Naipaayan iti Namnama a Mangpabpabileg Kaniak

KAS INSALAYSAY NI TATJANA VILEYSKA

Nadadael ti naragsak a pamiliami idi nakabkabil ni Nanangko agingga a natay iti apartmentmi. Kalpasan ti uppat a bulan, nagpakamatay ni Tatang. Idi agangay, diak kayaten ti agbiag. Apay ngarud a sibibiagak pay laeng tapno isalaysayko dayta? Palubosandak a mangilawlawag.

TI Donetsk, iti makindaya nga Ukraine, ket maysa a siudad a paglunagan iti metal ken pagminasan iti karbon. Ruso ti pagsasao ti nasurok a maysa a milion a naggagaget ken mannakigayyem nga umili. Mamati ti dadduma kadakuada iti astrolohia wenno espiritismo, ket adu ti agus-usar iti horoscope tapno maammuanda ti masakbayan. Dadduma ti agkonsulta kadagiti mangkukulam, wenno koldun, kas ti pagaammo a pannakaawagda iti Ruso. Dadduma kadagitoy a tattao ti makium-uman kadagiti natay ta mangnamnamada nga umimbag ti sakitda wenno tapno adda laeng pagraragsakanda.

Sapatero ni Tatang. Nupay ibagbagana nga isut’ ateista, patienna nga adda nangisaad kadatayo ditoy daga. Ibagana no kua a: “Sangailitayo laeng iti daytoy a planeta.” Kada Domingo Paskua, makimisa ni Nanang agsipud ta kas kinunana, “No adda Dios, no agpayso nga adda, masapul ngarud a makimisatayo.” Naipasngayak idi Mayo 1963. Ni manangko a Lubov, ken ti adiek a lalaki a ni Alexandr, ti nangan-anay iti naragsak a pamiliami.

“Nasayaat ti White Magic”

Maysa nga adayon a kabagianmi nga agnagan Pjotra ti naaksidente ken nadangran ti ulona bayat nga agtartrabaho iti pagminasan iti karbon isu a kasapulan a maagasan iti espesial a klinika. Tangay kayatna ti umimbag, nagkonsulta iti maysa a koldun. Babaen ti tulong ti mangkukulam, nakauman ni Pjotr ti lubong dagiti espiritu. Nupay imbaga ni baketna ken dagiti dadakkelko a minamaag ti panagkulam, impagarupna nga ad-adu ti ammona. “White magic ti ar-aramidek,” impapilitna. “Ti black magic ti dakes, ngem nasayaat ti white magic.”

Imbaga ni Pjotr a kabaelanna ti agpadles ken masalaknibanna dagiti tattao manipud iti dakes. Nupay kasta, ni Pjotr ket pinanawan ni baketna. Isu a nakipagnaed ni Pjotr kadakami, no dadduma iti sumagmamano a lawas. Nagdakes ti impluensiana iti pamiliami. Nangrugin ti nakaro a panagsubang da Nanang ken Tatang. Idi agangay, nagsina ken nagdiborsioda. Dakami nga annak ti kadua ni Nanang ken ti kabagianna a ni Pjotr nga immakar iti sabali nga apartment.

Nakiasawa ni Lubov isu a kadua ni lakayna nga immakar idiay Uganda, sadi Africa. Idi Oktubre 1984, nagbakasion ni Alexandr ket nagpasiarak met idiay ili ti Gorlovka iti makalawas. Idi nagluasak, gagangay ti panagpinnakadami ken ni Nanang. Ad-adu koma pay ti imbagak kenkuana wenno diak la koman pimmanaw! Ngamin, diak pulos nasangpetanen a sibibiag ni Nanang.

“Natayen ti Patpatgem nga Ina”

Idi simmangpetak manipud Gorlovka, nakaserra ti apartment, ket adda naibitin iti ridaw a pakaammo ti polisia a maiparit ti sumrek. Nagtibbayo ti barukongko. Napanak kadagiti kaarrubami. Madanagan unay ni Olga a makisarita. Siaasi a kinuna ni lakayna a Vladimir: “Tanja, adda nakaam-amak a napasamak. Natayen ti patpatgem nga ina. Pinatay ni Pjotr. Kalpasanna, immay ditoy apartmentmi, tineleponuanna ti polisia ken simmuko.”

