“Estilo-Kangaroo a Panangaywan ti Ina”—Solusion iti Mamagpeggad-Biag a Problema?
Ti lugar ket iti ospital idiay Bogotá, Colombia, idi 1979. Gapu ta makapadanag ti kabassit ti bilang dagiti makalasat kadagiti kurang ti bulanda a maladaga, nakapanunot ti maysa a doktor a taga Colombia iti karkarna unay a solusion—“estilo-kangaroo a panangaywan ti ina.”
Maysa a karit kadagiti doktor ti panamagtalinaedda a sibibiag dagiti kurang ti bulanda a maladaga. Dagiti maladaga a nalag-an ti timbangda ket masansan a maikabil iti nabara nga incubator. Agtalinaedda sadiay agingga a dumagsenda. Ngem kadagiti napanglaw a pagilian, masansan a di inggagara a mayakar ti nadumaduma a peligroso nga impeksion gapu kadagiti napusek a pasilidad, narugit a kasasaad, kurang a doktor, nars, ken alikamen.
Maysa a doktor idiay Colombia ti nakapanunot iti pamay-an a kasla mangpalag-an iti daytoy a problema. Kasano ti kinaepektibona? No kurang ti bulan ti naipasngay a maladaga, maaywanan dayta iti gagangay a wagas agingga a sumayaat ti kasasaadna. Kabayatanna, maisuro iti ina no kasano nga aywananna ti anakna. No sumalun-aten ti maladaga, ti ina ti agbalin a sibibiag nga incubator-na. Kasano? Babaen ti kanayon a pannakayasideg kenkuana ti maladagana a mabalabalan ken maibarabad iti barukongna. Tangay natalged iti kasla supot ti kangaroo, agtalinaed a maimengan ti maladaga ken nalaka a mataraonan iti gatas ni nanangna. Gapuna, daytoy a pamay-an ket masansan a maawagan nga estilo-kangaroo a panangaywan ti ina.
Awan ti kasapulan a nangina nga alikamen. Agkawes laeng ti ina iti maitutop a blusa wenno gagangay a bestida nga addaan salikad. Inton umdasen ti kadagsen ti maladaga, mabalinen nga agawid ti agina, sada agsubli laengen iti ospital para iti regular a panagpaeksamen.
Sigun kadagiti umun-una a panagsukisok, epektibo ken natalged ti estilo-kangaroo a panangaywan ti ina. Kasla ad-adda pay a pasingedenna ti agina. Di pakasdaawan a maus-usaren daytoy a pamay-an iti adu a pagilian. Idiay Mexico, dagiti kakabagian ket masanay nga agbalin nga “ama a kangaroo,” “lola a kangaroo,” ken uray pay “kakabsat a kangaroo” tapno makatulongda no masapul nga aginana ti ina. Ti mangtartarawidwid iti maysa a programa iti estilo-kangaroo a panangaywan ti ina idiay Mexico a ni Dra. Guadalupe Santos kinunana iti Agriingkayo!: “Us-usarenmin daytoy a pamay-an nanipud pay idi 1992 ket nakitamin no kasano ti kinaepektibona. Manmano a kasapulan ti incubator ken dida unay agpaut iti ospital.”