Agimtuod Dagiti Agtutubo . . .

Kasano a Maliklikak ti Kinalatak ti Kabsatko Tapno Makaaramidak iti Bukodko a Pakabigbigan?

“Kayatko idi a naiduma ti personalidadko, ngem kanayon a mapilitanak nga agtignay a maitunos iti reputasion dagiti manangko. Panagriknak, pulos a diak maaramid ti nagapuanan dagiti manangko.”​—Clare.

ADDA aya manong wenno manangmo a kasla naballigi iti dandani amin a banag? Kanayon aya nga idagadag ti dadakkelmo a tuladem dayta a kabsatmo? No kasta, mabalin a maamakka a kanayonto latta nga agbibiagka iti sidong ti kinalatakna​—a kanayon a maidilig ti kinataom kadagiti naballigi a nagapuanan ti kabsatmo.

Agpadpada a nagturpos dagiti manong ni Barrya iti mararaem unay a Ministerial Training Schoolb ken nagsayaat dagiti reputasionda kas Kristiano. Admitiren ni Barry: “Bimmassit ti panagtalekko iti bagik, agsipud ta mariknak a pulos a diak maragpat dagiti pagalagadanda iti panangasaba wenno saanak nga agbalin a kas iti kalaingda nga agpalawag iti publiko. Narigatanak a maaddaan iti bukodko a gagayyem. Ngamin, kumuykuyogak laeng kadagiti manongko no adda agawis kadakuada. Panagriknak ket nainggayyeman laeng kaniak dagiti tattao gapu kadagiti manongko.”

Natural laeng nga agimonka no masansan a maidaydayaw ti kabsatmo. Idi panawen ti Biblia, nagpaiduma ti agtutubo a ni Jose kadagiti kakabsatna. Ania ti epekto daytoy kadagiti kakabsatna? “Rinugianda a guraen, ket saanda a makapagsao a sitatalna kenkuana.” (Genesis 37:1-4) Siempre, naemma ni Jose. Ngem nalabit mapagimonnaka ti kabsatmo ken mapagsakitna ti nakemmo no masansan nga ipalagipna kenka dagiti nagapuananna.

Gapu iti daytoy, agrebelde ti dadduma nga agtutubo​—nalabit babaen ti panangipalubosda a bumaba dagiti gradoda idiay eskuelaan, saanda unay a makipaset kadagiti Nakristianuan nga aktibidad, wenno agaramidda iti nakaal-alas. Mabalin a pagarupenda a no dida matulad ti kinalaing ti kabsatda, dida laengen padasen dayta. Ngem inton agangay, madangranka laeng no agrebeldeka. Kasano a maliklikam ti kinalatak ti kabsatmo iti wagas nga adda latta panagraemmo iti bagim?

Maaddaanka iti Umiso a Panangmatmat Kadagiti Kakabsatmo

No makitkitam a ti kabsatmo ti kanayon a sentro ti atension, mabalin a pagarupem a perpekto isuna ken pulos a dimo matulad. Ngem husto aya dayta? Silalawag a kuna ti Biblia: “Amin nagbasol ken agkurang iti dayag ti Dios.”​—Roma 3:23.

Wen, aniaman dagiti saguday wenno paglaingan ti kakabsatmo, kaskasdi a ‘tattaoda nga addaan kadagiti isu met laeng a pagkapuyan’ a kas kadatayo. (Aramid 14:15) Awan ti rason tapno aglablabes ti panangitan-ok wenno panangidayawmo kadakuada. Ni Jesu-Kristo laeng ti tao idi a nakaipakita iti perpekto nga ulidan.​—1 Pedro 2:21.

Agsursuroka Kadakuada!

