Nagpintas a Tumatayab nga Addaan iti Lawi a Napnuan Kadagiti Labang a Kasla Mata

BABAEN TI MANNURAT TI AGRIINGKAYO! IDIAY INDIA

MANIPUD iti paulo, mabalin a napugtuamon a ti paboreal ti salsalaysayenmi. Wen, ti kalakian a paboreal ket addaan iti paraipus a nalatak iti lubong.a Ngem napanunotmo kadin no ania ti pakausaran ti kasta a nagpintas a lawi ken no adda pay dadduma a naisangsangayan iti daytoy a parsua malaksid iti kinapintasna?

Adda tallo a kita ti paboreal a kapamilia ti pheasant. Ti salaysayenmi ditoy ket ti kita nga adda ditoy India, wenno ti gagangay a paboreal, a kaaduanna, asul-berde ti marisna ken 200-235 a sentimetro ti kaatiddogna, agraman ti paraipusna a 150 a sentimetro ti kaatiddogna. Berde ken bimmalitok dagiti dutdot ti paraipus nga addaan kadagiti labang a kasla mata nga asul ken maris gambang. Kaaduanna, maris pirak ken asul-berde dagiti dutdot iti bagina.

Gapu ta naideklara nga opisial a nailian a tumatayab iti India, sigurado a naranga ti paboreal. Nalabit dayta ti makagapu nga adda pagsasao iti dadduma a lenguahe a “napannakkel a kas iti paboreal.” Us-usarenda dayta a pangdeskribir kadagiti napangas a tattao. Nupay kasta, saan a naatap daytoy a tumatayab a kas iti ipasimudaag ti langana. Kinapudnona, nalaka a mapaamo dayta. Ibilang ti dadduma a sagrado ti paboreal. Gapu iti dayta, uray dadaelen dagitoy a tumatayab ti kataltalonan, an-anusan latta idan dagiti mannalon kadagiti away ti India.

Ti Naranga a Pabuyada

Siempre, nalatak unay dagiti paboreal gapu iti naranga a panagpabuyada babaen ti panangukradda iti paraipusda a kasla nagpintas a paypay. Ania ti panggep daytoy a pabuya? Nabatad a kayatna ti agpasindayaw kadagiti kabaian.

Medio napili ti kabaian, ngem kaay-ayona daydiay makaallukoy ti panagpabuyana. Ti paraipus ti paboreal a nakaukrad a kasla paypay ket addaan kadagiti nagmamaris a kasla mata. Dagitoy ti naan-anay a pakaallukoyan ti kabaian. Ad-adda a kayatna ti makiasawa iti paboreal a makaaramid iti kapintasan a panagpabuya.

Ngem ti panangukrad iti paraipus ket maysa laeng a paset ti pabuya. Iyukrad nga umuna ti kalakian ti atiddog a paraipusna sana pilkuen nga ipasango. Kalpasanna, rugiannan ti natangar a panagsalana. Aguyaoy dagiti lumabbaga-kimmayumanggi a payakna kadagiti sikiganna bayat nga agsariwagwag, isu a kumarasakas dagiti nakatingra a dutdotna. Agik-ik met iti napigsa. Saan a makaay-ayo a denggen ti uni ti kalakian. Ngem uray kaskasano, gapu iti dayta, maammuan ti kabaian nga interesado kenkuana ti kalakian.

Pasaray padasen ti kabaian a tuladen ti panangrayray-aw ti kalakian, ngem kaaduanna, kasla saan nga interesado. Nupay kasta, maallukoy ti kabaian iti kapintasan a panagpabuya ti kalakian. Iti makatawen, mabalin a maaddaan ti maysa a kalakian iti pangen a buklen ti lima a kabaian ken 25 a sibong.

Biag ti Sangapamiliaan a Paboreal

Kalpasan ti panagpaadu, tiempon nga agpurporda. Iti promedio, ti intero a paraipus ti nataengan a paboreal ket buklen ti nasurok a 200 a dutdot. Nakairuaman idi dagiti pumurok nga Indian nga urnongen dagitoy tapno ilakoda kadagiti Makinlaud a pagilian, agingga a naiparit ti kasta a panaglako tapno masalakniban dagiti paboreal. Siempre, ditoy India, dagiti dutdot ket maar-aramid pay laeng a paypay ken dadduma pay a napintas a tagilako.