Pinatalgedan ti polisia ti nagdakes a damag ket intedda kaniak ti tulbek ti apartmentmi. Napalalot’ gurak ken ni Pjotr. Gapu iti pungtotko, ginammatak ti kaaduan a gargaretna​—agraman dagiti librona iti magic​—impalladawko dagitoy iti maysa nga ules, saak napan iti asideg a talon, ket sadiay a pinuorak dagitoy.

Naammuan ni Alexandr ti napasamak, ket duakamin a napalalot’ gurana ken ni Pjotr. Idi kuan, naayaban ni Alexandr nga agsoldado isu a nayadayo. Kinaduanak ni Tatang iti apartment, ket simmangpet ni Lubov manipud Uganda tapno kaduaennakami iti apagbiit. No dadduma, adda pamatianmi a rirriribukennakami dagiti dakes nga espiritu. Kanayonanna, pasaray mabatibat ni Tatang. Pabasolenna ti bagina iti ipapatay ni Nanang. “No diak koma pinanawan,” kunana no kua, “sibibiag pay la koma.” Di nagbayag, nagleddaang unay ni Tatang. Iti las-ud ti uppat a bulan nanipud idi natay ni Nanang, nagpakamatay ni Tatang.

Kalpasan ti pumpon ni Tatang, nagsubli ni Alexandr iti militaria, ket nagawid metten ni Lubov idiay Uganda. Inkagumaak ti mangabaruanan babaen ti panageskuelak idiay Makeyevka Institute of Construction Engineering, a 30 a minuto laeng manipud balay. Dinekorasionak ken pinapintasko ti apartment, tapno naan-anay a malipatan koma ti dadduma a pakalaglagipan. Ngem adda pay laeng ti pamatiak nga adda demonio a mangrirriribuk kadakami.

“O Diosko, no Agpayso nga Addaka”

Nagawid ni Alexandr idi naturpos ti panagserbina kas soldado. Ngem nangrugin ti pasaray a panagapami. Nangasawa, ket iti sumagmamano a bulan, immakarak idiay Rostov, maysa a siudad idiay Russia iti igid ti kosta ti Baybay Azov, agarup 170 a kilometro manipud balaymi. Idi agangay, inkeddengko a pukawen ti amin a gargaret ni Pjotr.

Nagleddaangak unay isu a pinanggepko met ti agpakamatay. Ngem sangkalagipko dagiti imbaga idi ni Nanang: “No adda Dios, no agpayso nga adda.” Maysa a rabii, nagkararagak iti damo a gundaway. “O Diosko,” impakpakaasik, “no agpayso nga addaka, pangngaasim ta isurom kaniak ti panggep ti biag.” Dua nga aldaw kalpasanna, adda simmangpet a surat a naggapu ken ni Lubov. Aw-awisennak nga agpasiar idiay Uganda. Gapuna, intantanko ti panggepko nga agpakamatay.

Dagiti Diak Ninamnama Idiay Uganda

Manmano dagiti agsupadi unay a lugar ditoy daga a kas iti Ukraine ken Uganda. Nagdisso ti eroplanok idiay Entebbe idi Marso 1989. Idi dimsaagak iti eroplano, kas man la simrekak iti pugon. Idi pay laeng a nariknak ti kasta a kinabara! Saan a nakaskasdaaw daytoy, tangay daydi ti kaunaan a panagbiahek iti ruar ti Union Soviet. Ingles ti pagsasao dagiti umili, maysa a lenguahe a diak idi maawatan.

Nagluganak iti taksi para iti 45 a minuto a biahe nga agpa-Kampala. Naiduma unay ti buya ti aglawlaw manipud iti nakairuamak. Kasla addaak iti sabali a planeta! Ngem nakasingsingpet ti naisem a tsuper ti taksi, ket kamaudiananna, nasarakanna met laeng ti pagtaengan da Lubov ken ni Joseph a lakayna. Nabang-aranak pay!

