Ti Nakaskasdaaw a Banda ti Bulo iti Solomon Islands

Babaen ti mannurat iti Agriingkayo! idiay Solomon Islands

NAPADASAM kadin ti nagtokar iti panpipe? Mabalin a mariroka iti rumbeng a pamay-an ti panagangesmo. Ngem panunotem ti panagtokarmo kadagiti tubong nga innem a pie ti kaatiddog ken dua a pulgada ti diametroda ken masapul a paggarawem ti intero a bagim tapno mapagunim ti maysa a nota. Ti panangpatokar iti 40 kadagitoy nga instrumento buklenna ti maysa kadagiti nakaskasdaaw a banda ti bulo iti Solomon Islands. Wen, naaramid iti bulo ti kada instrumento daytoy a banda! Ti adu a nadumaduma a bulo ken runo iti napuskol a tropikal a kabakiran iti Solomon Islands ti mangpataud iti makaay-ayo unay nga uni ti kasinggitan a soprano agingga iti kabangagan a gumluong a baho.

Agpasiartayo iti maysa a bodega idiay Honiara, a sadiay dagiti Tumutokar iti Plauta ti Narasirato isagsaganada dagiti instrumentoda ken agen-ensayoda sakbay a mapanda agkonsierto idiay Taiwan. Dadduma nga instrumento ket addaan iti tallo a plauta, a mapaguni tapno mangpataud iti trio, wenno agbabagay nga uni. Ig-iggaman dagiti musiko ti tallo a plauta ken ipikpikpikda dagitoy iti dalumpinas tapno masigurado nga agbabagay ti unida. No di agbabagay, maputdan ngarud ti pungto ti di maibagay a plauta. Di mapuyot dagitoy a plauta. Mareppetan iti goma ti makimbaba a murdong ti kada plauta, sa maitaltag dagitoy a sibubukel iti daga. Anian a nakaskasdaaw a gumluong nga agbabagay nga uni ti mapataud!a

Narigat a deskribiren ti uni no mangrugin nga “agtokar” dagiti plauta. No dadduma nakalamlamuyot ti uni; makasisileng no dadduma. Maurnos ti tunggal komposision, ket balbaliwan dagiti musiko ti posisionda no agtoktokarda. No maminsan karkarna ti ayug ti musika, ngem kaaduanna, daytat’ makaparagsak ken makaguyugoy iti panagsala. Nalabit addanto aldaw a pasiarendakami ket denggem a mismo ti maysa kadagiti nakaskasdaaw a banda ti bulo iti Solomon Islands!

[Footnote