Dagiti Di Am-ammo nga Animal Idiay Vietnam
“TI MAKAPAGAGAR unay a panawen ti panagtakuat kadagiti animal iti daytoy a siglo,” ti siraragsak a kinuna ti kurador dagiti mamalia idiay London Zoo a ni Douglas Richardson. Tuktukoyenna idi ti pannakatakuat iti sumagmamano a dadakkel nga animal kadagiti nasulinek a kabakiran ti Vietnam iti napalabas a sangapulo a tawen.
Iti adu a dekada, saan idi a makapan dagiti sientista kadagitoy a kabakiran gapu kadagiti nadara a rinnupak. Ita, nupay kasta, us-usarenen dagiti managsirarak kadagiti animal nga agtartrabaho sadiay dagiti automatiko a kamera tapno maretratoda dagiti animal. Maysa kadagitoy ti Vietnamese rhinoceros, a maysa a klase dagiti kita ti Javan rhino, ken maysa kadagiti kita ti animal iti lubong nga agpegpeggad unay a maungaw.
Ti maysa pay kadagiti nalabit maawagan a di am-ammo nga animal idiay Vietnam ket ti maysa nga antilop a kaasping ti baka a pagaammo met kas ti Vu Quang ox. Daytoy a parsua, a natakuatan idi 1992 iti reserbasion dagiti gameng ti nakaparsuaan idiay Vu Quang, ket agtimbang iti agarup 100 a kilo ken 1 a metro ti katayagna manipud iti abagana. Posible a kabagian dayta ti baka, antilop, wenno kalding. Iti isu met la a reserbasion, tallo pay nga ugsa ti natakuatan—ti nagdakkelan a muntjac idi 1993, ti Truong Son muntjac idi 1997, ken ti leaf muntjac idi 1998.
Idi 1996, natakuatan dagiti sientipiko iti Tainguen Plateau idiay Vietnam ti bassit nga animal nga aktibo no rabii ken kumakaan iti karne nga isu ti Tainguen civet. Agtimbang iti 6.6 agingga iti 16.5 a libra ken agnanaed iti naagneb a kabakiran iti tropiko.
Inlawlawag ni Richardson a kanayon a makakitada kadagiti babassit nga animal—nalabit agingga iti 20 a nadumaduma a tukak iti unos ti makatawen—ngem talaga a di ninamnama ti kaadda dagitoy a daddadakkel nga animal, kuna ti periodiko a The Independent ti London.
[Dagiti ladawan iti panid 31]
Tainguen civet
Vu Quang ox
Truong Son muntjac
Vietnamese rhinoceros
[Dagiti Credit Line]
Kabakiran: © Wildside Photography
Vietnamese rhino: AP Photo/World Wildlife Fund, Mike Baltzer; ti tallo pay nga animal: Impaay ti EC-SFNC/Iti panangbigbigna iti panangsuporta ti European Commission iti programa a naadornuan a panangretrato