Sumaganad, padasem a matmatan ti kasasaadmo kas maysa a gundaway a pakasursuruam. Panunotem, kas pagarigan, ti kakabsat ni Jesu-Kristo. (Mateo 13:55, 56) Panunotem no ania koma ti mabalin a nasursuroda iti perpekto a manongda! Nupay kasta, “ti kakabsatna, iti kinapudnona, saanda a winatwat ti pammati kenkuana.” (Juan 7:5) Nalabit ti amor propio ken panagimon ti nanglapped kadakuada tapno mamatida kenkuana. Dagiti naespirituan a kakabsat ni Jesus​—dagiti adalanna​—ti immawat iti naimpusuan nga awisna: “Agsursurokayo kaniak.” (Mateo 11:29) Kalpasan laeng a nagungar ni Jesus, sa naapresiar dagiti kakabsatna iti lasag. (Aramid 1:14) Isu a kasakbayanna, naikapisda iti adu a naisangsangayan a gundaway a makasursuro iti naisangsangayan a manongda.

Kasta met laeng ti kamali ni Cain. Maysa a naisangsangayan nga adipen ti Dios ti adingna a ni Abel. Kuna ti Biblia a “ni Jehova kumitkita buyogen ti panangpabor ken Abel ken iti datonna.” (Genesis 4:4) Ngem adda rason a ti Dios “saan a kimmita buyogen ti aniaman a panangpabor ken Cain ken iti datonna.” Rumbeng koma a nagpakumbaba ni Cain ken nakasursuro ken ni adingna. Imbes ketdi, “pimmudot ni Cain buyogen ti napalalo nga unget” sana pinatay ni Abel.​—Genesis 4:5-8.

Sigurado a pulos a dimo kayat a kasta ti panagungetmo iti kabsatmo. Ngem mabalin met a maikapiska iti nagadu a gundaway no paturayem ti amor propiom ken imonmo. Rumbeng a dika agimon no adda kabsatmo a nalaing iti matematika, historia, paboritom nga isport, Kasuratan, wenno panagpalawag iti publiko! Ngamin, “ti imon ket kinarinuker kadagiti tulang” ken makadangran laeng kenka. (Proverbio 14:30; 27:4) Imbes nga agsakit ti nakemmo, ikagumaam ti makasursuro iti kabsatmo. Awatem ti kinapudno nga isut’ addaan iti sumagmamano a saguday wenno paglaingan nga awan kenka. Paliiwem no kasano ti panangaramid ti kabsatmo iti nadumaduma a banag​—wenno nasaysayaat pay no agpatulongka.

Nabenepisiaran ti nadakamat itay a ni Barry kadagiti nasayaat nga ulidan dagiti manongna. Kunana: “Nakitak no kasano karagsak ti kakabsatko agsipud ta situtulokda a tumulong kadagiti kakongregasionan ken kaskasabaanda. Isu nga inkeddengko a tuladen ti ulidan dagiti manongko ket nakipasetak iti panagbangon iti Kingdom Hall ken Bethel. Dagiti kapadasak ti nangted kaniak iti panagtalek ken timmulong a nangparang-ay iti relasionko ken Jehova a Dios.”

Takuatem Dagiti Paglaingam

Nalabit maamakka a saanton a naiduma ti personalidadmo no tuladem dagiti nasayaat a kalidad ti kabsatmo. Ngem saan a rumbeng a kasta ti mapasamak. Pinaregta ni apostol Pablo dagiti Kristiano idi umuna a siglo: “Agbalinkayo a tumutulad kaniak.” (1 Corinto 4:16) Kaipapanan kadi daytoy a kayat ni Pablo nga agpapadada iti personalidad? Pulos a saan. Nagadu ti gundaway a mabalinmo a parang-ayen ti personalidadmo. Dina kaipapanan nga adda depektom no saanka a nalaing iti matematika a kas iti kabsatmo. Naidumaka laeng ngamin.

