Panangsalimetmet iti Natimbeng a Panangmatmat iti Teknolohia ti Kompiuter
1 Gapu ta “ti tiempo a nabati ket napaababa,” ginutugot ni apostol Pablo dagiti Kristiano idi umuna a siglo ‘a gatangenda ti nainggundawayan a tiempo’! Napateg ti tiempo.—1 Cor. 7:29; Efe. 5:16.
2 Mabigbigbigen ti teknolohia a kas epektibo a makaekonomia iti tiempo. Kas pagarigan, iti maysa a litek ti teklado ti kompiuter, dagus a makita ti maysa a tao dagiti nawadwad nga impormasion. Masansan a maaramid ti kompiuter iti sumagmamano a segundo dagidiay aramiden iti adu nga oras wenno adu a lawas babaen iti sabali a pamay-an. No umiso ti pannakausarna, makatulong dagitoy a kagawaan.
3 Pudno Kadi a Makaekonomia iti Tiempo?: Iti sabali a bangir, saan a dumteng ti kasta a teknolohia iti agusar nga awan ti gastona—agpada iti kuarta ken tiempo. Mabalin a kasapulan ti adu nga oras a mangadal no kasano nga usaren ti kompiuter a mangpalaka kadagiti trabaho. Maysa pay, mabalin a busbosen ti tao a nausisa iti mismo a teknolohia ti tiempo a nasaysayaat koma ti pakausaranna. Masapul a laglagipentayo ti balakad ni apostol Pablo a magna “kas kadagiti masirib a tattao, a gatangenyo ti nainggundawayan a tiempo maipaay iti bagbagiyo.”—Efe. 5:15, 16; kitaenyo met ti 1 Corinto 7:31.
4 Nangdisenio dagiti sumagmamano a kakabsat kadagiti programa ti kompiuter a pangidulin iti rekord ti kongregasion. Siempre, personal a desision ti maysa a tao no kasano nga usarenna ti kompiuterna. Nupay kasta, saan a kayat ti Sosiedad a maidulin dagiti rekord ti kongregasion kadagiti kompiuter, gapu ta mabalin a pakibiangan dagita dagiti ubbing wenno dagiti di autorisado a tao. Dagiti amin a rekord ti kongregasion—rekord ti kuenta, Congregation’s Publisher Record cards, ken dadduma pay—masapul a maidulin kadagiti porma nga impaay ti Sodiedad, ket saan koma a maipempen iti kompiuter dagiti impormasion kadagitoy a porma ti kongregasion. Iti kastoy a wagas, masaluadan dagiti kompidensial a rekord ti kongregasion.
5 Ti kabsat a lalaki a matudingan a mangiparang iti paset kadagiti gimong ti kongregasion ket saan koma a mangnamnama iti material nga insagana ti sabali a naaramid iti computer network. Saan nga agsagana dagiti makabael a Kristiano kadagiti palawag iti Biblia wenno paspaset dagiti gimong sa iyimprintada iti computer network tapno usaren dagiti dadduma. Nupay kasta, ti kompiuter ken ti Watchtower Library nga adda iti CD-ROM ti Sosiedad ti napateg a kagawaan a mabalin nga usaren ti tunggal kabsat a lalaki iti epektibo a panagsukimat iti ababa a tiempo.
6 Komusta met ngay ti pannakaibunong kadagiti kasuratan nga immaldit ti kompiuter a mausar iti Panagadal ti Pagwanawanan wenno iti Panagadal ti Libro iti Kongregasion? Kaykayattayo no aginotar a mismo dagiti agibumbunannag iti bukodda a Biblia ken kadagiti publikasion a maad-adal. Iti gimong, ti panagusar kadagiti immaldit ti kompiuter a Kasuratan a naisitar kadagiti publikasion ti mabalin a mangupay iti panagusar iti mismo a Biblia a mangbirok kadagiti kasuratan. Ti panangukag kadagiti Kasuratan bayat ti gimong ket maysa a paset ti panagsanay, a mangkabal kadatayo iti epektibo a panangusar iti Biblia iti tay-ak ti ministerio. Iti kaaduan a pasamak, ad-adda nga epektibo ti panangbasa a direkta iti Biblia, nangruna no dagiti dumdumngeg ti maparegta a sumurot iti Biblia.
