Kasano Katalged Dagiti Alpombra?
MANO nga oras ti busbusbosem iti uneg ti balay wenno pasdek a naalpombraan? Isingasing ti maysa a report iti magasin a New Scientist a mabalin a makapadanag ti sungbat, nangruna kadagiti ubbing.
Kinuna ti magasin: “Nasurok a 10 agingga iti 50 a daras a maapektarantayo kadagiti makapapatay unay a rugit iti uneg ti balay wenno pasdek ngem iti ruar.” Sigun iti environmental engineer idiay Estados Unidos a ni John Roberts, mabalin a makapadanag ti kinaadu dagiti rugit iti sample ti tapuk a naala kadagiti alpombra iti gagangay a balay. Nairaman kadagitoy ti buli, cadmium, mercury, pestisidio, ken ti makapakanser a polychlorinated biphenols (PCBs) ken polycyclic aromatic hydrocarbons (PAHs).
Sigun iti damag, ti maiserrek a pestisidio iti uneg ti balay babaen kadagiti sapatos ken saka dagiti taraken ket mabalin a mamin-400 a mangpaadu iti pestisidio a linaon ti tapuk ti alpombra. Adu a tawen nga agtalinaed kano dagitoy a rugit. Gapu ta medio agawaaw dagiti pestisidio ken PAHs, agalingasaw, agtayab, ken agdissodanto manen iti alpombra wenno iti dadduma a disso.
Masansan nga agay-ayam ti ubbing iti suelo ken isakmolda dagiti ramayda. Isuda ngarud ti kangrunaan nga agpeggad kadagiti rugit. Gapu ta naparpartak ti metabolismo ti ubbing ngem kadagiti adulto, no an-anagen uray no nalaglag-anda, ad-adu nga amang nga angin ti angsenda ngem kadagiti adulto.
Saan a sigurado ti sumagmamano a managsukisok no ti nasaksaknap a panangalpombra iti uneg ti balay ti mabalin a mangpakaro iti angkit, allergy, ken kanser dagiti ubbing. Kuna ni Roberts: “Ti balay a di naalpombraan ken adda pagpigadan ti sumagmamano a dissona ket addaan iti agarup kakasangapulo iti tapuk nga adda iti balay a naalpombraan ti intero a suelona.”
Isingasing ni Roberts a tapno nataltalged dagiti alpombra, masapul nga agusarka iti pagdalus a vacuum a napigpigsa ti panangsusopna iti rugit. Kalpasanna, maminsan iti kada lawas iti las-ud ti sumagmamano a lawas, mamin-25 a padalanam iti vacuum ti alpombra iti las-ud ti uppat a pie iti kangrunaan a ridaw, mamin-16 kadagiti disso a masansan a pagnaan, ken mamin-8 iti dadduma pay a paset ti alpombra.
Kalpasan a nairingpasmo daytoy simple a pamay-an, no padalanam ngarud iti vacuum ti alpombra iti kagudua ti naisingasing a kasansan iti kada lawas, masapul a pagtalinaedem a saan unay a matapokan. Kastoy pay ti ibalakad ni Roberts: “Mangikabilka iti de kalidad a pagpigadan iti tunggal ridaw iti balaymo ken mamindua nga agpigadka sakbay a sumrekka.”