro a zoo, idinto ta naipan idiay America ti dadduma. Ti nabayag a pannakausar ti kulongan ken pagsanayan ket nangnangruna a maigapu iti interes dagiti nagsasaruno nga agtuturay agraman ti medio natalged a kasasaad ti pagilian. Kuna ni Geoffrey Parnell, ti kangrunaan a mangay-aywan iti artsibo iti Tower: “Nalawag a dayta ti kabayagan idi a pabuya ditoy London, a nanglinglingay agpadpada kadagiti natan-ok ken ordinario a tattao iti adu a siglo.”
Madagdagus a Hustisia
Tallo a hues idiay estado ti Espírito Santo, Brazil, ti mangsubsubok iti programa ti computer a nadisenio a tumulong a mangipaay iti madagdagus a hustisia, kuna ti magasin a New Scientist. Ti programa a naawagan Electronic Judge ket naiprograma iti maysa a laptop computer. No adda saan unay a grabe nga aksidente, ayaban ti polisia ti hues ken ti eskribiente ti korte iti nakapasamakan ti aksidente. Nadisenio ti programa a tumulong iti hues a mangtingiting iti ebidensia ken madagdagus a mangipaay iti hustisia. Aramidenna dayta babaen ti panangyimtuodna iti hues iti agsasaganad a kas iti “Simmardeng kadi ti tsuper idi nagsindi ti nalabaga a silaw?” wenno, “Ti kadi tsuper imminum iti arak a nalablabes ngem ti ipalubos ti linteg?” Kalpasanna, iyimprentanan ti desisionna ken dagiti rason a kasta ti inkeddengna. Sigun iti New Scientist, ti programa mabalinna met nga ibilin ti “panagmulta, panagbayad iti danios ken maisingasingna pay ti sentensia a pannakaibalud.” Manamnama a ti programa ti computer ket makatulong kadagiti hues tapno agbalinda a mas episiente. Iti kasta, maksayan ti nakaad-adu a kaso a tamtamingen dagiti korte idiay Brazil.
Danum kas Insentibo iti Panaglako
Gunggundawayan ti dadduma a negosiante idiay India ti nabiit pay a tikag tapno maallukoy dagiti kustomer. Mangituktukonda iti libre a danum a nayon dagiti mailakoda a kangrunaan nga alikamen iti balay. Impadamag ti The Times of India nga inkari ti maysa a managtingi ti 500 a litro ti danum uppat nga aldaw iti kada lawas iti dua a bulan ti kalgaw iti siasinoman a gumatang iti oven, refrigerator, washing machine, wenno telebision. Adda met tiendaan a nangitukon iti ‘libre a danum iti nabatbati a bulan iti kalgaw’ a kakuyog ti aniaman a nagatang a refrigerator wenno telebision. Tangay agsagsagaba ti makin-amianan a laud a paset ti Estado ti Gujarat iti kakaruan pay laeng a krisis iti danum, naamirisda a mas makaallukoy nga amang ti danum ngem kadagiti regalo a balitok, pirak, wenno libre a bakasion. Idiay siudad ti Rajkot, kinuna dagiti negosiante a namitlo ti inaduan ti naglakuanda gapu iti panangitukonda iti danum kas insentibo.
Narisut ti Misterio Maipapan iti Diamante
Kas ti katangkenan pay laeng a natural a substansia a naammuan ti sangatauan, ti diamante ket mapataud no maipasidong ti karbon iti nakapudpudot a temperatura ken mapandagan iti nakadagdagsen. Ngem ania ti pagbalinan ti diamante no mapandagan iti nakadagdagsen? Inkagumaanen dagiti sientista a sungbatan dayta a saludsod iti 40 a tawen—agingga itay nabiit pay. “No adda gayam umdas a puersa a maipakat kadagiti umno nga anggulo,” kuna ti The Buffalo News, “ti naammuan a katangkenan pay laeng a natural a substansia ket agbalin a graphite, ti met laeng karbon . . . a nakabuklanna.” Sigun kadagiti sientista, namnamaenda a mausarda ti naadalda kadagiti aramidenda nga eksperimento tapno makaaramidda kadagiti nasaysayaat a remienta ti diamante.