Manipud Kadagiti Agbasbasa
Bilang Dagiti Adipen Masuronak iti ababa a naipadamag iti “Panangmatmat iti Lubong” a napauluan “Dagiti Kabiitan a Rumang-ay a Dakes a Negosio.” (Disiembre 22, 2000) Dakamaten ti ababa a padamag a 11.5 a milion a tagabo ti naipanaw idiay Africa kabayatan ti 400 a tawen a panangadipen. Nagpatingga ti panangadipen idiay Estados Unidos idi 1865. No uppat a gasut a tawenen ti napalabas, agsublitayo iti tawen 1465—adayo a nasapsapa ngem iti pannakaipasdek ti kolonia idiay Jamestown!
M. B., Estados Unidos
Sigun iti “Encyclopædia Britannica,” nangrugi idi “kattapog ti dekada 1450” ti pannakaibiahe dagiti Africano a tagabo. Kuna dagiti historiador a dagiti nakumaw nga Africano ket naipan kadagiti plantasion iti adu nga isla iti Atlantiko sakbay pay a simmaknap ti pannakainegosio dagiti tagabo iti Caribe ken Estados Unidos.—ED.
Panagtakaw iti Pakabigbigan Nagustuak a binasa ti artikuloyo a “Mabalinda a Takawen ti Pakabigbigam!” (Marso 22, 2001). Adda nangtakaw iti numero ti checking account-ko, nagaramid kadagiti peke a tseke, sa ginastona ti dandani $800! Medio nabayag sakbay a nairemedio ti kasasaad—inserrak ti kuentak, nanglukatak iti baro, ken impulongko dayta iti polisia. Nasursurok a rumbeng nga agannadak no mangtedak iti impormasion maipapan iti kinataok.
D. S., Estados Unidos
Nagbiahe ni lakayko gapu iti negosio ket natakaw ti bagna agraman ti amin a credit card ken checkbook-mi. Ti artikulo maipapan iti panagtakaw iti pakabigbigan ti eksakto a nakasursuruanmi no kasano a tamingen ti bambanag, agraman ti pannakiuman kadagiti departamento a mangtamtaming iti panangsikap a makaammo kadagiti managutang iti lugarmi. Daytoy ti nanglapped iti ad-adu pay a panagutang dagiti mannanakaw. Diak koma pulos napanunot dayta a bukbukodko.
H. C., Estados Unidos
Ti Init Masansan nga agyamanak ken Jehova gapu iti init, bulan, ken ti napintas a dagatayo, ngem kaaduanna, diak unay pampanunoten dagitoy a banag. Kalpasan a nabasak ti artikulo a “Ti Naisangsangayan a Pannakaparsua ti Inittayo” (Marso 22, 2001), natignayak nga agkararag a naimpusuan ken agyaman iti Dios gapu kadagiti aglaplapusanan ken agkakapateg a sagutna.
B. P., Estados Unidos
Siam ti tawenko, ket kayatko ti agyaman iti panagsuratyo kadagita a makapainteres nga artikulo—kas iti daytoy nga artikulo maipapan iti init. Talaga a nagadu ti maadalko no agbasaak iti Agriingkayo!
A. B., Estados Unidos
Buok Maysaak a hairdresser, ket idi nabasak ti artikulo a “Panangusig a Naimbag iti Buokmo” (Abril 8, 2001), naragsakanak. Inikkak ti amok iti kopiana. Naragsakan ket intedna dayta iti dadduma pay a katrabahuak. Pagyamanan iti dayta a praktikal nga impormasion.
D. L., Romania
Pagyamanan iti footnote a nangdakamat iti napalabas nga artikulo nga “Alopecia—Panangibtur a Siuulimek iti Panagurot ti Buok.” (Abril 22, 1991) Ag-17 a tawenen nga addaanak iti alopecia. Iti lubong a ti langa laeng ti kapatgan ken maipuera ti siasinoman a naiduma, makaparegta a maammuan nga an-andingayennak ni Jehova ken ti organisasionna.
M. G., Italia
Pakasaritaan ti Maysa nga Artist Agserserbiak nga agdaldaliasat a manangaywan dagiti Saksi ni Jehova, ket adda am-ammok a pamilia a ti asawa a lalaki ket saan pay a rimmang-ay unay kas maysa a Kristiano. Nasingpet a tao, ngem pagesmanna ti agaramid kadagiti modelo nga eroplano a pakigubat. Adda ay-ayam iti computer-na maipapan iti panagraranget ken adu nga oras ti busbosenna a mangpaltog kadagiti eroplano a pakigubat dagiti kabusor. Inkagumaanmin a tulongan tapno maawatanna a nasken a balbaliwanna ti kababalinna maipapan iti gubat. Ita ta addan daytoy nagsayaat a pakasaritaan ni Dorothy Horle a napauluan “Panangitandudo iti Talna Imbes a Gubat” (Abril 8, 2001), panggepko nga iranud dayta kenkuana.
P. P., Dominican Republic