Ti Panangmatmat ti Biblia

Bendisionannatayo Aya ti Dios iti Kinabaknang?

“Ti bendision ni Jehova​—isu dayta ti mangpabaknang ket awan rigat nga inayonna iti dayta.”​—PROVERBIO 10:22.

KAYAT kadi a sawen ti teksto iti Biblia a nadakamat iti ngato a bendisionan ti Dios dagiti adipenna iti material a kinabaknang? Kasta ti ammo ti dadduma a tattao. Usigem ti kinuna ti maysa nga Australiano a Pentecostal a manangaskasaba ken autor: “Iti librok ibagak kadakayo no apay a kasapulanyo ti ad-adu a kuarta ken maikadua, no kasano a magun-odanyo ti ad-adu a kuarta . . . No mabaliwanyo ti panagpampanunotyo ken patanorenyo ti umiso a panangmatmat iti kuarta, patiek a bendisionan ken pabaknangennakayto ti Dios ken pulos a dikay agproblema manen iti kuarta.”

Ngem ipasimudaag ti kasta a pagarup a saan a bembendisionan ti Dios dagiti napanglaw. Ti aya material a kinarang-ay ti pudno a pagilasinan ti panangbendision ti Dios?

Dagiti Nabendisionan Gapu iti Maysa a Panggep

Nairaman iti salaysay ti Biblia dagiti kasasaad a ti Dios binendisionanna iti kinabaknang dagiti matalek nga adipenna. Kas pagarigan, pimmanaw ni Jacob iti pagtaenganna a ti laeng sarukodna ti intugotna. Ngem idi nagawid 20 a tawen kalpasanna, addaanen iti umdas a karnero, baka, ken asno a nakabuangayan ti dua a kampo. Sigun iti Biblia, insagut ti Dios ti kinabaknang ni Jacob. (Genesis 32:10) Adtoy ti sabali pay a pagarigan: Napukaw ni Job ti amin a sanikuana, ngem idi agangay binendisionan ni Jehova iti “sangapulo ket uppat a ribu a karnero ken innem a ribu a kamelio ken sangaribu a paris ti bakbaka ken sangaribu nga asna.” (Job 42:12) Inikkan ni Jehova ni Ari Solomon iti aglaplapusanan a kinabaknang nga agdinamag pay laeng agingga ita.​—1 Ar-ari 3:13.

Iti kasumbangirna, nagadu ti salaysayen ti Biblia maipapan kadagiti napanglaw a matalek ken natulnog a managdaydayaw iti Dios. Sigurado a saan a dusdusaen idi ti Dios ti dadduma a tattao iti kinapanglaw bayat a ti dadduma ket bembendisionanna iti kinabaknang. Ania ngarud ti panggep ti Dios iti panangtedna iti kinabaknang iti dadduma a kasasaad?

Ti sungbat ket naiduma iti tunggal kasasaad. Ti material a kinabaknang ni Jacob ket nangpataud iti pundasion tapno mabuangay ti maysa a nasion kas panagsagana iti iyaay ti naikari a Bin-i. (Genesis 22:17, 18) Ti kinabaknang ni Job ti nangikkat iti aniaman a panagduadua maipapan iti kinasiasino ti nangdidigra ken ni Job, a nakasantipikaran ti nagan ni Jehova. (Santiago 5:11) Inusar met ni Solomon ti aglaplapusanan a kinabaknangna nga inted ti Dios, tapno maibangon ti nagngayed a templo. (1 Ar-ari 7:47-51) Makapainteres ta inusar met ni Jehova ni Solomon tapno maisurat ti mismo a kapadasanna maipapan iti limitado a pateg ti kinabaknang.​—Eclesiastes 2:3-11; 5:10; 7:12.

