Manipud Kadagiti Agbasbasa
Huntington’s Disease Iyebkasko ti napasnek a panagyamanko gapu iti artikulo a “Huntington’s Disease—Panangammo iti Matawid a Trahedia.” (Marso 22, 2000) Iti unos ti 20 a tawen, inaywanak ni lakayko, a nagsagaba iti daytoy a sakit. Adunto ti mayat a mangbasa iti artikulo a kas iti daytoy a naisurat buyogen ti pannakipagrikna ken pannakaawat.
N. G., New Zealand
Pagyamanan iti artikulo. Mas simple ti panangilawlawagyo ngem iti doktormi. Nadayagnos nga adda Huntington’s disease [HD] ni nanangko agarup tallo a tawen ti napalabasen. Nagsaem a kitaen ti panangikagumaanna nga agsao, mangan, ken magna. Ti maysa a saanyo a dinakamat ket kasla nabaybayag nga agtalinaed ti napaut a memoria ngem iti apagbiit a memoria. No kasta, makatulong ken makaliwliwa ti pannakisarita iti addaan iti graben nga HD maipapan iti nabayagen a gagayyem wenno panangiranud kadagiti nabayagen a retrato.
J. M., Estados Unidos
Nadayagnos nga adda Huntington’s disease ni lakayko uppat a tawen ti napalabasen. Agarup maysa ket kagudua a tawen ti napalabasen, nagsuratak kadagiti agipabpablaak ti Agriingkayo! ket nagpatulongak maipapan iti daytoy a tema. Idi nakitak daytoy nga artikulo, nakasangitak gapu iti bang-ar ken rag-o.
D. B., Estados Unidos
Pannakayakar ti Hepatitis Kasla adda kamali iti Abril 22, 2000 a report iti “Panangmatmat ti Lubong” a “Kadawyan Unay nga Impeksion nga Iyakar ti Dara.” Kinunayo a mayakar ti hepatitis C virus [HCV] a nangnangruna babaen ti seksual a panagdenna wenno babaen ti kontaminado a dara. Kinapudnona, manmano a mayakar babaen ti seksual a wagas ken mapasamak laeng kadagiti espesipiko a kasasaad, kas koma no kabayatan ti panagregla.
C. A., Francia
Mabalin a nangted iti di umiso nga impresion ti ababa a report, tangay ti seksual a panagdenna ket kasla saan a dakkel ti maaramidanna iti pannakayakar ti hepatitis C a kas iti maaramidan ti mayineksion a droga. Sigun iti “Harvard Health Letter” a Pebrero 1996, saan unay wenno saan nga agpeggad dagiti assawa ti tattao a positibo nga addaan iti HCV. Nupay kasta, inreport ti maysa nga artikulo iti Agosto 19, 1999 a ruar ti “The New England Journal of Medicine” ti nasaknap a pannakayakar ti HCV idiay Estados Unidos nanipud 1988 agingga iti 1994: “Ti maiparit a panagdroga ken peligroso unay a seksual nga aramid dagiti kabilgan a makagapu a nainaig iti pannakayakar ti HCV.” Kinunana pay: “Nupay nalabit di episiente ti pannakayakar ti HCV babaen ti seksual nga aramid, . . . ti kaadu dagiti nakaro ti pannakaimpektarda nga umili ti mangipaay iti adu a gundaway tapno maakaran dagiti tattao nga adu ti kakaiddaenda.”—ED.
Panangtebbeng iti Bagi Pagyamanan iti artikulo nga “Agimtuod Dagiti Agtutubo . . . Ti Ngay Panangtebbeng iti Bagi?” (Marso 22, 2000) Agtawenak iti 16 ken nabayagen a pampanunotek nga ipatebbeng ti bagik. Nupay adda sumagmamano a tattao a nagsaludsodakon maipapan ti panangmatmatda iti daytoy, diak latta masierto idi no ania ti ikeddengko. Nupay kasta, ti nabatad ken makaisuro nga artikulo ti nakatulong kaniak a nangamiris a di rumbeng nga ipatebbengko ti bagik, uray no nakalatlatak dayta.
E. C., England
Kas dati a kumakanta iti banda ti punk rock, naamirisko a naintiempuan unay ti artikuloyo maipapan iti panangtebbeng iti bagi. Karkarna ti mapaspasamak tangay tartarigagayan dagiti tattao ti agbalin a naisalsalumina babaen ti panangsurotda kadagiti kabaruan nga uso!
F. S., Estados Unidos
Moralidad Idi kalman, binasak ti serye dagiti artikulo nga “Ania ti Napasamaken iti Moral?” (Abril 8, 2000) Agpayso la unay! Ipakita daytoy a serye no kasano a makarimon ti basol. Kinapudnona, sakbay a nagbalinak nga Saksi ni Jehova, imoral unay ti kabibiagko. Agingga ita, ikagkagumaak a parmeken dagiti napigsa a tarigagay ti lasagko. Nupay kasta, babaen ti ayat ken panangaywan ni Jehova, ti tulong dagiti naayat a panglakayen, ti pannaranay dagiti Kristiano a kakabsatko, ken dagiti artikulo a kas kadagitoy, naturturedakon a makidangadang.
J.C.P., Estados Unidos