“Ti Tambor nga Addaan iti Sangaribu a Pakabigbigan”
BABAEN TI MANNURAT TI AGRIINGKAYO! IDIAY SENEGAL
“AGUGA, agikkis, agsangit, ken agriaw. Agarasaas ken agkanta. . . . Dayta ti tambor a makapataud iti kababangagan agingga iti kasisinggitan nga uni, ti tambor nga addaan iti sangaribu a pakabigbigan.” Ania ti nanggutugot iti imahinasion daytoy a mannurat? Ti mapatit a tambor dagiti Africano a maawagan iti djembe.
Ti djembe ti kangrunaan a maus-usar iti panagtambor a tradision ti dadduma a tribu iti Makinlaud nga Africa. Kaaduanna, ti ritmo a patauden ti djembe ket nainaig kadagiti pasamak iti kultura ken biag iti bario, manipud iti pannakaipasngay, panagasawa, ken ipapatay, agingga kadagiti piesta, panagapit, ken uray ti panaggatang iti baro a kawes.
Nadumaduma ti sukog ken kadakkel dagiti djembe. Kinapudnona, ti Burkina Faso, Guinea, Mali, ken Senegal ket addaan iti bukodda a naisangsangayan nga estilo ti djembe. Ti instrumento ket naaramid iti solido a troso, a makungkongan ken masukog a pannakakaha ti tambor. Simple ti pannakaarkos ti dadduma, idinto ta nalabor ti pannakaukit ti sabsabali.
Apaman a kompleton ti pannakakahana, ti nalaing nga agar-aramid iti tambor pagbalinenna ti kayo a balabala a naisangsangayan nga instrumento ti musika. Umuna, paetan, kirkiran, ken lihaenna ti pannakakaha ti tambor agingga iti maitutop a rukod a mangpataud iti matarigagayan nga uni. Mabalin met a lanaanna ti uneg ti tambor sana ibilag tapno agpaut ti kayo.
Ti rabaw ti tambor a djembe ket naaramid iti lalat ti kalding. Daytat’ maibaskag iti pannakasingsing a metal a maiparabaw iti tambor. Maipirmi dayta babaen ti agsilpo a kordon a naigalut iti dua pay a pannakasingsingna. Kasano kairut ti panangguyod ti agar-aramid iti tambor kadagiti kordon? Depende iti uni a kayatna a patauden. Bayat nga itonadana ti tambor, masansan a sukimatenna dayta babaen ti panangtokarna iti kaay-ayona a kompas.
Ti djembe ket agpadpada a magustuan dagiti Africano ken sangaili. Kinapudnona, apaman a mapadasam ti makikadua iti panagtokar dagiti nalaing a musiko, dimonto malipatan “ti tambor nga addaan iti sangaribu a pakabigbigan.”