Natakuatan ti Sekreto ti Nagbassit a Lapayag
“Iti napalabas a dekada, natakuatan dagiti biologo ti baro a pamay-an dagiti animal a mangtunton iti pagtataudan dagiti uni,” kuna ti Science News. “Natakuatan dayta gapu ta napaliiwda a ti maysa nga insekto nga agkaan iti padana nga insekto ket sisisikap a darupenna dagiti kuriat gapu iti uni, uray no nagbassit ti ulo dayta nga insekto tapno maaramidanna ti aniaman kadagiti dati a naammuan a pamay-an a mangtunton iti pagtataudan iti uni.” Masansan nga agpannuray dagita a pamay-an iti dakkel a distansia ti dua nga eardrum.
Sigun iti nabiit pay a panagadal idiay Cornell University, E.U.A., “kabaelan a tuntonen dagiti kabaian nga insekto iti kita nga Ormia ochracea ti eksakto a pagtataudan dagiti uni iti nakaas-asideg a distansia—kas iti eksakto nga ar-aramiden ti kullaaw,” uray no agarup maysa laeng a milimetro ti dua a nagsilpo nga eardrum-da! Mabalin a gapu iti nagsayaat a panagdengngeg dagitoy nga insekto, eksakto a matuntonda ti uni a kas iti pamay-an ti kullaaw.
Nagsilpo dagiti eardrum dayta nga insekto babaen iti maysa a pannakarangtay a mabalin a mangpaabante ken mangpaatras iti dua a kulapot a kasla maymaysa. Nalabit mapanunotmo ti suwanso wenno battuabattuag iti lugar a pagay-ayaman. No mangngeg ti insekto ti uni ti kuriat, dandani insigida a mayallatiw dagiti uni iti eardrum nga as-asideg iti kuriat, ket malapdan ti reaksion ti sabali (nga eardrum) iti sumungsungad nga uni. Isu a napigpigsa ti panagdayyeg ti kulapot nga as-asideg iti kuriat. Gapu iti dayta, matunton ken makapagdiretso dayta nga insekto a mapan iti biktimana.
Ania ti praktikal a pakausaran daytoy a natakuatan? Patien dagiti managsukisok a mabalin a makatulong dayta tapno mapasayaatda ti disenio dagiti banag a kas kadagiti mikropono ken hearing aid. Kas pagarigan, mabalin a madisenio ti hearing aid tapno “dagiti uni ket aggapu laeng iti sangsanguen ti dumdumngeg,” sigun iti report. Wen, anian a kinasirib ti naiparangarang kadagiti nakaskasdaaw a parsua ni Jehova!—Job 42:2.
[Picture Credit Lines iti panid 31]
Makinngato a dua a retrato: R. Wyttenbach/ Cornell University
R. Hoy/Cornell University