Makipagad-adal ni Lubov iti Biblia kadagiti Saksi ni Jehova. Diak pay pulos nadamdamag ti maipapan kadakuada, ngem magagaran ni Lubov a mangipakaammo kaniak. Dinak ininggaan idiay balay a nangibaga iti amin a naadalna, manipud Genesis agingga iti Apocalipsis. Kinaagpaysuanna, makapasuron dayta!

Maysa nga aldaw, simmarungkar dagiti Saksi a mangyad-adal ken ni Lubov. Maysa kadakuada ti agnagan Marianne. Dinak kinasabaan a dagus, tangay diak pay unay maawatan idi ti Ingles. Ngem ti napasnek, mannakigayyem a matmatana ti nangipasimudaag nga isut’ napudno, naragsak a tao. Impakitana kaniak ti maysa a ladawan ti Paraiso iti bokleta nga “Adtoy! Pagbalinek Dagiti Isuamin a Bambanag a Baro.” “Kitaem daytoy a babai,” indagadagna. “Sika dayta, ket siak met daytoy maysa pay. Addata a dua idiay Paraiso a kadua amin dagitoy dadduma pay a tattao. Saan kadi a nagsayaat dayta?”

Kasla nagsisinnublat ti dadduma a Saksi idiay Kampala a simmarungkar kada Lubov ken Joseph. Mannakigayyemda unay nga uray la inatapko a mangar-aramidda laeng iti nasayaat nga impresion kaniak. Sumagmamano a lawas kalpasanna, tinabunuak ti kaunaan a pannakigimongko, nga isu ti panangselebrar iti Pangrabii ti Apo. (Lucas 22:19) Nupay diak naawatan ti nangngegko, nasdaawak manen iti kinamannakigayyem dagiti tattao.

‘Basaem nga Interamente’

Inikkannak ni Marianne iti Biblia a Ruso​—ti damdamo pay laeng a naikutak. “Basaem nga interamente ti Biblia,” impakpakaasina. “Uray no saanmo a maawatan ti amin, basta basaem dayta!”

Natukayak unay iti inregalo ni Marianne, ket inkeddengko a suroten ti balakadna. ‘Sabagay,’ kinunak iti un-unegko, ‘ania ngay ti serbina ti maaddaan iti Biblia no diak isamira a basaen?’

Idi nagawidak idiay Ukraine, intugotko ti Bibliak. Nagtrabahoak idiay Moscow, Russia, iti simmaganad a sumagmamano a bulan, ket inusarko ti nawaya a panawenko tapno rugiak a basaen ti intero a Biblia. Idi nagsubliak idiay Uganda siam a bulan kalpasanna, nabasakon ti kaguduana. Kalpasan ti panagsublik idiay Kampala, impakita kaniak ni Marianne manipud iti Biblia ti nakaskasdaaw a namnama iti masakbayan. Maysa a paraiso! Ti panagungar! Ti pannakakitak manen kada Nanang ken Tatang! Naamirisko a ti ad-adalek ket sungbat ti inkararagko idi addaak idiay Donetsk.​—Aramid 24:15; Apocalipsis 21:3-5.

Nagagaranak unay idi inadalmi ti tema maipapan kadagiti dakes nga espiritu. Pinasingkedan ti Biblia ti nabayagen nga atapko. Awan ti makuna a naimbag wenno di makadangran a panagsalamangka. Amin ket nakapegpeggad. Saankon a masapul ti dakdakkel pay nga ebidensia ngem iti napasamak iti mismo a pamiliami. Idi pinuorak dagiti gargaret ni Pjotr, diak ammo nga umiso gayam ti inaramidko. Pinuoran met dagiti nagkauna a Kristiano ti ramramitda iti panagsalamangka idi rinugianda ti agserbi ken Jehova.​—Deuteronomio 18:9-12; Aramid 19:19.

