Ti Panagayatko iti Musika, Biag, ken Biblia

Kas insalaysay ni Boris N. Gulashevsky

Iladawanmo iti panunotmo ti agarup 65 anyos a bulsek a lakay, a naminduan a nagsagaba iti nakaro a pannakaatake ti puso. Agar-arubos ti luana bayat nga agyamyaman iti Dios gapu iti pannakaam-ammona Kenkuana. Kasta ti kasasaadko 11 a tawenen ti napalabas.

NAIPASNGAYAK idi 1930 idiay bario ti Tsibulev, iti distrito ti Cherkassy, Ukraine. Idi 1937, bayat ti manangirurumen a panagturay ni Stalin, naaresto ni tatangko ken nasentensiaan kas “maysa a kabusor ti Gobierno.” Kinompiskarda ti apartment a pagnanaedanmi. Liniklikandakami ti kaaduan nga am-ammomi. Di nagbayag, adu kadakuada ti naaresto met. Nasaknap idi ti panangliput, panagbuteng, ken kinaawan panagtalek.

Dua a bulan kalpasan ti pannakaaresto ni tatangko, naipasngay ni adingko a Lena. Iti tiempo ti lam-ek iti dayta a tawen, nagnaedkami kada Nanang, Lena, ken ni manongko a Nikolai iti nagbassit a siled nga awanan iti tawa ken paginuduan. Kalpasanna, immakarkami iti balay ni lolok. Dakami ken ni Nikolai ti nagtagibalay, para balsig, ken para tarimaan. Pagaayatko ti agobra. Agar-aramidak iti sapatos ken agkarkarpinteroak. Pagay-ayatko met ti musika, isu a nagaramidak iti bukodko a balalaika (instrumento a tallo ti kuerdasna ken trianggulo ti sukogna) a naaramid iti tabla. Sinursurok a tokaren dayta. Kalpasanna, nasursurok ti aggitara ken agtokar iti mandolin.

Idi ubingak, nabuniaganak kas maysa a Katoliko. Ngem yantangay diak maawatan dagiti pannursuro wenno kostumbre ti relihionmi, kasla nainkalintegan ti panamati nga awan ti Dios. Kalpasan ti Sangalubongan a Gubat II, nakimiembroak iti Komsomol (organisasion dagiti agtutubo a Komunista). No adda gundaway, kaduak ti dadduma a miembro ti Komsomol a makidebate kadagiti mamati nga adda Dios tapno paneknekanmi a kamali ti patpatienda.

Idi Saanakon a Makakita

Kalpasan a rinaut ti Alemania ti Soviet Union idi 1941, sumagmamano a daras a dimmanon ti panaggugubat iti bariomi bayat ti maikadua a sangalubongan a gubat. Idi Marso 16, 1944, bimtak ti maysa a bomba a nakaigapuan ti pannakabulsekko. Malaksid iti ut-ot, nangrugi a makariknaak iti ladingit ken kinaawan namnama.

Idi nagpalaud ti gubat ken napilitan nga umatras dagiti Aleman, nangrugiak nga agpagnapagna iti minuyongan ken agimdeng iti nakaay-ayat nga uni dagiti tumatayab. Gapu ta maasian ni Nanang, ikkannak iti vodka nga inumek. Dagiti met bumario awisendak kadagiti padayada, a sadiay a linglingayek ida babaen ti panagtokarko. Nagsigarilio ken nagbartekak tapno mailiwliwagko ti pannakaupayko. Ngem naamirisko a saan a dagita ti mangrisut iti problemak.

Idi nadamag ti maestra nga ikitko ti maipapan kadagiti eskuelaan para kadagiti bulsek, kinombinsirna ni Nanang nga ageskuelaak. Idi 1946, sigagagarak a nageskuela iti maaw-awagan ita a Kam’yanets’-Podil’s’kyy. Nasursurok ti agbasa ken ag-type iti Braille. Intultuloyko met ti panagadalko iti musika ket adu nga oras a kinabesadok ti concertina (maysa a bassit ken innem ti sulina nga instrumento a kaasping ti akordion). Idi nakita ti assistant ti prinsipal ti panagreggetko, impalubosna a tokarek ti akordionna. Nasursurok met ti agpiano.