Kastoy ti praktikal a balakad ni Pablo: “Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o maipapan iti bagina met laeng, ket saan nga iti panangipadis iti sabali a tao.” (Galacia 6:4) Apay a dimo parang-ayen dagiti paglaingam ken abilidadmo? Ti panagadal iti ganggannaet a pagsasao, panagsursuro nga agtokar, wenno panagusar iti computer ti mabalin a makatulong kenka tapno ad-adda a pagraemam ti bagim, ken mabalin met a makaipaayda kadagiti napateg a paglaingan. Saanmo unay a pakadanagan a sursuruen dagita iti perpekto a wagas! Sursuruem ti agbalin a naannad, napinget, ken nalaing. (Proverbio 22:29) Mabalin a saanka unay a nasigo iti maysa a banag ngem “ti ima dagidiay nasaet isunto ti agturay,” kuna ti Proverbio 12:24.

Nupay kasta, ipangpangrunam a parang-ayen ti espiritualidadmo. Napatpateg nga amang dagiti naespirituan a paglaingan ngem iti aniaman a saguday a mabalin a manggutugot iti ad-adu nga atension. Panunotem ti singin a da Esau ken Jacob. Ni Esau ket ipagpannakkel unay ni tatangna agsipud ta “maysa a lalaki nga ammona ti aganup, lalaki ti tay-ak.” Idi damo, nalabit maipaspasuli laeng ni adingna a Jacob gapu ta “awan pakababalawanna, agnanaed kadagiti tolda.” (Genesis 25:27) Saan a pinarang-ay ni Esau ti espiritualidadna isu a naikapis kadagiti bendision. Pinatanor ni Jacob ti panagayatna kadagiti naespirituan a banag isu a sipaparabur a binendisionan ni Jehova. (Genesis 27:28, 29; Hebreo 12:16, 17) Ania ti masursurotayo? Parang-ayem ti espiritualidadmo, ‘pagsilnagem koma ti silawmo’ tapno “ti panagrang-aymo maiparangarang iti amin a tattao.”​—Mateo 5:16; 1 Timoteo 4:15.

Kastoy ti kinuna ti nadakamat itay a ni Clare: “Mapnekak idin a mairaman iti kinalatak dagiti manangko. Ngem inkeddengko a suroten ti Nainkasuratan a pammagbaga a ‘paaduen’ dagiti pangipakitaak iti kinadungngo. Agsasabali a kakongregasionak ti nakikaduaak iti tay-ak ti ministerio, ket nagpanunotak kadagiti praktikal a pamay-an tapno matulongak dagiti kakongregasionak nga agkasapulan. Inawisko met iti balaymi dagiti kakabsat a nagduduma ti tawenda tapno ilutuak ida. Maragsakanak itan ta ad-adun ti gagayyemko ken ad-adda itan nga agkompiansaak iti bagik.”​—2 Corinto 6:13.

Pasaray mabalin nga agkamali ti dadakkelmo ken idagadagda a tuladem ni manong wenno manangmo. Ngem no panunotem a bin-ig laeng a ti pagimbagam ti pampanunoten ti dadakkelmo, mabalin a maksayan ti panagsakit ti nakemmo. (Proverbio 19:11) Nupay kasta, mabalin a nasayaat no siraraem nga ibagam kadagiti dadakkelmo ti panagriknam kadagita a panangidilig. Nalabit ikagumaandanto ti agpanunot iti sabali a pamay-an ti panangyebkasda iti pannakaseknanda.

Pulos a dimo liplipatan a ni Jehova a Dios a mismo ti mangpaliiw kenka no agserbika kenkuana. (1 Corinto 8:3) Kastoy ti konklusion ni Barry: “Naamirisko a naragragsakak bayat a bumaybayag ti panagserbik ken Jehova. Matmatandak itan dagiti tattao a naidumaak ket apresiarendak, a kas iti panangapresiarda kadagiti kakabsatko.”

[Footnotes]

[Ladawan iti panid 25]

Masansan aya a ti kabsatmo ti maidaydayaw?

[Ladawan iti panid 26]

Takuatem dagiti sagudaymo ken paginteresam

[Ladawan iti panid 26]

‘Pagsilnagem koma ta silawmo’ babaen ti panangparang-aymo iti espiritualidadmo