Manipud Kadagiti Agbasbasa

Mangispal Biag nga Artikulo Sinarungkaranmi ti maysa a lalaki nga agnagan Lenny a nangibaga a ti artikulo a “Dengue​—Gurigor nga Agtaud iti Kagat” (Hulio 22, 1998) ti nangispal iti biag ti kaanakanna. Nangato idi ti gurigorna iti adun nga aldaw, ket nagsupotsupot; ngem impagarup ti dadakkelna a kamuras dayta. Gapu ta nalagip ni Lenny ti artikulo, binirokna dayta sana binasa manen ti paset a nangdeskribir kadagiti sintoma ti dengue. Kalpasanna, kinasaritana ti dadakkel ti kaanakanna tapno iyospitalda. Pinatalgedan dagiti doktor sadiay nga adda dengue hemorrhagic fever ti kaanakanna. Kinomendaran ni Lenny ti Agriingkayo! gapu ta nakatulong kenkuana a mangispal iti biag ti kaanakanna, ket idi agangay, immanamongen a makipagadal iti Biblia iti pagtaenganna.

J.M.L., Pilipinas

Marfan’s Syndrome Iti artikulo a “Panangibtur iti Marfan’s Syndrome​—No Masukto Dagiti Susuop” (Pebrero 22, 2001), imbaga ni Michelle nga agtomtomar iti morpina iti kada aldaw. Rumbeng kadi nga agusar ti maysa a Kristiano iti makaadikto a droga?

S. D., Estados Unidos

Dakes para iti maysa a Kristiano ti agusar iti droga tapno mapadasanna laeng ti patauden dagitoy a napalalo a kinaragsak. Nupay kasta, ti maysa nga agtomar iti mangep-ep ut-ot a narkotiko nga inreseta ti maysa a doktor gapu iti sakit ket di maibilang nga agsapsapul iti pakaragsakan. Siempre, uray kadagiti kasasaad a kas iti dayta, rumbeng a tingitingen a naimbag ti maysa a Kristiano ti posibilidad nga isut’ maadikto agraman ti dadduma pay a pagdaksan ti kasta nga agas.​—ED.

Naparegtaak iti kapadasan ni Michelle. Nupay kanayon a makarikna iti ut-ot, dayawek ti dina panangipalubos a dagiti kasasaadna ti mangpasardeng iti naimpusuan a panagserbina ken Jehova.

J. G., Guam

Naipugso a Radioaktibo Nadismayaak iti artikuloyo a “Naipugso a Radioaktibo​—Makapadanag.” (Pebrero 22, 2001) Gapu iti panagreggetyo a mangitandudo iti panangmatmatyo iti Biblia, dikay koma agus-usar kadagiti mangpadanag a taktika tapno butbutngen dagiti tattao. Dagiti peligro ket maiparang koma iti umiso a kontekstoda. Kas pagarigan, mabalin a medio natalged ti koriente no mausar a siaannad. Ngem adu a tattao ti matay iti kada tawen gapu iti pannakakorienteda. Kayat kadi a sawen daytoy a rumbeng a maamaktayo amin ken kabutengtayon ti koriente? Ti agpayso ket, kasapulan ti amin a pagilian ti ad-adunto pay nga amang a koriente iti masakbayan. Dagiti nuklear a reaktor ti agbalbalin kas ti kadadalusan ken katatalgedan a pamay-an a pangsuplay iti dayta. Rumbeng a ditay kabuteng ti nuklear nga enerhia.

R. S., Canada

Narikut dagitoy nga isyu ket apresiarenmi ti kinaprangka ti agbasbasa. Nupay kasta, patienmi a saan a nagusar ti artikulomi kadagiti “mangpadanag a taktika.” Awan panggepmi a mangbutbuteng kadagiti agbasbasa. Saanmi met a kinondenar ti nuklear nga enerhia. Imbes ketdi, impaganetgetmi dagiti nainkalintegan a pakaseknan ti adu maipapan iti bileg nuklear, nga impatuldomi a ti Pagarian ti Dios ti kakaisuna a makaipaay iti solusion iti kinakirang ti enerhia.​—ED.

Insurance Kas ahente ti insurance, talaga nga apresiarek ti naitampok a serye nga “Insurance​—Talaga Kadi a Kasapulam Dayta?” (Pebrero 22, 2001) Iti kaaduan a kliente, mabalin a makariro unay ti insurance. Narigatda a maawatan no apay nga agbayadka iti mabalin a saanmonto pulos a mausar. Apresiarek ngarud ti ilustrasionyo maipapan iti panangitugot iti reserba a dalig. Pagyamanan iti daytoy nagsayaat ti pannakaisuratna nga impormasion.

C. P., Estados Unidos

Panaglibas Pagyamanan iti artikulo nga “Agimtuod Dagiti Agtutubo . . . Ania ti Pagdaksan Unay ti Panaglibas?” (Pebrero 22, 2001) Maladingitanak a makakita no kasano a nalaka a mamatpati ti sumagmamano nga agtutubo a Kristiano. Narames ti maysa a balasitang a naglibas tapno makidaya. Awan ti timmulong kenkuana. Pangngaasiyo ta itultuloyyo a pakdaaran dagiti agtutubo!

J. N., Estados Unidos