Ti “Panangmatmat iti Lubong” Maus-usar Idiay Eskuelaan
IDIAY eskuelaan, sieepektibo nga us-usaren ni Edelmira, maysa a 15 anyos a balasitang idiay Estados Unidos, ti Agriingkayo! Kastoy ti insuratna kadagiti agipabpablaak:
“Kada Biernes, matudingankami nga agreport maipapan iti kabaruan a damag. Binasak ti Abril 22, 2000 nga Agriingkayo! ket inkeddengko nga ibasar ti reportko iti ababa a padamag iti ‘Panangmatmat iti Lubong’ a napauluan ‘Admitiren ti Kompania ti Sigarilio a Makapakanser ti Panagsigarilio.’ Nagsuratak iti sumario sa binasak dayta iti klase. Nagimdeng a naimbag ti maestrak ken dagiti kaklasek. Idi nalpasakon, dinamag ti maysa a kaklasek—iti imatang a mismo ti klase—no narigatanak a nagsapul iti inreportko. Intedko kenkuana ti Agriingkayo! Sigagagar a rinugianna a binasa dayta, ket imbaga ti maysa a kakongregasionak a barito a kaklasena iti sumaganad a klase nga idi nakitana ti balasitang, basbasaenna pay laeng dayta. Ita, imbagan ti balasitang a kayatna ti umawat iti tunggal ruar ti Agriingkayo! ken ti kaduana a Ti Pagwanawanan.
“Daytoy a kapadasan ti makagapu a pagpannakkelko ti panagbalinko a maysa kadagiti Saksi ni Jehova. Insurona kaniak a nagadu gayam ti gundawaytayo a makisarita maipapan ken Jehova.” Kastoy ti pangserra nga insurat ni Edelmira: “Kayatko ti agyaman iti kinagagetyo nga agaramid kadagitoy a magasin. Pangngaasiyo ta itultuloyyo nga imaldit ti ‘Panangmatmat iti Lubong’!”