Naaddaanak iti Bukodko a Pagtaengan

Idi 1948, inkasarko ti maysa a maestra iti eskuelaanmi, a timmulong kaniak iti panagadalko. Natay ni lakayna kabayatan ti gubat, isu nga agsolsolon a mangpadpadakkel iti dua a babbalasangda. Kalpasan ti panagraduarko, nakipagnaedakon kadakuada. Inkagumaak ti agbalin a responsable nga asawa ken ama. Sinuportarak ti pamiliak babaen ti panagtokarko. Idi 1952, naaddaankami iti anak a lalaki.

Inyurnosko ti pannakaibangon ti balaymi. Nangtangdanak kadagiti mangipasdek iti pundasion ken mangisaad kadagiti diding, ngem adu ti inaramidko a sisiak. Nasulnitan ti kinabulsekko babaen ti panangarikap ken imahinasion. Iggamak ti maysa a kayo, riknaek dayta, sa panunotek ti itsurana. Kalpasanna, mabalinkon a pormaen ti maysa a banag babaen iti dayta, agraman dagiti remienta a kayo. Nagorderak kadagiti asero a remienta manipud iti maysa a paktoria. Nagaramidak kadagiti muebles ken ladrilio a paginuduan, ken inleppasko ti dadduma pay a trabaho.

Orkestra Dagiti Pito

Intultuloyko ti napasnek a panagensayok isu a nagbalinak a propesional a musikero. Idi nalaingakon nga agtokar iti nadumaduma nga instrumento, sinursurok a tokaren ti pito. Naminsan, tinarimaanko ti maysa a bassit a pito a naaramid iti kawayan. Idi agangay, nasursurok ti agaramid kadagiti bukodko a pito. Iti dayta a tiempo, saan a pagarupen dagiti eksperto a mabalin ti agaramid kadagiti pito a mangpataud iti nabangag nga uni. Ngamin, no dakdakkel dagiti pito, nakapsut unay ti uni a pataudenda isu nga awan idi ti nabuangay nga orkestra para kadagita nga instrumento.

Nupay kasta, nakaaramidak iti pito nga addaan iti espesial a resonator a mangpapigsa iti unina. Kaipapanan dayta a mabalinen ti agaramid kadagiti pito a nabangag ngem kaskasdi a napigsa latta ti unida. Idi agangay, rinugiak ti nagaramid iti nagduduma a klase ti pito a makapataud iti komplikado a kombinasion dagiti agtutunos a tono.

Nakabuangayak idin iti orkestra dagiti tradisional a pagtokar. Bin-ig a bulsek ti tumutokar iti maysa kadagiti binuangayko nga orkestra. Kalpasanna, idi 1960, nangbuangayak iti orkestra a dagiti pito laeng ti matokar​—ti kakaisuna a kasta a klase ti orkestra iti Soviet Union ken nalabit iti intero a lubong.

Dagiti Natakuatak ken Panagduaduak

Idi 1960, adda sumagmamano nga instrumentok nga impatarimaanko iti maysa nga eksperto. Kinasarsaritanak maipapan iti relihion. Kas iti gagangay, nakidebateak kenkuana. Impapilitko nga awan ti Dios. Insingasingna a basta denggek ti ibasana manipud iti Biblia. Gapu ta diak pay pulos nabasa ti Biblia, nagimdengak.

Natukay ti pusok iti salaysay maipapan kenni Jacob a sigagaget a nangisakad iti biag ti pamiliana. Nakasangitak met idi nangngegko ti salaysay maipapan ken Jose. Naammuak nga inlako dagiti kakabsatna tapno agbalin a tagabo ken adu a rigat ti sinagabana. Ngem kaskasdi a pinakawanna dagiti kakabsatna idi agangay. (Genesis, kapitulo 37, 39-45) Nagustuak met unay ti Nabalitokan a Bilin, maipapan iti panangtrato iti sabsabali a kas iti kayattayo a pannakatrato. (Mateo 7:12) Gapu iti dayta, nagbalinak a pamiliar iti Biblia ket nangrugin nga ipategko dayta.