7 Dadduma pay a Serioso a Pakaisagmakan: Kas naibalabala iti panid 17 iti Agosto 1, 1993, a ruar Ti Pagwanawanan, ti panangisuldong iti kompiuter iti electronic bulletin board mabalin nga iwayaanna dagiti nakaro a panagpeggad iti naespirituan. Nawaya a mangikabil dagiti apostata, klero, ken dadduma pay kadagiti makasabidong nga ideya kadagiti bulletin board. Malaksid no maaywanan a naimbag ti bulletin board, a dagidiay laeng nataengan, matalek nga adipen ni Jehova ti maipalubos nga agusar, mabalin nga irubona dagiti Kristiano a managusar iti “dakes a pannakitimpuyog.” (1 Cor. 15:33) Nakaawat ti Sosiedad kadagiti report a maus-usar dagita maaw-awagan pribado a network a saan laeng a [pakailanadan] dagiti pagpagarup iti naespirituan a bambanag no di ket mangted iti dakes a balakad, mangiwaras iti danondanon ken palso nga impormasion, mangimula kadagiti negatibo nga ideya, mamataud iti salsaludsod ken panagduadua a mangballikug iti pammati dagiti dadduma, ken mangiwaras kadagiti bukod a patarus iti Kasuratan. Iti parupana, agparang nga impormatibo dagiti dadduma nga impormasion, ngem mabalin a nabordaan kadagiti makasabidong nga elemento. Agtalek dagiti Kristiano iti “matalek ken masirib nga adipen” maipaay iti naintiempuan a naespirituan a taraon ken kadagiti pannakalawlawag. (Kitaenyo Ti Pagwanawanan iti Hulio 1, 1994, pinanid 9-11.) Ti maysa a Kristiano addaan iti nainget a responsabilidad a mangsaluad ti pammatina iti amin a makadadael nga impluensia ken kanayon nga ammona no siasino ti pakitimtimpuyoganna.—Mat. 24:45-47; 2 Juan 10, 11.
8 Inggunamgunam ti isu met laeng nga artikulo ti Pagwanawanan ti kinapateg ti panangraem kadagiti linteg ti kalintegan nga agimaldit. Kaaduan a kompania a mangisagsagana ken aglaklako kadagiti programa ti kompiuter mangalada iti kalintegan, ket mangtedda iti lisensia no kasano a mausar a legal dagiti programa. Masansan a kunaen ti lisensia a saan a mabalin nga ited ti makinkukua dagiti kopia ti programa iti sabsabali; kinapudnona, ibilang ti international copyright law nga ilegal ti panangaramid iti dayta. Adu a naagum a tattao ti saan a bumdeng a kumaniwas iti linteg. Nupay kasta, masapul a naannad unay dagiti Kristiano kadagiti legal a bambanag, nga ipaayda ken Cesar no ania dagiti kukua ni Cesar.—Mat. 22:21; Roma 13:1.
9 Masapul a tingitingen ti pateg ti aniaman a teknolohia no kadagiti manamnama a peggad ti pannakausarna. Kas iti telebision a mabalin a mausar a pagimbagan, a ti saan a naimbag nga epektona ita iti sangatauan ti nangtignay uray kadagiti nailubongan a gubuayan a mangyebkas iti serioso a pannakaseknan. Dagiti network ti kompiuter nagsaknapen iti sangalubongan ket mabalinna nga idanon ti napateg nga impormasion iti pagtaengan wenno pagtrabahuan. Itukonda dagiti kasapulan unay a serbisio kadagiti negosio ken organisasion agraman indibidual a tattao iti napartak-gunggunayna a sosiedad a pagbibiagantayo. Maigiddan met a masapsaplit dagiti network ti kompiuter kadagiti problema a kas ti pornograpia ken detaliado nga impormasion no kasano a maibanag dagiti dakes nga aramid.
10 Ngarud, adut’ napapateg a rason, no apay a masapul a salimetmetan ti maysa a Kristiano ti balanse a panangmatmat iti teknolohia ti kompiuter. Aduda dagiti mangtagtagiragsak iti New World Translation, dagiti tomo ti Insight, ken GetVerse a programa, nga inaramid ti Sosiedad a maala kadagiti diskette ti kompiuter. Magunggonaan dagiti dadduma babaen ti panagusarda iti inruar ti Sosiedad a CD-ROM, a naputar nga addaan kabaelan iti kanayonan a panagsukimat. Bayat a mabigbig ti pateg iti dadduma a teknolohia, ti tao a mangusar iti kasta a moderno a teknolohia a maipaay iti makagunggona a panggep ket masapul nga agalisto a mangsaluad iti bagina ken dagiti dadduma manipud aniaman a negatibo nga aspetona. Masapul a nabalansetayo tapno uray ti panagusar iti di makadangran a teknolohia saanna nga ibusen ti nawadwad a naidedikar a tiempotayo wenno singaennatayo kadagiti kangrunaan a trabaho ken kalattayo.