Ti Baro a Buya ti British Museum
BABAEN TI MANNURAT TI AGRIINGKAYO! IDIAY BRITANIA
Iti kada tawen, dandani innem a milion ti sangailien ti British Museum iti London. Agarup makatawen ti napalabas, limmawa dayta iti 40 a porsiento tapno malaonna dagitoy a bunggoy. Kasano a nagbalin a posible dayta?
Idi 1759, nalukatan ti libraria ti British Museum ken ti British Museum iti publiko. Nairingpas idi 1852 ti pasdek nga ayan ita dagitoy. Ngem idi 1997, nayakar ti libraria a pagaammo kas ti British Library kadagiti baro a pasdek nga adda iti asideg. Nayakar sadiay ti 12 a milion a naimaldit a libro ken pinullo a ribu a manuskrito ken pagtimbre. Gapu iti dayta, limmawa ti British Museum babaen ti pannakalukat ti makintengnga a paraangan—a saan a nakita ti publiko iti dandani 150 a tawen!
Ti naatepan a Reading Room ti kangrunaan a makaallukoy a buya iti bakante itan a paraangan a maawagan Great Court. Sipud iti panangrugina idi 1857, daytoy a Reading Room ti lugar a magusgustuanen dagiti managsirarak manipud iti intero a lubong. Da Mohandas Gandhi, Charles Darwin, ken Karl Marx ti sumagmamano laeng kadagiti nalatak a tattao a nagtrabahon iti naulimek a kinapribado daytoy nakapatpateg a libraria. Iti kaunaan a gundaway, daytoy a siled ket nalukatanen iti publiko. Addan iti unegna ti koleksion ti museo a 25,000 a libro.
Naisubli ti dati a kinadaeg ti atep daytoy historiko a siled. Agtimbang iti 800 a tonelada ti nangayed a bobida ti Great Court, ken ti Reading Room. Naikabit iti baskag nga asero ti ag-3,312 a trianggulo a sarming, a siaannad a rinukod ti computer ti kadakkel ti tunggal pedaso.
Iti uneg ti Reading Room, addaanen ti British Museum kadagiti computer a pangkitaan iti rinibu kadagiti agkakapateg a gamengna. Dagiti nabalbaliwan ti estrukturana a pasilidad ket awagan ti The Times iti London nga obra maestra. Siraragsak nga umanamong dagiti sangaili!
[Picture Credit Lines iti panid 31]
Makinngato a tengnga ken baba: Copyright The British Museum; All others: Copyright Nigel Young/The British Museum