Inton Awanen ti Sakit!

ADU ti mangnamnama a mawayawayaandanto manipud iti ut-ot ken sakit no addadanto idiay langit kalpasan ti ipapatayda. Nupay kasta, maisupadi iti patpatien ti kaaduan, ti namnama a biag iti paraiso a daga ti talaga nga ituktukon ti Biblia iti sangatauan. (Salmo 37:11; 115:16) Daytoy a naikari a masakbayan iramanna ti naan-anay a salun-at, kinaragsak, ken biag nga agnanayon.

Apay nga agsakit ken mataytayo? Ken kasano a maragpat ti maysa a lubong nga awanan iti sakit? Sungbatan ti Biblia dagitoy a saludsod.

◼ Ti pudno a makagapu iti panagsakit Dagiti immuna a nagannak kadatayo a da Adan ken Eva naparsuada nga addaan iti perpekto a nasalun-at a bagi. (Genesis 1:31; Deuteronomio 32:4) Naparsuada nga agbiag nga agnanayon ditoy daga. Nangrugida laeng nga agsakit idi sipapakinakem nga immalsada iti Dios. (Genesis 3:17-19) Idi inlaksidda ti autoridad ti Dios, simminada iti Namarsua kadakuada, ti Gubuayan ti perpekto a biag. Naaddaanda iti depekto. Nagbanaganna, nagsakit ken natayda, kas impakdaar ti Dios a mapasamak kadakuada.—Genesis 2:16, 17; 5:5.

Kalpasan ti iyaalsa da Adan ken Eva, kinaimperpekto laeng ti maipatawidda kadagiti annakda. (Roma 5:12) Makita dagiti sientista ita nga adda dagiti natawid a depekto a pakaigapuan iti sakit ken ipapatay, kas nadakamat iti immuna nga artikulo. Nabiit pay nga imbaga ti grupo dagiti sientista kalpasan ti adu a panagsirarak: “Di maliklikan ti kinapudno nga apaman a mangrugin ti biag, mangrugi metten a mangpataud ti bagi kadagiti depekto a pakaigapuan iti pannakadadaelna.”

◼ Saan a babaen ti tao Nakaskasdaaw ti nagapuanan ti siensia iti panangikkat iti sakit. Ngem nakarikrikut ti pakaigapuan iti sakit isu a saan a naan-anay a marisut dayta ti siensia. Saan a nakaskasdaaw daytoy kadagiti estudiante ti Biblia a makaammo iti naipaltiing a sasao ti Dios: “Dikay ikabil ti panagtalekyo kadagiti natan-ok, wenno uray iti anak ti naindagaan a tao, a kenkuana awan pannakaisalakan.”—Salmo 146:3.

Nupay kasta, kas kuna ti Biblia, “ti bambanag a di mabalin iti tao mabalin iti Dios.” (Lucas 18:27) Kabaelan ni Jehova a Dios a pukawen ti pakaigapuan iti sakit. Paimbagenna ti amin a sakittayo. (Salmo 103:3) Kastoy ti ikari ti naipaltiing a Saona: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”—Apocalipsis 21:3, 4.

◼ Ti masapul nga aramidem Nabatad ti panangilawlawag ni Jesu-Kristo no ania ti masapul nga aramidentayo tapno agbiagtayo iti lubong nga awanan iti sakit. Kastoy ti kinunana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”—Juan 17:3.

Naglaon ti Biblia iti pannakaammo maipapan iti Dios ken dagiti pannursuro ti Anakna a ni Jesus. Ti kasta a pannakaammo ramanenna dagiti praktikal a balakad a mangpasayaat iti biagtayo ita. Ngem malaksid iti dayta, ikarkari ti Dios kadagiti natulnog nga agdaydayaw kenkuana ti maysa a lubong nga awanan iti sakit. Wen, ituktukon ti Dios kenka ti maysa a masanguanan nga ‘awan ti agtaeng nga agkuna: “Masakitak”’!—Isaias 33:24.

[Kahon/Dagiti Ladawan iti panid 11]

Natimbeng a Panangmatmat iti Salun-at

Iparparegta ti Biblia ti panangipateg iti biag. Ipatpateg dagiti Saksi ni Jehova ti biag babaen ti panangikagumaanda a mangaywan iti salun-atda. Liklikanda dagiti makadangran nga aramid, kas iti panagdroga ken panagtabako. Namnamaen ti Dios a kalkalainganna laeng ti panaginum ken pannangan dagiti managdaydayawna. (Proverbio 23:20; Tito 2:2, 3) Dagita a praktikal a wagas, agraman ti umdas nga inana ken ehersisio, itantanna wenno lapdanna ti adu nga an-anayen ti bagi. Dagiti masakit mabalin a masapulda ti tulong dagiti mapagtalkan a doktor.

Iparparegta ti Biblia ti kinanainkalintegan ken “kinasimbeng ti panunot.” (Filipos 4:5; Tito 2:12) Ita, adu ti saan a natimbeng ken maseknan unay iti panagbirokda kadagiti agas, uray no mabaybay-anda ti espiritualidadda. Sumagmamano ti agusar kadagiti kuestionable a panangagas a mabalin a makadangran. Dadduma ti mangsayang iti kuarta ken panawenda kadagiti panangagas ken agas a saan a makapaimbag wenno makadangran pay ketdi.

Ngem talaga a saan pay a magun-odan ita ti naan-anay a salun-at. Bayat nga ur-urayem ti masanguanan inton awanen ti sakit, makatulong kenka ti kinasirib ken kinanainkalintegan a masarakan iti Biblia tapno makapagtalinaedka a natimbeng no maipapan iti tarigagaymo a maaddaan iti nasayaat a salun-at.