Manipud Kadagiti Agbasbasa
Pannakaidestiero Idiay Siberia Kayatko nga iyebkas ti naimpusuan a panagyamanko iti pakasaritaan ni Fyodor Kalin iti serye a “Relihion Idiay Russia—Ania ti Masakbayanna?” (Abril 22, 2001) Makaparegta a basaen ti pannakaideporta ti pamiliana idiay Siberia ken no kasano a nagtalinaedda a matalek ken naragsak uray kadagiti karirigatan a kasasaad. Naaddaanak iti napateg a gundaway a simmarungkar iti dadduma kadagiti Kristiano a kakabsattayo idiay Moldova sumagmamano a tawenen ti napalabas, ket diakto pulos malipatan ti adu nga insalaysayda maipapan iti pannakaideportada idiay Siberia. Ti panagtalekda ken ni Jehova ken ti pammatida ti nangparegta kaniak nga agtalinaed met a matalek.
G. F., Sweden
Tuleng ken Bulsek Pagyamanan iti artikuloyo maipapan ken ni Janice Adams a “Nupay Tuleng ken Bulsekak, Kinatalged ti Nasarakak.” (Abril 22, 2001) Diak pulos impagarup idi nga adda tuleng ken bulsek a mangparegta unay kaniak. Agkarasakitkami ken ni lakayko iti pisikal ken emosional. Dagiti artikulo a kas iti daytoy ti mangpabaro iti pammatimi nga agibtur agingga iti panungpalan.
P. G., Estados Unidos
Masansan a tagtagilag-anenmi ti adda kadakami. Nalabit aglangankami iti Nakristianuan a gimong gapu iti simple laeng a sakit ti ulo. Ngem uray no adda dagiti rason tapno agtalinaed koma lattan ni Janice iti pagtaengan—kas iti depression ken ti linak-amna idi a pannakaabuso—nagtaklin ken Jehova a mangted kenkuana iti nasken a bileg tapno makapagtalinaed nga aktibo iti naespirituan a panagbiag.
C. D., Italia
Nakasalsalun-atak, isu a naiduma ti kapadasak ken ni Janice. Ngem gapu ta napasarak ti naasingan idi ages-eskuelaak iti elementaria, masansan nga agsagabaak iti depression. Agkarasangitak ken talaga a madi ti riknak. Parparegtaendak dagiti padak a Kristiano ken an-andingayendak dagiti dadakkelko. Nupay kasta, naimpusuan nga agyamanak latta gapu iti pakasaritaan ni Janice Adams. Dayta ti nangpabileg kaniak.
M. T., Japan
Lolo ken Lola Pagyamanan iti artikulo nga “Agimtuod Dagiti Agtutubo . . . Apay a Rumbeng a Maam-ammok Da Lolo ken Lolak?” (Abril 22, 2001) Nakasingsingedkami idi ken ni lolak. Idi nagdiborsio ti dadakkelko, nagadu ti kayatko a maammuan ken masansan nga agsangitak. Kanayon a sidadaan ni lola a timmulong kaniak. Inkuyognak a nangasaba ken impasagepsepna kaniak ti panagayat iti ministerio. Sinurotko ti ulidanna ken nagbalinak met nga amin-tiempo a managebanghelio uppat a tawen ti napalabasen. Uray kalpasan a naaddaan iti Alzheimer’s disease ken dinakon mabigbig, maragsakan idi no ibasaak kadagiti teksto iti Biblia maipapan iti Paraiso. Natay idi Setiembre 2000. Pagyamanan unay iti panangisuroyo kadagiti agtutubo maipapan iti kinapateg dagiti lolo ken lolami.
C. R., Estados Unidos
Sangapulo a tawenen a nagdiborsio ti dadakkelko. Gapu ta inkeddengko nga agbalinak a nasungdo ken ni nanangko, ginupedko ti relasionko iti pamilia ni tatangko. Ngem kalpasan a nabasak dagitoy nga artikulo, naawatak ti kinapateg ken pagimbagan ti maaddaan iti nasayaat a relasion kadagiti nagannak ni tatangko. Gapu kadagita nga artikulo, addaanak itan iti sumagmamano a naibasar iti Biblia a singasing tapno mapatanorko dayta a relasion.
G. V., Estados Unidos
Nupay saan a Kristiano ti uppat a lolo ken lolak, nasayaat ti relasionko kadakuada. Addaanak met iti “lola” iti kongregasion—maysa a Kristiano a kabsat a babai a dandanin agtawen iti 70. No adda problemak, ibasaannak iti Biblia ken paregtaennak. No dadduma, basta iggamanna ti imak wenno sallabayennak. No dadduma, mariknak a kasla agkataebkami laeng.
M. K., Japan