No Agbalin a Didigra Dagiti Babassit a Kamali
IDI Hulio 6, 1988, dagiti trabahador ti Piper Alpha nga adda iti taaw nga agsunsunda iti lana iti Amianan a Baybay ket mangtartarimaan iti bomba a mangiruar iti nagtutukel a likido ngem dida nalpas ti trabaho. Gapu ta awan ti umno a komunikasion, ti bomba ket linukatan dagiti simmaganad a simmukat a trabahador. Simgiab. Gapu ta addada iti nangato a disso iti tengnga ti taaw ken awan ti paglibasanda, 167 a tattao ti natay.
Sangapulo ket dua a tawen kalpasanna, idi Hulio 25, 2000, adda nagpegges a jet a napanaganan iti Concorde a lumaslasat iti pagtarayanna idiay Charles de Gaulle Airport idiay Paris, Francia. Bayat a nagbuelo ti eroplano, adda bassit a basura a titanium iti pagtartarayanna a nangpabettak iti maysa a dalig, a nakaigapuan ti pannakasiwang ti pagkargaan ti fuel iti maysa a payakna. Nagayus ti fuel kadagiti makinkannigid a makina, a nangpasardeng iti panagandarda ken nakaigapuan ti 60 a metro a gil-ayab. Kalpasan ti agarup dua a minuto, na-kras ti eroplano iti maysa nga otel, a nakatayan ti amin a pasahero agraman ti sumagmamano a tattao iti daga.
Iti pananglagipna kadagita nga aksidente, kuna ni James Chiles iti librona nga Inviting Disaster—Lessons From the Edge of Technology: “Iti baro a lubongtayo, a nalikmut kadagiti makina a pasaray saan a makontrol, masapul a bigbigentayo ti ekstraordinario a maaramidan ita dagiti ordinario a kamali.” Iti panangrepasona iti libro ni Chiles, kuna ti pagiwarnak a Science: “Makapagagar ti ekstraordinario, nagpartak ti irarang-ayna a siensia ken teknolohia iti napalabas a sumagmamano a gasut a tawen. Ipariknana kadatayo a dandani saan a limitado ti posibilidad a maawatan ken mausartayo ti lubong. [Ngem] awan ti pamkuatantayo a mangipagarup a manmanotayo nga agkamali ngem idi.”
Maipapan kadagiti napegpeggad a teknolohia, kuna ti Science: “Mabalin a mapasamak ti nakaro unay a didigra uray maigapu iti nagbassit [a kamali]. Para kadagita a teknolohia, masapul nga ipapilittayo ti di panagkamali.” Ngem no usigen ti napalabas a naaramidan ti sangatauan, mabalin aya a maragpat ti di panagkamali? Talaga a saan! No kasta, sigurado nga agtultuloy ti nadumaduma a didigra a nainaig iti kamali.
Ngem saan nga agtultuloy dagitoy iti agnanayon. Manamnama dagiti managbuteng iti Dios nga iti masakbayan, saanton a makeltay ti biag gapu iti panagkamali wenno limitasion ti tao. Apay? Agsipud ta pukawenton ti Dios ti amin a pakaigapuan ti ipapatay, panagladingit, ken ut-ot babaen ti nailangitan a gobierno ti Pagarianna.—Mateo 6:9, 10; Apocalipsis 21:3, 4.
[Picture Credit Line iti panid 31]
AP Photo/Toshihiko Sato