Idi nalawlawagen ti pannakaawatko iti Biblia, siguradoakon a nasarakak ti kinapudno. Insardengko ti agsigarilio, ket idi Disiembre ti 1990, nabautisaranak kas simbolo ti dedikasionko ken Jehova. Nabautisaran ni Lubov tallo a bulan nga immun-una ngem siak; ket ni Joseph, idi 1993.

Panagsubli Idiay Donetsk

Idi 1991, nagsubliak idiay Donetsk. Iti dayta met la a tawen, naipaayen kadagiti Saksi ni Jehova idiay Ukraine ti legal a pannakabigbig, a kaipapananna a mabalinmin ti agaasamblea ken mangasaba a siwayawaya. Rinugianmi ti nakisarita kadagiti lansangan iti siasinoman nga adda saparna. Di nagbayag, natakuatanmi nga uray iti pagilian nga adu a tattao ti agkunkuna nga ateistada, adu ti interesado iti Pagarian ti Dios.

Idi rugrugi ti dekada 1990, kurang ti suplay a literatura iti Biblia, isu a nangipasdekkami iti agipabulod a libraria kadagiti lansangan ti Donetsk. Nangisaadkami iti puesto iti kangrunaan a plasa ti siudad tapno mai-display-mi dagiti libro ken bokletami. Di nagbayag, dimmagas dagiti mannakigayyem ken interesado a tattao tapno agimtuod. Pinabulodanmi dagidiay mayat a mangala iti literatura, ket naawisda a mayadalan iti Biblia iti pagtaenganda.

Idi 1992, nagbalinak a payunir, kas maysa nga amin-tiempo a ministro dagiti Saksi ni Jehova, ket idi Setiembre 1993, naawisak a makikadua iti grupo dagiti managipatarus iti sanga nga opisina ti Watch Tower Society idiay Selters, Alemania. Immakarkami ditoy Poland idi Setiembre 1998, bayat nga ur-urayenmi ti pannakairingpas dagiti baro a pasilidad ti sanga idiay Lviv, Ukraine.

Nakaskasdaaw ti irarang-ay dagiti tattao ni Jehova idiay Ukraine. Nupay maymaysa ti kongregasion idiay Donetsk nga addaan iti 110 a Saksi idi 1991, addaanen iti 24 a kongregasion a nakaikamengan ti nasurok a 3,000 a Saksi! Saan laeng a nakaay-ayat a panagrarana ti imbunga ti isasarungkarko idiay Donetsk idi 1997 no di ket uray ti maysa a pasamak a nakaburiborak.

“Birbirokennaka ni Pjotr”

Kabayatan ti kaaddak idiay Donetsk, naklaatak iti imbaga ni Juliya, maysa a Saksi a makaam-ammo iti pamiliami: “Birbirokennaka ni Pjotr. Kayatnaka a kasarita.”

Idiay balay idi a rabii, nagsangit ken nagkararagak ken ni Jehova. Ania ti gagara ni Pjotr kaniak? Ammok nga adun a tawen nga inkarona iti pagbaludan ti krimen nga inaramidna. Kagurgurak gapu iti inaramidna, ket para kaniak, saan a maikari a mangammo maipapan iti baro a lubong ni Jehova. Inkararagko daytoy a banag iti sumagmamano nga aldaw ket idi agangay, naamirisko a saan a siak ti mangikeddeng no siasino ti maikari nga umawat iti biag nga awan inggana. Nalagipko ti inkari ni Jesu-Kristo iti kriminal a nailansa iti abayna​—a makikaduanto kenkuana daydi a kriminal idiay Paraiso.​—Lucas 23:42, 43.

Bayat a pinampanunotko dagitoy, inkeddengko a makipagkitaak ken ni Pjotr ken kasabaak maipapan iti Mesianiko a Pagarian ken ti baro a sistema dagiti bambanag ti Dios. Kaduak ti dua a Kristiano a kakabsat a napan iti address nga inted kaniak ni Juliya. Sadiay, iti damo unay a gundaway nanipud idi natay ni Nanang, nakasaritak iti sangonsango ni Pjotr.