Nangrugiak a timmabuno iti gimong dagiti Baptist a kadua ti gayyemko a nangtarimaan kadagiti instrumentok. Rinegaluandak iti “Baro a Tulag” a Braille ket siaanep a rinugiak a binasa dayta. Nupay kasta, nadlawko a ti pannursuro dagiti Baptist ket maisupadi kadagiti nabasak iti Biblia. Kas pagarigan, isursuro ti Biblia a ti Dios ken ni Jesus ket dua a nagduma a persona ken ti Dios ket dakdakkel ngem ni Jesus. (Mateo 3:16, 17; Juan 14:28; Aramid 2:32) Kaskasdi nga ipapilit dagiti Baptist a ti Dios ken ni Jesus ket agpada, a paset ti Trinidad. Namin-adu a binasak ti “Baro a Tulag.” Inanagko ti tunggal sasao, ket nasiertok a ti sursuro a Trinidad ket awan iti Biblia.

Iti patarus ti Biblia nga us-usarenmi, nadakamat ti sao nga “impierno.” Pinadasko nga iladawan iti panunotko ti impierno a kas iti isursuro dagiti Baptist​—maysa nga umap-apuy a lugar a pakatutuokan iti agnanayon. Urayak la a simgar! Kuna ti Biblia a ti Dios ket ayat, isu a diak maawatan no apay a nangaramid iti kasta a disso. (1 Juan 4:8) Iti panaglabas ti tiempo, ad-adda a pinagduaduaak no agpayso ti umap-apuy nga impierno ken ti dadduma pay a pannursuro dagiti Baptist.

Dadakkel a Panagbalbaliw

Idi 1968, addan bukod a pamilia dagiti siumanko a babbai. Iti dayta a tiempo, naaddaankami kenni baketko kadagiti nakaro a di pagkinnaawatan. No lagipek ti napalabas, maladingitanak ta nagkurangkami iti ayat ken anus iti maysa ken maysa. Nagdiborsiokami ket kasta met laeng ti nagbanagan ti dua a simmaruno a panagasawak.

Nupay 35 a tawen a nagnaedak idiay Kam’yanets’-Podil’s’kyy, immakarak idi 1981 idiay Yoshkar-Ola, agarup 600 a kilometro iti daya ti Moscow. Sadiay nga intultuloyko ti kinamanagpartuatko. Buklen iti 45 a miembro ti maysa kadagiti orkestrak nga agtoktokar iti nadumaduma a kita ti pito. Ti rukod dagitoy ket manipud iti daydiay kasisinggitan a 20 a sentimetro ti kaatiddogna ken 1 a sentimetro ti diametrona agingga iti daydiay kababangagan a 2 a metro ti kangatona ken 20 a sentimetro ti diametrona. Naibrodkas iti radio ken telebision dagiti konsiertomi, ket nagpabuyakami iti intero a pagilian.

Iti maysa a pasalip idi 1986 a nakipasetan dagiti grupo dagiti musikero manipud iti intero a Soviet Union, immawatak iti maysa a sertipiko ken medalia gapu iti panangpasayaatko iti arte ti panagtokar iti pito. Tawtawen kalpasanna, adda naaramid a dokumentario a pelikula a napauluan iti Solo for Pipe, or the Fairy Tale of a Musician. Impadamag ti periodiko a Mariiskaya Pravda: “Ni Boris Nikolaievich Gulashevsky, a naitampok iti daytoy a pelikula, ket immawat iti espesial a sertipiko kas ti kaunaan a nangbuangay iti orkestra dagiti pito, ti kakaisuna a kasta a klase ti orkestra iti Russia.”

Panangbirok iti Kinapudno

Idi immakarak idiay Yoshkar-Ola, nagparehistroak iti maysa a libraria, nga aduan iti babasaen para kadagiti bulsek. Nagbalinak a pamiliar kadagiti pannursuro dagiti Katoliko, Pentecostal, ken Metodista. Nakimisaak met iti Orthodox Church. Nasdaawak ta agpapadada kadagiti Baptist, a dagiti pannursuroda ket saan a naibasar iti Biblia.

Nabasak met ti insurat ni Alexander Men, maysa a padi dagiti Orthodox, a ti personal a nagan ti Dios ket Yahweh. Kinunana pay nga adda idi tiempo nga inannurot dagiti Judio ti pudno a panagdayaw. Ngem idi agangay, nalaokan dayta iti idolatria ken pannursuro dagiti pagano. Nagustuak unay dagiti insuratna ket ad-adda a naparegtaak a mangbirok iti kinapudno.

