Natalged Kadi ti Anakmo?

Sigun iti National Highway Traffic Safety Administration (NHTSA) ti E.U., ti pannakaidungpar dagiti lugan ti kangrunaan a pakatayan ti ubbing nga agedad iti nagbaetan ti 5 ken 14. Kuna ti NHTSA: “Nasurok a 50% kadagiti ubbing a matay iti dinnungparan ket saan a nasalakniban [babaen kadagiti natalged nga alikamen]. Kanayonanna, di umisot’ pannakasalaknib ti 4 iti kada 5 nga ubbing.”

Mangipaay ti NHTSA iti sumagmamano a natalged a singasing ken panagannad kadagidiay agmaneho nga adda kakuyogda nga ubbing. Nupay nadumaduma ti linteg iti sabasabali a pagilian ken uray iti nadumaduma nga estado wenno probinsia, mabalin nga agserbi dagitoy a pagannurotan a pagpanunotan ti adu a nagannak ken agay-aywan iti ubbing. Pangngaasim ta ammuem dagiti linteg iti lugarmo ket aramidem ti amin a kabaelam tapno agtalinaed a natalged ti napapateg nga ubbing a pasaherom!

DAGITI SINGASING AGPAAY ITI KINATALGED

Ti makinlikud a tugaw ti katatalgedan a pagtugawan ti amin nga ubbing.

1 Maikabil koma dagiti maladaga iti sumango iti likud a mangsalaknib a tugaw ti ubing iti makinlikud a tugaw iti lugan.

2 Ti ubing nga agarup makatawenen ken agtimbang iti 9 a kilo ket mabalin a maikabil iti tugaw a sumango iti sanguanan.

3 No agtimbang iti 18 a kilo, mabalin nga agtugaw ti ubing iti “maital-o a tugaw,” a masalakniban babaen ti maysa kadagiti lap belt ken shoulder belt ti lugan.

4 No agtimbang iti agarup 36 a kilo, ken agarup uppat a pie siam a pulgada ti katayagna, mabalinen nga usaren ti ubing ti seat belt ti nataengan.

DAGITI PAKDAAR

Saan koma nga agtugaw dagiti ubbing iti abay ti tsuper agingga nga agtawendan iti di kumurang a 13. Dagiti air bag para iti tsuper ken iti kaabayna a pasahero ket mabalin a pakaigapuan ti nakaro a pannakadangran kadagiti ubbing ken maladaga.

No mausar ti maital-o a tugaw, saan nga umdas a mangsalaknib ti lap belt laeng no awan sarapa ti maital-o a tugaw.

Saanmo a pagarupen nga umdasen ti shoulder belt a mangsalaknib iti ubing; no adda dinnungparan, mabalin a dayta ti mangbekkel iti ubing, a pakaigapuan ti nakaro a pannakadangran ken ipapatay pay ketdi.

Siiinget a surotem dagiti instruksion no mangikabkabit ken mangus-usarka kadagiti pagtugawan ti ubbing. Sigun iti NHTSA, “uray ti ‘katatalgedan’ a tugaw ket mabalin a di mangsalaknib iti anakmo no saan nga umiso ti pannakausarna.”

[Ladawan iti panid 31]

Ti umiso a panangikabit iti tugaw ti ubing karamanna ti natalged a panangikabit iti seat belt