Makapadanag ti kasasaad. Inlawlawagko ken ni Pjotr a nagbalinak a Saksi ni Jehova ken tinulongannak ti Biblia a mangtarus no apay a mapaspasarantay amin ti parikut iti daytoy a sistema, a no dadduma, uray dagiti personal a trahedia. Imbagak met ken ni Pjotr a nasaktankam unay iti ipapatay da nanang ken tatangmi.

Inlawlawag ni Pjotr nga adda timek a nangibaga kenkuana a patayenna ni nanangko, sana dineskribir ti napasamak iti daydi nga aldaw. Bayat a dimngegak iti nakaam-ames nga estoriana, naasianak uray no marurodak, tangay madandanagan ni Pjotr a kas iti maan-anupan nga animal. Apaman a nalpas ni Pjotr a nagsao, pinadasko nga ipakita kenkuana ti sumagmamano a nakaskasdaaw a kari iti Biblia. Kinunana a mamati ken ni Jesus, isu nga inyimtuodko:

“Addaanka kadi iti Biblia?”

“Awan pay. Ngem nagpedidoakon,” insungbatna.

“Nalabit ammomon a sigun iti Biblia, ti personal a nagan ti pudno a Dios ket Jehova.”​—Salmo 83:18.

Mariribukan ni Pjotr apaman a nangngegna dayta a nagan. “Dika dakdakamaten dayta a nagan kaniak,” kinunana. “Diak maibturan dayta a nagan.” Awan ti nagmamaayan ti panangikagumaanmi nga iranud ken ni Pjotr dagiti nakaskasdaaw a kari ti Dios.

Pimmanawak nga adda banag a nabatad iti panunotko: No diak naam-ammo ni Jehova, nalabit nagudasak metten a kas ken ni Nanang, nalabit nagpakamatayak metten a kas ken ni Tatang, wenno nalabit adda metten nangkontrol kaniak nga agaramid iti nakaam-ames a bambanag a kas kadagiti inaramid ni Pjotr. Agyamanak unay ta naam-ammok ti pudno a Dios a ni Jehova!

Matmatan ti Masakbayan, Saan a ti Nalikudan

Napaut ti epekto kaniak dagitoy a nasaem a kapadasan. Uray ita, no malagipko, nasakit ti nakemko ken mariribukanak no dadduma. Ngem idi naam-ammok ni Jehova ken naammuak dagiti panggepna, nangrugin ti proseso ti panagimbag. Ti kinapudno iti Biblia ti nangisuro kaniak a saan a ti nalikudan ti sangkapanunotko, no di ket ti masakbayan. Ket nagsayaat ketdin ti masakbayan nga isagsagana ni Jehova kadagiti adipenna!

Nairaman iti dayta a masakbayan ti panagungar dagiti natay iti paraiso a daga. Anian a ragsakko inton sarabuek dagiti mapagungar a dadakkelko! No ar-arigen, husto ni Tatang idi kinunana: “Sangailitayo laeng iti daytoy a planeta.” Ket talaga a husto ti pammati ni Nanang nga agpayso nga adda Dios. Ti kangrunaan a tarigagayko isut’ panangisurokto kada Nanang ken Tatang kadagiti kinapudno iti Biblia inton mapagungarda iti baro a sistema dagiti bambanag ti Dios.

[Footnote]

[Blurb iti panid 24]

Iti damo unay a gundaway nanipud idi natay ni Nanang, nakasaritak iti sangonsango ti pimmatay kenkuana

[Ladawan iti panid 23]

Bayat nga ar-arakupendak da Marianne ken Heinz Wertholz, dagiti misionero a nangyadal kaniak idiay Uganda

[Ladawan iti panid 23]

Idi nabautisaranak idiay Kampala

[Ladawan iti panid 24]

Panagtrabaho kas paset ti grupo dagiti managipatarus iti Ukranio ditoy Poland