“Naan-anay a Lawag”
NO NAPADASANYON nga iniggaman ti maysa a bombilia a nakasindi iti sumagmamanon a kanito, ammoyo a nabara unay dayta. Ti pudot a patauden ti bombilia ket aggapu iti nasayang nga enerhia. Sangapulo laeng a porsiento iti enerhia a patauden ti kadawyan a bombilia ti maipaay a lawag, ket 90 a porsiento ti masayang a pudot. No maidilig ti mangpataud iti lawag a bassit nga insekto a maawagan iti kulalanti (kitaem ti adda iti ngato, napadakkel), dandani 100 a porsiento ti maipaayna a lawag.
Nagbassit laeng ti masayang a pudot iti enerhia a patauden dagiti kulalanti isu a maawagan iti “naan-anay a lawag” ti lawag a pataudenda. Kasanoda a maaramidan dayta? Ti buksit ti kulalanti ket addaan iti substansia a maawagan iti luciferin. No lumasat ti oksihena iti tubo nga adda iti buksitna, mapasamak ti panagbalbaliw ti kemikal a mangpataud iti napusyaw a duyaw wenno lumabaga a berde a lawag.
Dagiti selula a mangpataud iti lawag ti kulalanti ket addaanda met iti nagtutukel a uric-acid, ket dagitoy ti mangisilnag iti lawag a rummuar iti buksit ti insekto. Sigun kadagiti sientista, ti lawag a patauden dagiti kulalanti ti pangallukoyda kadagiti agbalin nga asawada. Kasta met a ti nadumaduma a kita ti kulalanti ket mangisilnag iti nadumaduma a silnag ken raniag ti lawag.
Dikay kadi umanamong a pakaidayawan ti Namarsua, ni Jehova a Dios ti pamay-an ti pannakaparsua dagitoy babassit a parsua? Wen, kas kinuna ti salmista, “tunggal agang-anges a banag—idaydayawna koma ni Jah.”—Salmo 150:6.
[Picture Credit Line iti panid 31]
© Darwin Dale/Photo Researchers, Inc.