No rabii, siiinayad a kumalay-at dagiti paboreal kadagiti natayag a kayo tapno agsapul iti maitutop a pagaponanda. Kabigatanna, siiinayad nga umulogda. Mabalin a maay-ayoka iti kinapintas dagitoy a parsua, ngem dimo namnamaen a napintas ti panagkantada a kas iti kinapintas ti langada. Madadael ti kinatalinaay ti rabii gapu kadagiti naliday a panagik-ikda agingga a mangrugidan nga agsawar iti taraonda.

Karne ken mulmula ti kanen dagiti paboreal​—kanenda ti uray ania. Karaman kadagitoy dagiti insekto, alutiit, alibut, ken no dadduma, uray ti babassit nga uleg, agraman bukbukel, lentehas, ken naganus a ramut ti mulmula.

Nupay kasla pagpannakkelna ti makaay-ayo a langana, mabalin a manangikaluya unay ti paboreal. Gapu ta dagus a madlawna dagiti peggad, a kas iti umarudok a pusa, agtignay ti paboreal babaen ti panagtarayna iti kabakiran bayat nga agik-ik iti nakapigpigsa tapno mamakdaar iti sumungsungad a peggad. Makidanggay met ti dadduma a kalakian. Nakaskasdaaw ti napartak a panagsasarunoda a tumaray. Nupay kasta, di baybay-an dagiti kabaian ti sibongda, uray dumteng ti kakaruan a peggad.

Ti atiddog a paraipus a dutdot ket saan a mangpaginad iti paboreal, nupay kasla marigatan no nasken nga agtalaw. Ngem apaman nga agtayab ti paboreal, nakaparpartak ti panagtayab ken panagpayakpakna.

No walo a bulanen dagiti sibong, nakasaganadan a mangpanaw iti dadakkelda ket asikasuendan ti bagida a bukbukodda. Ti ipapanawda ti makatulong iti ina nga agsagana iti sumaganad manen a panangaywanna kadagiti sibongna. Mangrugin nga agtubo ti pakabigbigan a paraipus dagiti agkabannuag a kalakian inton agarup walo a bulandan. Nupay kasta, sadanto laeng a maaddaan iti naan-anay a lawi dagiti kalakian inton agtawendan iti uppat. Kalpasanna, nakasaganadan a maaddaan iti bukodda a pamilia.

Ti Paboreal iti Historia

Dagiti paboreal ti nangpapintas kadagiti hardin iti kadaanan a Grecia, Roma, ken India. Iti arte ken panangarkos, dagiti paboreal ket adda kadagiti naarian a pagtaengan ditoy India iti rinibun a tawen. Kinapudnona, maibilang ti Peacock Throne a maysa kadagiti kapatgan a pagarigan ti kinabaknang ti India. Nataraigidan dayta iti nagadu a diamante ken namontaran kano idi iti 108 a rubi ken 116 nga esmeralda. Adda idi nabalitokan a paboreal iti balawbaw, ket dayta ti makagapu a napanaganan iti kasta. Nasangal ti trono ken nausar laeng kadagiti napateg idi a seremonia.

Sigun iti historia ti Biblia, karaman dagiti paboreal kadagiti napateg nga inangkat ni Ari Solomon. Makapainteres a panunoten a nakatangar nga agpasiapasiar idi dagiti paboreal kadagiti hardin iti palasiona. (1 Ar-ari 10:22, 23) Sigurado nga ipasimudaag kadatayo dagitoy a tumatayab nga adda masirib a Diseniador. No agsala ti paboreal a nakaukrad ti paraipusna nga addaan kadagiti makaay-ayo ken nagmamaris a dutdot, awan ti maaramidan ti maysa a tao no di agsiddaaw kadagiti artistiko nga abilidad ni Jehova, ti Dios a “namarsua iti amin a banag.”​—Apocalipsis 4:11.

[Footnote]

[Ladawan iti panid 16]

Saan a kanayon a maallukoy ti kabaian a paboreal iti panagsala ti kalakian

[Credit Line]

© D. Cavagnaro/Visuals Unlimited

[Dagiti Ladawan iti panid 17]

Naimbag nga inna dagiti kabaian a paboreal

[Credit Line]

© 2001 Steven Holt/stockpix.com

[Picture Credit Line iti panid 15]

Paboreal: Lela Jane Tinstman/Index Stock Photography

[Picture Credit Line iti panid 16]

John Warden/Index Stock Photography