Manipud Kadagiti Agbasbasa
Awanan Ayat a Panagasawa Kasla awanen ti direksion ti panagasawami. Kasla saankamin nga agin-innayat nga agassawa no di ket agin-innanuskami laengen. No dadduma, pampanunotekon ti makidiborsio. Ngem agyamanak iti serye a “Mabalinmi Kadi a Salbaren ti Panagasawami?” (Enero 8, 2001) ta rimmusing manen ti panaginnayatmi.
E. R., España
Maysaak a Kristiano nga asawa a babai, ngem makatawenen a miserable ti pannakiasawak. Gapu ta nagpinnasakitkami unay ken ni lakayko, kasla imposiblen nga agsinnublianankami pay. Ngem idi nabasak dagitoy nga artikulo, kasla ibagbaga ni Jehova a ‘Dika sumuksuko!’ Natignayak tapno ikagumaak a pagrusingen manen ti dati a nabara a panaginnayatmi. Mangrugrugin a madlawko a kasta met ti ar-aramiden ni lakayko. Basaekto manen dagitoy nga artikulo.
N. H., Japan
Nabiit pay a nabautisaranak ket busbusorennak idi ti di manamati a baketko. Nakatulong dagiti artikuloyo tapno mapagballigik ti panagasawak. Dimtengda iti umiso a tiempo.
W. S., Australia
Tangay naragsak ti panagasawak, rinugiak a binasa dagitoy nga artikulo ta impagarupko a makatulongda iti panangandingayko iti sabsabali. Ngem iti pangrugian pay laeng ket addaanen ti serye kadagiti praktikal a punto a mangpalagda iti singgalut ti panagasawak.
M. D., Italia
Imbaga kaniak ti maysa a Kristiano a kabsat a babai a kakongregasionko a dida agkatunosan ken ni lakayna isu a nagsinadan. Idi agangay, imbagana a nasaysayaaten nga amang dagiti kasasaad. “Binasa ken inyaplikarna” dagitoy nga artikulo, ket dakkel ti naitulongda kenkuana a nangrisut iti parikut. Kinunana a dagiti komento maipapan iti komunikasion ti nangnangruna a nakatulong. Nagsinnublianandan nga agassawa.
N. S., Canada
Ventriloquism Nariroak iti artikulo a “Siasino ti Agsasao?” (Enero 8, 2001) Saan kadi a daytoy ti taktika nga inusar ni Satanas a nangallilaw ken Eva? Ti panangallilaw ken panangsikap ket rumbeng a saan nga agbalin a paset iti biag ti maysa a Kristiano.
B. H., Estados Unidos
Aniaman a pamay-an ti panangallilaw ni Satanas ken ni Eva, mabalin a saan a pudno a kita dayta ti ventriloquism, tangay mairaman iti dayta a paglaingan ti espesipiko a panaganges ken taktika ti panagsao idinto ta ni Satanas ket maysa nga espiritu a parsua. Awan ti mabasa iti Biblia a maipawil ti panagusar iti ventriloquism kas maysa a klase ti panaglinglingay. Natural a dakes no mausar ti kasta a paglaingan tapno maallilaw ti maysa a tao iti pakairubuanna wenno tapno maitandudo dagiti espiritistiko nga aramid, kas iti mabalin nga inaramid ti dadduma idi panawen ti Biblia. (Isaias 8:19)—ED.
Kaay-ayok met ti arte ti ventriloquism ket namin-adun nga inaramidko dayta kadagiti Nakristianuan a taripnong. Kas impatuldo ti artikulo, di unay malasin ti lapayag ti tao ti pagtataudan dagiti uni. Ngem nakaskasdaaw ta saanmo a maallilaw ti maysa nga animal iti kastoy a taktika. No usarek ti muniekak a makisarita iti asok, siak ti kitaenna, saan a ti muniekak. Dagiti animal ket inikkan ni Jehova iti nakalawlawag a panagdengngeg.
L. R., Estados Unidos
Kalbo nga Aso Ugalikon ti kanayon nga agbasa nga umuna kadagiti artikulo a diak unay magustuan. Yantangay talaga a diak magustuan dagiti aso, ti immuna nga artikulo a binasak ket ti adda iti ruar ti Enero 8 a “Nakakitaka Kadin iti Xoloitzcuintli?” Idi nabasak ti artikulo, dandani ensigida a kayatkon ti maaddaan iti maysa kadagita nga aso! Siempre, nagpanunotak manen a naimbag. Sabagay, iti 40 a tawenen a panagbasak kadagiti magasinyo, pulos a diak pay naupay. Masansan a magustuak dagiti mismo nga artikulo a pagarupek a diak magustuan.
D. W., Estados Unidos