No Kasano a Bendisionannatayo ti Dios

Insuro ni Jesus kadagiti pasurotna a maaddaanda iti nasayaat a panangmatmat iti kuarta idi imbagana kadakuada nga ‘isardengda ti maringgoran’ maipapan iti sanikua. Inkalinteganna kadakuada nga uray ni Solomon iti amin a kinadayagna ket di nakawesan a kas kadagiti lirio iti tay-ak. Ngem kinuna ni Jesus: “No, ita, ti Dios kawesanna a kasta ti mulmula iti talon . . . saan kadi nga ad-adda pay a kawesannakayto, dakayo a bassitan pammati?” Impanamnama ni Jesus kadagiti Kristiano a no iyun-una dagiti pasurotna a biroken ti Pagarian ken ti kinalinteg ti Dios, mainayonto ngarud kadakuada ti taraon, kawes, ken pagtaengan. (Mateo 6:25, 28-33) Kasano a matungpal dayta a kari?

No masurot ti pammagbaga ti Biblia, adu ti naimbag nga ibungana nangruna ti naespirituan a kinabaknang. (Proverbio 10:22) Nupay kasta, mangyeg dayta iti dadduma pay a pagimbagan. Kas pagarigan, kastoy ti isursuro ti Sao ti Dios kadagiti Kristiano: “Ti agtatakaw saan koma nga agtakawen, no di ket agtrabaho koma a sipipinget.” (Efeso 4:28) Ibagana pay a “daydiay agtartrabaho a buyogen ti managbaybay-a nga ima bassitanto iti sanikua, ngem ti ima daydiay nasaet isunto ti mangpabaknang iti maysa.” (Proverbio 10:4) Dagiti amo masansan a kaykayatda nga empleado dagiti napudno ken nagaget a Kristiano a mangsursurot iti daytoy a pammagbaga. Mabalin a maysa a bendision dayta.

Isursuro met ti Biblia a liklikan dagiti Kristiano dagiti naagum a pagpalpaliwaan a kas iti panagsugal, ti makarugit a panagsigarilio ken ti makadangran a panaginum. (1 Corinto 6:9, 10; 2 Corinto 7:1; Efeso 5:5) Makitanto dagidiay mangsurot iti daytoy a pammagbaga a bumassit ti paggastuanda ken sumalun-atda.

Napatpateg Ngem iti Pirak Wenno Balitok

Nupay kasta, ti material a kinabaknang ket saan a ti kakaisuna a pakakitaan iti anamong ken parabur ti Dios. Kas pagarigan, imbutaktak ni Jesus ti naespirituan a kinapanglaw ti dadduma a Kristiano idiay Laodicea idi imbagana kadakuada: “Kunam: ‘Nabaknangak ket nakagun-odak iti kinabaknang ket saanko a pulos kasapulan ti aniaman a banag,’ ngem saanmo nga ammo a nakaay-ay-ay ken nakakaasi ken napanglaw ken bulsek ken lamolamoka.” (Apocalipsis 3:17) Maisupadi iti dayta, kinuna ni Jesus kadagiti Kristiano idiay Smirna a napanglaw iti material ngem nabaknang iti naespirituan: “Ammok ti rigat ken kinakurapaymo​—ngem nabaknangka.” (Apocalipsis 2:9) Gapu iti kinamatalek dagitoy a Kristiano, mabalin a rimmigat ti panagbiagda kadagiti nangidadanes kadakuada, ngem addaanda iti kinabaknang nga adayo a napatpateg ngem iti pirak wenno balitok.​—Proverbio 22:1; Hebreo 10:34.

Bendisionan ni Jehova a Dios ti panagregget dagidiay mangikagkagumaan a mangaramid iti pagayatanna. (Salmo 1:2, 3) Pabilgenna ida ken ipaayna ti kasapulanda tapno madaeranda dagiti pakasuotan, tapno masustentuanda dagiti pamiliada, ken mayun-unada a biroken ti Pagarianna. (Salmo 37:25; Mateo 6:31-33; Filipos 4:12, 13) Gapuna, imbes a matmatanda dagiti material a banag kas kangrunaan a bendision ti Dios, ikagumaan dagiti pudno a Kristiano ti agbalin a “nabaknang iti nasayaat nga ar-aramid.” Babaen ti panangpatanor dagiti Kristiano iti nasinged a pannakirelasionda iti Namarsua, “sitatalged nga agurnongda maipaay iti bagbagida iti nasayaat a pamuon maipaay iti masanguanan.”​—1 Timoteo 6:17-19; Marcos 12:42-44.