Bimmileg ti Determinasionko

Iti maysa kadagiti orkestrak, naam-ammok ti musikera a ni Liza. Limitado unay ti panagkitana ken inanamongan ti linteg nga isu ket maibilangen a bulsek. Nagkasarkami idi 1990, ket naginteres met kadagiti naespirituan a banag. Iti dayta met la a tawen, sinarungkarak ni nanangko, a makipagnanaed kenni adingko a Lena idiay Baranovichi, Belarus. Gapu iti kiddaw ni nanangko, nakimisaak iti simbaan dagiti Katoliko, a sadiay, nagkomunionak. Manarimaan idi ti perestroika (panagbalbaliw ti kasasaad ti politika ken kagimongan) iti Soviet Union, isu a kaaduan a sermon ti padi ket naisentro kadagiti napolitikaan a panagbalbaliw. Naminsan pay a nasiertok a saan a dayta ti birbirokek.

Idi 1994, naidalitak gapu iti namindua a pannakaatake ti pusok. Iti dayta met la a tawen, pimmusay ni nanangko. Iti laksid ti amin, intultuloyko a binasa ti Biblia. Namin-25 a nabasakon ti “Baro a Tulag.” Kalpasanna, diakon binilang dagiti simmaruno a panangbasak iti dayta. Bayat nga intultuloyko a binasa dayta, lallalo nga immadu dagiti saludsodko. Naamirisko a no sisiak laeng, diak maawatan dagiti kinapudno nga isursuro ti Biblia.

Limmawag ti Pannakaawatko

Idi 1996, addada Saksi ni Jehova a nagtuktok iti pagtaenganmi idiay Yoshkar-Ola. Awan panagtalekko kadakuada yantangay sigun kadagiti periodiko, napeggadda a sekta. Ngem napanunotko, “No dangrandak, ania ngay koma ti maganabda kaniak?” Ti damo a sinaludsodko ket no ania ti panangmatmatda iti Trinidad. Kinunada a dayta a sao wenno dayta nga ideya ket awan iti Biblia. Naragsakanak, yantangay kasta met ti kapanunotak.

Naragsakanak unay idi nabasak ti Exodo 6:3 iti Biblia nga inaprobaran ti Sinodo ti Russia. Mabasa iti dayta ti nagan ti Dios a Jehova. Nasdaawak iti panangallilaw dagiti relihion kadagiti tattao babaen ti panangilimedda iti dayta a nagan. Apresiarek dagiti Saksi agsipud ta adda kadakuada ti nagan ti Namarsua ken ipakpakaammoda dayta iti sabsabali!​—Isaias 43:10.

Nagadu ti inyimtuodko kadagiti Saksi. Kas pagarigan: “Ania ti impierno a dakdakamaten ti Biblia? Apay a ti nalatak a bersion nga inaprobaran ti Sinodo ti Russia ibagbagana a mauramto ti daga?” Agsasaruno ti saludsodko, ngem iti tunggal sungbatda a naibasar iti Biblia, naamirisko a nasarakakon ti relihion nga adu a tawenen a birbirokek. Nakasangitak gapu iti ragsakko ket nagparintumengak a nagyaman iti Dios.

Di nagbayag, ikuykuyogdakon dagiti Saksi kadagiti gimongda. Nagustuak ti kinaatentibo dagiti timmabuno ken ti karasakas ti aggigiddan a panangukradda kadagiti binulong ti Biblia bayat ti palawag. No adda bersikulo ti Biblia a dakamaten ti agpalpalawag, ukagen dagiti dumdumngeg dagiti bukodda a Biblia. Idi pay laeng a nakapuotak iti kasta. Iti dayta a gimong, kinansion dagiti Saksi ti kanta a naibatay iti Isaias 35:5 a mangrugi kadagitoy a sasao: “Inton bulsek makakitan.”

