Kinasalun-at ti Amin—Asidegen!
“USO ita . . . ti kapanunotan a dikanton agsakit a pulos,” kuna ti Aleman a pagiwarnak a Focus. Ngem saan a baro daytoy a kapanunotan. Idi nangrugi ti biag ti tao, saan a pulos nga inranta ti Namarsua nga agsakit ti sangatauan. Saan laeng a “makaay-ayo a kasasaad ti salun-at ti amin a tao iti lubong” ti panggepna para iti sangatauan. (Dakami ti nangitaliko.) Pinanggep ti Namarsua kadatayo a naan-anay ti kinasalun-at ti amin!
Apay ngarud nga agsagsagabatayo amin iti sakit ken an-annayen? Saritaen ti Biblia kadatayo nga inaramid ni Jehova a Dios a naan-anay dagiti nagannak ti intero a sangatauan a da Adan ken Eva. Idi nalpasnan ti panamarsuana, “nakita ti Dios ti isuamin nga inaramidna ket, adtoy! nasayaat unay dayta.” Pulos a di pinanggep ti naayat a Namarsua kadatayo a madidigra ti biag ti tao iti sakit ken ipapatay. Ngem idi inkeddeng da Adan ken Eva a baybay-an ti wagas ti biag a naisuro kadakuada, nagbasolda. Ipapatay ti imbunga ti panagbasol ni Adan, a nayallatiw iti amin a tattao.—Genesis 1:31; Roma 5:12.
Saan a binaybay-an lattan ni Jehova ti sangatauan. Saanna met a binaybay-an ti orihinal a panggepna para kadakuada ken iti daga. Iti intero a Biblia, impakaammona ti panggepna a mangisubli kadagiti natulnog a tattao iti dati a kinasalun-atda. Idi adda pay laeng ditoy daga ti Anak ti Dios a ni Jesu-Kristo, impakitana ti pannakabalin ti Dios a mangagas kadagiti sakit. Kas pagarigan, inagasan ni Jesus ti kinabulsek, kukutel, kinatuleng, panagebbal, panagkissiw, ken paralisis.—Mateo 4:23, 24; Lucas 5:12, 13; 7:22; 14:1-4; Juan 9:1-7.
Asidegen a bilinen ti Dios ti dinutokanna a Mesianiko nga Ari a ni Jesu-Kristo tapno iturayanna ti ar-aramid iti lubong ti sangatauan. Iti sidong ti administrasionna, pumaysonto ti padto ni Isaias: “Awanto ti agtataeng nga agkuna: ‘Masakitak.’ Dagiti umili nga agnanaed iti daga isudanto dagidiay napakawan ti biddutda.” (Isaias 33:24) Kasano a mapasamak daytoy?
Madlawtayo nga agsursurat ti propeta maipapan kadagiti tattao a “napakawan ti biddutda.” Gapuna, mapukawton ti orihinal a pakaigapuan ti sakit nga isu ti basol a tinawid ti sangatauan. Kasano? Maipakatto ti pateg ti daton a subbot ni Jesus iti natulnog a sangatauan, isu a maikkat ti pakaigapuan ti sakit ken ipapatay. Masagrapton ti sangatauan dagiti naparaisuan a kasasaad iti amin a paset ti daga. Kastoy ti insurat ti Kristiano nga apostol a ni Juan: “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” Asidegen dayta!—Apocalipsis 21:3, 4; Mateo, kapitulo 24; 2 Timoteo 3:1-5.
Panangtaginayon iti Kinatimbeng
Kabayatanna, sagsagabaen ti minilion a tattao ti sakit ken an-annayen. Gagangay laeng ngarud a maseknan dagiti tattao iti salun-atda ken iti salun-at dagiti ay-ayatenda.
Ti panangikagumaan dagiti doktor ket apresiaren unay dagiti Kristiano iti kaaldawantayo. Adda dagiti nainkalintegan nga ar-aramidenda tapno nasalun-atda wenno agtalinaedda a nasalun-at. Nupay kasta, ti kari ti Biblia nga awanen ti sakit iti masakbayan ti tumulong kadatayo a mangtaginayon iti kinatimbengtayo maipapan iti daytoy. Saan pay laeng a magun-odan ti naan-anay a salun-at agingga nga iturayanen ti Mesianiko nga Ari ti ar-aramid ti sangatauan. Kas nakitatayon, uray addan dagiti nakaskasdaaw unayen a takuat, di pay laeng magaw-at ti medisina ti kayariganna katutubbogan a mansanas nga adda iti tuktok ti kayo—ti kinasalun-at ti amin.
Asidegen a maragpat ti kalat a “makaay-ayo a kasasaad ti salun-at ti amin a tao iti lubong.” Ngem saan a babaen ti UN wenno ti World Health Organization wenno dagiti agipalplano iti aglawlaw wenno dagiti repormador iti kagimongan wenno dagiti doktor. Ni laeng Jesu-Kristo ti makaibanag iti dayta. Anian a rag-o inton kamaudiananna, ti sangatauan “mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios”!—Roma 8:21.
[Dagiti ladawan iti panid 10]
Nasalun-atton ti amin idiay baro a lubong ti Dios