Karkarna a Produkto ti Ima Dagiti Hapones
BABAEN TI MANNURAT TI AGRIINGKAYO! IDIAY JAPAN
NARABER ti kabakiran iti kabambantayan ti Hakone iti kaparanget ti Mount Fuji ditoy Japan. Babaen ti panagdaliasatmi iti manmano a mausar nga agsikkosikko a kalsada iti bantay, simmangpetkami iti napintas a bario a managan Hatajuku. Daytoy a natalinaay a komunidad ti nangrugian ti yosegi.
Ti yosegi literal a kaipapananna ti “kombinasion dagiti pedaso ti kayo.” Ti naisangsangayan a pakabigbiganna ket dagiti geometriko a disenio iti rabaw ti kayo a produkto ti ima manipud kadagiti simple a bookmark wenno banag a mayipit iti libro tapno nalaka a biroken dagiti panidna, agingga kadagiti kahon nga addaan iti uyosen. Addada disenio a nadumaduma ti sukog ken kolorda. Apaman a naamirismi a saan gayam a napintaan dagitoy a padron no di ket nasangal a napagkakamang babaen ti panangipigket iti kayo nga addaan iti nadumaduma a kolor, lallalo a naapresiarmi dagiti produkto a yosegi.
Kasano a nangrugi daytoy a karkarna a produkto ti ima? Idi dekada ti 1800, napanunot ti artesano nga agnagan Nihei Ishikawa a pagkakamangen nga ipigket dagiti kayo a nadumaduma ti kolorda. Kalpasanna, babaen ti agkukuros a panangtabasna iti naiingpis a kayo manipud kadagiti orihinal a tabla, nakaaramid kadagiti kahon ken dadduma pay a tagilako nga addaan iti mosaik a disenio wenno nadumaduma a ladawan.
Idi agangay, napartuat ti mas episiente a pamay-an ti panagaramid iti yosegi. Ramanen daytoy ti panangkatam kadagiti orihinal a tabla tapno umingpis a kas iti papel sa ipigket daytoy a maitapal kadagiti napuspuskol a pedaso ti kayo. Daytoy ti makagapu a mabalinen ti agaramid kadagiti nalaka a rekuerdo para kadagidiay agpaspasiar kadagiti asideg a nabara nga ubbog ti Hakone.
Adu a nadumaduma a kayo ti maus-usar a pagaramid iti yosegi. Ti puraw a kolor, kas pagarigan, ket agtaud iti kayo a maawagan spindle ken dogwood, ti duyaw ket agtaud iti kayo a lacquer ken Japanese wax; ti napusyaw a kayumanggi ket agtaud iti kayo a cherry ken zelkova, ket agtaud ti nangisit iti kayo a katsura.
No agpasiarka ditoy Hakone, mabalin a kontentokan a gumatang kadagiti babassit ken kalkalainganna ti kinalakada a yosegi a naaramid kas babassit a pagkargaan, pinggan, pagiparabawan iti pinggan, wenno bookmark. Ipalagipto uray dagitoy a babassit a rekuerdo ti panagpasiarmo ditoy Hakone iti kaparanget ti agdinamag a Mount Fuji ken ti apagbiit a pannakakitam iti makapasiddaaw nga artistiko a saguday a nangrugi nasurok a 150 a tawenen ti napalabas.
[Kahon/Dagiti ladawan iti panid 19]
Ti Panagaramid Iti YOSEGI
TI ARTISANO iti yosegi katamenna dagiti kayo a nadumaduma ti kolorda sigun iti kayatna a kapuskol. Kalpasanna, pagtutuonenna nga ipigket dagiti nakatamna. Makita ti namaris a padron iti igid ti napagpipigket a nakatamna. Kalpasanna, agkukuros a tabasenna ti igid ti napagpipigket a nakatamna tapno makaala kadagiti naingpis a paset ti nagtutuon a kayo nga umanay iti espesial a molde. (1) Kalpasan a makatamna dagiti naiingpis a kayo, ikkatenna dagitoy iti molde, sana pagkakamangen nga ipigket ida tapno maporma ti maysa padron. Pagkaykaysaenna a singdanan dagitoy. Daytoy ti agbalin a kangrunaan a yunit ti yosegi.
Sumaganad, pagkakamangen manen ti artisano nga ipigket ti sumagmamano a yunit tapno mapataud ti dakdakkel a yunit. (2) Kalpasanna, ragadienna dagitoy iti adu a pedaso. (3) Inton agangay, urnosenna dagitoy iti daddadakkel pay a padron sana pagkakamangen nga ipigket. Agtultuloy daytoy a proseso agingga a nakaaramiden ti artisano iti dakkel a plato a maawagan tanegi, wenno kayo a pedaso ti material.
Ita, addaanen ti artisano iti kangrunaan a padron para iti aramidenna a produkto. (4) Babaen ti espesial a katam, katamenna ti tanegi a kas iti kaingpis ti papel a maawagan zuku. (5) Kalpasan a maplansa dagitoy, nakasaganan ti artisano a mangarkos kadagiti kayo nga ispesimenna babaen ti pagtapal a zuku.
[Dagiti ladawan iti panid 18]
Saan a napintaan dagiti padron ti “yosegi” no di ket nasangal a napagkakamang babaen ti panangipigket iti kayo nga addaan iti nadumaduma a kolor