Nadisenio Kadi?

Ti Mata ti Peacock Mantis Shrimp

● Ti peacock mantis shrimp ket masarakan idiay Great Barrier Reef ti Australia. Iti amin nga animal iti lubong, daytoy ti kakomplikaduan iti mata. “Naisalsalumina dayta,” kuna ni Dr. Nicholas Roberts, “lab-awanna ti aniaman a naimbento ti tattao.”

Usigem: Makita ken maprosesona ti polarized a lawag—kadagiti pamay-an a di kabaelan ti tattao. Dagiti wave dayta a lawag ket mabalin a deretso wenno agkunkunikon. Naiduma ti peacock mantis shrimp iti dadduma a parsua, ta malaksid a makitana ti dua a klase ti polarized a lawag, ti deretso a lawag ket mapagbalinna pay kas agkunkunikon. Maaramidna met ti kasumbangir dayta isu a naklarklaro ti panagkitana.

Kasta met laeng ti DVD player. Tapno mabasana ti impormasion, ti wave ti polarized a lawag a maiturong iti maysa a disc ket pagbalinen ti DVD player kas pakunikon a lawag sana isubli kas padiretso. Ngem nalalaing ti peacock mantis shrimp. Ti gagangay a DVD player mabasana laeng ti nalabaga a lawag—ken kadagiti mas moderno a player, ti asul a lawag. Ngem ma-convert ti mata ti peacock mantis shrimp ti lawag ti amin a makita a kolor.

Patien dagiti managsirarak a no ti mata ti peacock mantis shrimp ket tuladen dagiti inheniero, makaaramidda iti DVD player a makabasa kadagiti disc nga aglaon iti ad-adu nga amang nga impormasion ngem kadagiti agdama a disc. “Makaparagsak ta nakasimsimple dayta,” kuna ni Roberts. “Adayo a nasaysayaat dayta ngem iti aniaman a pinadasmin a patauden.”

Ania ti makunam? Naiparna la kadi ti nakaskasdaaw a mata ti peacock mantis shrimp? Wenno nadisenio dayta?

[Picture Credit Line iti panid 24]

Impaay ni Stephen Childs