Naragsakanak a nagadal iti Biblia a kadua dagiti Saksi agingga iti mamimpat a daras iti kada lawas. Idi agangay, naammuak no apay nga ipalpalubos ti Dios dagiti riribuk ken gubat ken no kasanona a tamingen dagiti epekto dagita a panagsagaba. Ad-adda a natukay ti riknak idi naammuak ti naayat a kari ti Dios maipapan iti Pagarianna, a babaen dayta, matungpalton ti pagayatanna a dagiti natulnog a tattao agbiagdanto nga agnanayon iti paraiso a daga. (Genesis 1:28; Isaias 65:17-25; Apocalipsis 21:1-5) Limmawag kaniak dagiti kinapudno iti Biblia, ket idi Nobiembre 16, 1997, nabautisaranak kas simbolo ti dedikasionko iti Dios.

Panagdanggay nga Agserbi iti Dios

Di nagbayag kalpasan ti panagbautisarko, nangrugi metten ni Liza nga agadal iti Biblia. Nupay adda paralisisna, napartak a rimmang-ay iti naespirituan ken nabautisaran idi 1998. Nasken a bagkatenda agingga iti pagitaneban, ngem determinado nga agserbi iti Dios iti amin a kararuana. Nangtangdankami iti masahista, ken nagehersisio ni Liza. Idi agangay, awanen ti paralisisna. Ita, malaksid iti itatabunona iti amin a gimong, makiramraman metten iti panangasaba iti binalaybalay ken makapagbiahe payen kadagiti adayo a teritoria tapno mangasaba.

Tunggal mapanak mangasaba, agkararagak tapno tumuredak. Kalpasanna, alaekon ti sarukodko, rummuarakon iti balaymi, saak magna iti kabesadok a dalan nga agturong iti pagsardengan ti bus. No adda madlawko nga umas-asideg a tao, rugiakon ti makisarita maipapan iti Biblia. Inton makaluganakon iti bus, agtugawak iti medio makintengnga a paset, makisaritaak kadagiti tattao maipapan iti Biblia ken paimaak ida iti literatura. No adda aginteres, kiddawek ti numero ti teleponona ken itedko met ti numerok.

Iti di pay nabayag, adda maestro iti musika a nakasabaak iti maysa a sanatorium (institusion a pagpaagasan ken pagpaimbagan, nga addaan iti makapasalun-at nga aglawlaw para kadagiti nabayagen a masakit). Nasdaaw iti nainsiriban a mensahe ti Biblia. Idi nakaawiden dayta a maestro, rinugiannan ti nagpayadal iti Biblia kadagiti Saksi ni Jehova. Iti dayta met la a sanatorium, naam-ammok ti direktor ti paktoria iti dayta a lugar, nga adda anakna a bulsek. Inranudko kenkuana ti namnamak. Naginteres ken inapresiarna dagiti kinapudno manipud iti Biblia a nangngeganna.

Sipud nabautisaranak, walo ti natulongakon nga agbalin met a manangiwaragawag iti Pagarian ken adu a sabsabali pay ti iyad-adalak iti Biblia. Dakkel a tulong ti kanayon nga ipapaay ni Jehova kadakami nga agassawa babaen kadagiti kapammatianmi. Ibasaandakami, ken pagsasaritaanmi dagiti naibasar-Biblia a publikasion. Irekordda met dagiti palawag iti kombension ken kongregasion para kadakami. Tumultulong amin dagitoy tapno maipapusomi dagiti kinapudno iti Biblia ken tapno mairanudmi dagita a kinapudno iti sabsabali. Gapu iti dayta, ti kongregasion ket nagbalin a “makapabileg a tulong” kadakami.​—Colosas 4:11.

Adu a tawen ti binusbosko iti musika, ket ita, siraragsak a kankantaekon dagiti kanta ti Pagarian. Naikabesak ti kaaduan a kanta iti Ruso a pagkantaan nga Agkanta iti Daydayaw ken Jehova. Mamatiak a nasarakannak ni Jehova iti daytoy nadangkes a lubong ken tinulongannak a mangbirok iti dalanko a rummuar manipud iti naespirituan a kinasipnget. Dayta ti gapuna a kombinsidoak nga addanto aldaw nga ispalennakto met manipud iti literal a kinasipnget.

[Ladawan iti panid 19]

Panagtokar iti C-major bass a pito

[Ladawan iti panid 20]

Panagtokar iti akordion, 1960

[Ladawan iti panid 20, 21]

Orkestra dagiti pito

[Ladawan iti panid 23]

Dakami kenni Liza ita